Read Kuranko Isikiyɛli 40 Bible Online

Isikiyɛli 40 - Kuranko bible

Isikiyɛli 40

¹Mala birɛ san mogan loli nyɔgɛ, wo karɛ fɔlɛ, a tele tan ma, Marita Sɛnbɛ-wɛ yigira n kuma. Wo ya a taran, Yerusalɛm ara san tan-ni-nani bɔ ma yogenu bolo. Marita Sɛnbɛ tara n na

² Isirɛla nyamanɛ rɔ ko-rayirɛ rɔ. A tara n sigi kɔnkɔ-layan-bɛ do kuma. N ya bɔn donu sɔnɛ yen n yarɔ dugula wara la ko-rayirɛ wo rɔ. Anu nadɛnnɛ iko soe.

³ A tara n gbɛrɛn nyɔ ma tumɛ min, n ya kei do yen sɔnɛ tarɛ don-dɛ la. A silɛ ye tiila a ma iko silɛɛ. Fen-suman-yili min nadannɛ linɛn-kurɛ la, wo ye a bolo tɔ. Fen-suman-kɔlɔma fanan ye a bolo tɔ.

⁴Kei wo ya a fɔ n ye ko, “Ile hadama-dan, i yɛ bɛn n ma ka i tole masɔ a kin na! N si min bɛɛ yira i la, i yili ni to wonu ko bɛrɛkɛ bawo i nara wo lela ko la yan. I ye min bɛɛ rayenna yan, fɔ i ni ta wo rakaran Isirɛla mɔgɛnu ye.”

⁵ N ya Bato-Bɔn le yen kata mininɛ a ma. Kei wo ya ala fen-suman-kɔlɔma wo bi minna yanyɛ bɛnnɛ nunkan-nya wɔrɔnfila ma. A ya kata wo suman. Kata wola yanyɛ anubɛ a kɔnɛ wonubɛ kɔlɔma wo rakɛn de gbetu!

⁶A tara tele-bɔɛ tenbi-bolɔn wara la. A yɛlɛta yɛlɛdɛ ma. A ke yɛlɛdɛ laban ma, a ya dandan-kɔrɛ kɔnɛ suman. Dandan-kɔrɛ wo kɔnɛ bɛnta kɔlɔma wo nya kelen de ma.

⁷Kilɛ ye tenbi-bolɔn burɔ nyɔ. Konko sawa ye a bolo-maran wara la. Bon-makandan-konko sawa fanan bi a bolo-nyimɛ wara la. Konko wonu kɔnɛ anubɛ anu lɔngbɔn rakɛn de! Wonubɛ kɔlɔma wo rakɛn fanan. Dandan min bi konko wonu tɛma, wonu da-gbengbe bɛnta nunkan-nya wɔrɔ-wɔrɔ ma. Kilɛ wo kunyɛ wara la, konko ye nyɔ min bi a labilala kata-burɛ ma. Konko wo kɔnɛ bɛnta kɔlɔma wo nya kelen de ma.

⁸Kilɛ wo kunyɛ bɛnnɛ konko min ma Bato-Bɔn wara la, konko wo kɔnɛ bɛnta nunkan-nya segin ma. Konko wo dandan da-gbengbe bɛnta nunkan-nya fila ma.

⁹

¹⁰(Bon-makandan-konko minnu bi kilɛ wo tɔnkɔn filɛ rɔ, wonu takɛn de! Dandan minnu bi konko wonu kelen-kelennamɛ-bɛɛ tɛma, wo bɛɛ da-gbengbe rakɛn de fanan.)

¹¹Wo kɔma, a sɛgira dandan-kɔrɛ wo lɔngbɔn sumanna. Dandan-kɔrɛ wo don-dɛ bɛnta nunkan-nya tan ma. Dandan-kɔrɛ nyɛrɛ bɛnta nunkan-nya tan-ni-sawa ma.

¹²Konko wonu kɔrɔ, nunkan-nya kelen karanɛ gbesinɛ tala. Karanɛ wonu da-gbengbe, nunkan-nya kelen-kelen. (Konko wonu kɔnɛ anubɛ a lɔngbɔn, anu nya wɔrɔ-wɔrɔ.)

¹³Wo kɔma, ka a bi bolo-nyimama-konko-dan ma ka a sigi bolo-maranma-konko-dan la, a ya wo suman. A bɛnta nunkan-nya mogan-ni-loli ma.

¹⁴Konko min bi kila-kunyɛ la, min nabilanɛ Bato-Bɔn kata burɔ, wo lɔngbɔn bɛnta nunkan-nya mogan ma.

¹⁵Tenbi-bolɔn wo lɔngbɔn ka a bi a don-dɛ ma ka ta ke a konko-laban ma, a ya wo suman. A bɛnta nunkan-nya bi-loli ma.

¹⁶Konko wo bɛɛ wundannɛ tɛgɛnɛ a ma tala. Wundannɛ fanan tɛgɛnɛ bon-burɔ-dandannu ma. Tɛɛnla muninyɛnu sanɛ a tɛma-kilɛ-dandannu ma.

