Read Kuranko Isikiyɛli 43 Bible Online

Isikiyɛli 43 - Kuranko bible

Isikiyɛli 43

¹Ko-rayirɛ kɛ rɔ, kei wo tara n na tele-bɔɛ tenbi-bolɔn la.

² N ke nyɔ, n ya Isirɛla mɔgɛnuta Allata wan-takani-belebele yen nala ka bɔ tele-bɔɛ wara la. Alla kuman-kan koloyanɛ iko wasa-belebele-tugu-kan. Waan rakara dugu-kole mumɛ kuma waran!

³N ya ko-rayirɛ kɛ le su yen iko n ya min yen wo tumɛ Alla nanɛ Yerusalɛm tinya-tinɛ, ado n ya wo su yen Kiba bɛ dafɛ wulɔn. N ya n naburun a ma dugi ma.

⁴Wan-belebele wo tenbira tele-bɔɛ warala tenbi-bolɔn wo la ka don Bato-Bɔn la.

⁵Marita Sɛnbɛ ya n bi ka ta n na Bato-Bon-lu-kole ma. N ya Bato-Bɔn lafanɛ yen Marita gbiliyɛ la.

⁶Kei wo sɔra n fɛ nyɔ. N ya Mari kuman-kan lamɔɛn Bato-Bɔn la nyɔ. A ya a fɔ n ye ko,

⁷“Ile hadama-dan, nta mansaya-waganɛ le bɔn kɛ la. N si sigi yan Isirɛla mɔgɛnu tɛma ka to anu kun na yan tolon! Ka bɛsɛnu kɔ wo, ka anuna mansɛnu togon yan bara la wo, wo do-wo-do ti n tɔgɔ-sɛnimɛ lafɛya tun, a mara a Isirɛla mɔgɔ la wo, a mara a mansa la wo.

⁸Fɔlɔ nun, mansɛnu bi anuna bolɔn yɛ bɛnnɛ ntɛ le ma, ado anu donnɛ anu nyɔgɔn tɔ le fanan. Dandan dɔrɔn de ma tɛma. Anu taranta ko-latinyanɛ minnu mala, wo mara tɔgɔ-tinya la nde bɛrɛn ye. Woletɔ n ya anu kasara nta yisi-bɔɛ la.

⁹Fɔ anu ba anu fara bɛsi-kɔ-koe la. Fɔ anu ni fara anuna mansɛnu togon-koe la nta Bato-Bɔn dala. Ni anu ya wo ma, n si to anu tɛma burubukai!”

¹⁰Wo kɔma, Mari ya a fɔ tun ko, “Ile hadama-dan, Bato-Bɔn kɛ wara-koe fɔ Isirɛla mɔgɛnu ye. Anu ni bɔn kɛ suman-nya rakaran. A ma, anu ni miliya anuna kɛ-nya-yogomɛnu na.

¹¹Wo kɔma, ni anu miliyara ka a tɛgɛ anu sɔn-yogomɛnuna ko ma, Bato-Bɔn kɛ wara-koe fɛsɛfɛsɛ anu ye a kila-bɛrɛbɛrɛ fɛ. A bɔn-sɔ-nya wo, a don-dɛ-ladan-nya wo, a bɔ-dɛ ladan-nya wo, a mabɛn-nya wo, a ko-nya mumɛ bɛɛ wo, a sereya anubɛ a bira-nya wo, i ni wo bɛɛ sɛbɛ anu ye alako anu ni a lɔn a ko-nya bɛɛ ye mala nya min. Wo kɔma, anu ni a lɔn fanan anu si a tɔnnu bira nya min.

¹²Bato-Bon-sereya le kɛ la. Bato-Bɔn sɔnɛ kɔnkɛ min kuma, wola foolɛ bɛɛ tɛrr, wo bɛɛ sɛninyani de!”

¹³Saraka mintan tinɛ suman-nya le kɛ la. Bato-Bɔn sumanta kɔlɔma min na, saraka-mintan-tinɛ fanan sumanta wo le la. Saraka mintan tinɛ wo lafoonɛ denkɛ la. A rayanyɛ, nunkan-nya kelen. A kɔnɛ, nunkan-nya kelen. Bɔnkɛ min nadɛnnɛ a da-gbole la tala, wola yanyɛ, nunkan-nya tala.

¹⁴Saraka mintan tinɛ wo faranɛ sigi-tina sawa la. A kɔrɔtɛla yanyɛ, nunkan-nya fila. A tɛmatɛ donnɛ a rɔ. Ka a bi a kɔrɔtɛ da-gbengbe ma ka ke a tɛmatɛ kuru-kɛ-tinɛ ma, nunkan-nya kelen de tala ala foolɛ bɛɛ rɔ. A tɛmatɛla yanyɛ, nunkan-nya nani. A kumatɛ donnɛ a rɔ fanan. Ka a bi a tɛmatɛ-da-gbengbe fanan ma ka ke a kumatɛ kuru-kɛ-tinɛ ma, nunkan-nya kelen de tala wola foolɛ fanan tɔ.

¹⁵A kumatɛ kɛla yanyɛ fanan, nunkan-nya nani. Anu bi sarakɛnu mintanna kɛ le kuma. A bolon nanɛ sɔnɛ a kuma a tonko nanɛ bɛɛ rɔ.

¹⁶Saraka mintan tinɛ wo kumɛ lɔngbɔn anubɛ a kɔnɛ, nunkan-nya tan-ni-fila, tan-ni-fila.

¹⁷ A tɛmatɛ kumɛ lɔngbɔn anubɛ a kɔnɛ, nunkan-nya tan-ni-nani, tan-ni-nani. A tɛmatɛ-da-gbengbe min nayɛlɛnɛ ala foolɛ rɔ, nunkan-nya tala le wo la. Denkɛ min nafoonɛ a tɛmatɛ wo la, wo kɔnɛ nunkan-nya kelen. Saraka mintan tinɛ wo yɛlɛdɛ ye yɛlɛla a tele-bɔɛ wara la le.

¹⁸N Tigi Mari ya a fɔ n ye ko, “Ile hadama-dan, n bi min fɔla i ye, i tole masɔ wo la. Saraka mintan tinɛ kɛ la wa ban, i si sarakɛnu mintan a kuma ka a dantɛgɛ nde, Mari ma. I ye sarakɛ minnu mintanna a kuma, i si wonu yele purupuru a tɔnkɔn ma.

¹⁹Lifayi saraka-masɔlɛ minnu bɔra Sedoki kebilɛ rɔ, wonu denu dɔrɔn si na n yakɔrɔ ka nta wɔlɛ kɛ. Nde, Isirɛla Tigi Mari kan le kɛ la. Ile si tura-bulan di anu ma ka wo ma hakɛ-sarakɛ la.

²⁰I si wo yele do bi ka a kɛ saraka-mintan-tinɛ bolon nanɛ wonu ma anubɛ a tɛmɛ tonko nanɛ fanan anubɛ a da-gbengbe mumɛ bɛɛ. I ye saraka-mintan-tinɛ wo dantɛgɛla ka le ka a sɛninya.

²¹Turɛ wo min bi hakɛ-sarakayɛ la, i si wo bi ka a mintan a kan-tina-yabɔnɛ rɔ kata kɔma.

²²Wo banda kɛ, i ni baa-kɔrɔn bi, fɛɛ sa min na ka wo fanan ma hakɛ-sarakɛ la. I si saraka-mintan-tinɛ wo sɛninya a yele la iko i ya a ma tura yele la nya min.

²³I wa ban wo la, i ni tura-bulan anubɛ saga-yigi do bi fanan, fɛɛ sa minnu na, kɔni,

²⁴ka na wonu na nde, Mari ma. Saraka-masɔlɛnu si kɔgɛ purupuru anu ma ka anu mintan kɔ-fenyɛ la n ye.

²⁵Tele wɔrɔnfila dɛgɛdɛgɛ, wo ni saraka-subolo sawɛ kɛnu bɔ n ye. Baa wo, tura wo, saga-yigi wo, wonu bi hakɛ-sarakayɛ le la. Fɛɛ kana taran wonu fenfen na.

²⁶Tele wɔrɔnfilɛ wo kɔrɔ, saraka-masɔlɛnu bi saraka-mintan-tinɛ dantɛgɛla alako a ra ni bɛn ala wɔlɛ-koe la.

²⁷ A tele segin nyɔgɛ ma, mɔgɛnu si saraka-mintantɛnu anubɛ yisi-kima-sarakɛnu bɔɛ fɔlɔn wulɔn ka wonu don saraka-masɔlɛnu bolo. Wo kɔma, wo wara-koe ni na to n hɛnɛna. Nde, wo tigi Mari kan le kɛ la.”