¹⁷Kei wo ya n nabɔ tele-bɔɛ tenbi-bolɔn wara la ka ta n na kata burɔ. Konko bi-sawa ye kata wo burɔ. Kurinu sanɛ konko bi-sawɛ wonu yarɔ kilɛ ma tala.

¹⁸Kuri wonu bi tala a sansan-yili ma kata nyɛrɛ burɔ. Tenbi-bolon-kilɛ lɔngbɔn anubɛ kuru sanɛ wonu kɔnɛ rakɛn de! Kata burɔ mayiginɛ ka tenbi a Bato-Bɔn luyi la.

¹⁹Kei wo ya kata-burɛ suman ka a bi kata-tenbi-bolɔn ma ka a sigi Bato-Bɔn luyima-tenbi-bolɔn la. Wo bɛnta nunkan-nya kɛmɛ ma. A kantɔtɛ fanan bi wo nya na le.

²⁰Wo kɔma, kei wo ya kantɔ-tenbi-bolɔn suman min bi a labilala kata-burɛ ma.

²¹Kilɛ ye nyɔ fanan tɛma, konko sawa-sawa ye a tɔnkɔn filɛ bɛɛ rɔ. A konko wo, a dandan da-gbengbe wo, a kila-kunna-konko wo, wonubɛ a tele-bɔɛ tenbi-bolɔntɛ rakɛn de! Tenbi-bolɔn wo lɔngbɔn, nunkan-nya bi-loli. A kɔnɛ, nunkan-nya mogan-ni-loli.

²²A kila-kunna-konko wo, a wundannɛnu wo, a tɛɛnla muninyɛ ladan-nya wo, anu bɛɛ mani de iko tele-bɔɛ waralɛtɛ. Yɛlɛda wɔrɔnfila ye yɛlɛla kantɔ-tenbi-bolɔn kɛ ma. Kila-kunna-konko wo ye Bato-Bon-luyi wara la le.

²³Kata-burɛ, Bato-Bɔn luyima-tenbi-bolɔn ye nyɔ wara la le. Wo fanan mani de iko tele-bɔɛ tenbi-bolɔntɛ ye nya min. Ka a bi Bato-Bɔn luyima-tenbi-bolɔn ma ka a sigi kata-tenbi-bolɔn la, kei wo ya a suman nunkan-nya kɛmɛ.

²⁴Wo kɔma, kei wo tara n na dugula kata-tenbi-bolɔn wara la. Nyɔ-dandan-da-gbengbe wo, a kila-kunna-konko wo, wonubɛ doi wonu takɛn de!

²⁵Dugula-tenbi-bolɔn kɛ fanan wundannɛ tɛgɛnɛ a ma iko doi wonu. Tenbi-bolɔn kɛ lɔngbɔn, nunkan-nya bi-loli. A kɔnɛ, nunkan-nya mogan-ni-loli.

²⁶Wo fanan yɛlɛdɛ wɔrɔnfila. A kila-kunna-konko wo ye kata burɔ wara la. Tɛɛnla muninyɛ sanɛ dandan ma kilɛ la tenbi-bolɔn la.

²⁷Yan fanan, tenbi-bolɔn do labilanɛ Bato-Bon-luyi ma. Kei wo ya tenbi-bolon filɛ wo tɛmɛ suman. A bɛnta nunkan-nya kɛmɛ ma.

²⁸Kei wo ya n nabɔ dugulatɛ luyima-tenbi-bolɔn la ka ta n na Bato-Bon-luyi ma. A ya tenbi-bolɔn wo suman. Wonubɛ kata tenbi-bolɔntɛ rakɛn de!

²⁹A konkonu wo, a dandan-kɔrɔ wo, a burɔ-da-gbengbe wo, wonubɛ tenbi-bolɔntɛ bɛɛ kelen. Wundannɛ tɛgɛnɛ konko wonu fanan ma. A lɔngbɔn, nunkan-nya bi-loli, a kɔnɛ nunkan-nya mogan-ni-loli.

³⁰

³¹A dandan-kɔrɛ ye kata-burɛ wara la le. Tɛɛnla muninyɛ sanɛ tala dandan ma kilɛ la nyɔ. Yɛlɛda segin bi a ma.

³²Kei wo ya n nabɔ tele-bɔɛ luyima-tenbi-bolɔn la ka ta n na Bato-Bon-luyi ma. A ya tenbi-bolɔn wo suman. Anubɛ doi wonu takɛn de!

³³A konkonu wo, a dandan-kɔrɔ wo, a burɔ da-gbengbe wo, wonubɛ tenbi-bolɔntɛ bɛɛ rakɛn. Wundannɛ tɛgɛnɛ konko wonubɛ a dandan-kɔrɛ fanan ma. A lɔngbɔn, nunkan-nya bi-loli, a kɔnɛ nunkan-nya mogan-ni-loli.

³⁴A dandan-kɔrɛ ye kata burɔ wara la le. Tɛɛnla muninyɛ sanɛ tala dandan ma kilɛ la nyɔ. Yɛlɛda segin bi a ma.

³⁵Wo kɔma, kei wo tara n na kantɔ-luyima-tenbi-bolɔn la. A ya a suman. Anubɛ doi wonu takɛn de!

³⁶Konkonu bi wo fanan ma anubɛ tɛɛnla muninyɛnu anubɛ a dandan-kɔrɛ anubɛ wundannɛnu. A lɔngbɔn, nunkan-nya bi-loli, a kɔnɛ nunkan-nya mogan-ni-loli.

³⁷A dandan-kɔrɛ ye kata-burɛ wara la le. Tɛɛnla muninyɛ sanɛ tala dandan ma kilɛ la nyɔ. Yɛlɛda segin bi a ma.

³⁸Bon-nɛ do tugunnɛ Bato-Bɔn luyima-tenbi-bolɔn la kata burɔ kantɔ-wara la. Bon-nɛ wo don-dɛ bɛnnɛ wo dandan-kɔrɛ ma min yɛ lamununnɛ kata-burɛ la. Anu bi saraka-mintantɛnu kula nyɔ le.

³⁹Tebulu nani de bon-nɛ wo la. A tɔnkɔn kɛ fila, a tɔnkɔn kɛ fila. Anu si kolo-fen-sarakɛnu faga tebulu kɛnu denu kuma. A mara a saraka-mintanta la wo, a mara a hakɛ-saraka la wo, a mara a yiliki-saraka la wo, anu si wonu faga tebulu wonu denu kuma nyɔ.

⁴⁰Luyima-tenbi-bolɔn wo dandan-kɔrɛ dafɛ, tebulu nani bi nyɔ fanan. Filɛ ye a dɛ tɔnkɔn kelan tɔ, filɛ ye a dɛ tɔnkɔn doi fanan tɔ.

⁴¹Wo bɛɛ lakofunɛ, tebulu segin de, anu bi sarakɛnu fagala minnu kuma, nani ye bon-nɛ burɔ, nani ye kata burɔ.

⁴²Tebulu nanɛ minnu bi bon-nɛ la, wonu nadannɛ kuru-lɛsɛnɛ le la. Saraka-masɔlɛnu si saraka-mintantɛnu tabɛn wonu denu kuma. Anu kɔnɛ anubɛ anu lɔngbɔn, nunkan-nya kelen ani a tala. Anuna yanyɛ, nunkan-nya kelen. Anu si miran minnu bi ka sarakɛnu bɔ, wonu namaranɛ tebulu kɛnu denu kuma.

⁴³Tebulu wonu da-gbengbe, wo bɛnnɛ bolo-nɔlɔni loli ma. Sarakɛ bɛɛ si bɔ tebulu kɛnu denu kuma.[14]

⁴⁴Wo kɔma, a tara n na Bato-Bon-luyi ma. Bon-ni fila sɔnɛ Bato-Bon-luyi ma nyɔ. Kelen sɔnɛ kantɔ-don-dɛ wara la, a yɛ lamununnɛ dugu la. Kelen sɔnɛ dugula don-dɛ wara la, a yɛ lamununnɛ kantɔɛ la.

⁴⁵Kei wo ya a fɔ n ye ko bon-nɛ min yɛ lamununnɛ dugulɛ la, wo ye saraka-masɔlɛnu denuna ko la minnu bi wɔlila Bato-Bɔn la.

⁴⁶A ko bon-nɛ min yɛ lamununnɛ kantɔɛ la, wo ye saraka-masɔlɛnu denuna ko la minnu bi saraka-mintan-wɔli kɛla. Saraka-masɔlɛ kɛ bɛɛ bɔra Sedoki kebilɛ le tɔ. Anu denu denu dɔrɔn bi Lifayi kebilɛ rɔ minnu bɛnnɛ ka sɔ Mari yakɔrɔ wɔli-kɛ-tinɛ.

⁴⁷Kei wo ya Bato-Bon-luyi wo suman. A kɔnɛ anubɛ a lɔngbɔn, nunkan-nya kɛmɛ kɛmɛ. Bato-Bɔn sɔnɛ tele-yigi wara la luyi ma nyɔ. Saraka mintan tinɛ ye a yarɔ.

⁴⁸Wo kɔma, a tara n na Bato-Bon-dandan-kɔrɔ. A ya dandan-kɔrɛ wo da-gbengbe suman, a kɔnɛ bɛnta nunkan-nya loli-loli ma, a don-da-wɛ bɛnta nunkan-nya tan-ni-nani ma. A dandan min bi da-gbengbe wo kɔma, wo bɛnta nunkan-nya sawa sawa ma.

⁴⁹Dandan-kɔrɛ wo lɔngbɔn bɛnta nunkan-nya mogan ma. Wo kɔnɛ bɛnta nunkan-nya tan-ni-fila ma. Yɛlɛdɛ ya a labila dandan-kɔrɛ ma. Sɛnbɛrɛn-kɔn fila sɔnɛ don-da-wɛ wo la.