Read Kuranko Isikiyɛli 44 Bible Online

Isikiyɛli 44 - Kuranko bible

Isikiyɛli 44

¹Ko-rayirɛ kɛ rɔ, kei wo tara n na kata burɔ tenbi-bolɔn tele-bɔɛ wara la. N ya a taran, tenbi-bolɔn wo don-dɛ latogonnɛ.

²Mari ya a fɔ n ye ko, “I ni don-dɛ kɛ latogonnɛ to, ado a la ti ka tun. Hadama-den fenfen ti bɔ nyɔ tun bawo nde, Isirɛlata Mari Alla donta nyɔ le nun. A latogonnɛ ni to dɛɛ!

³Kɔnɔ dɛ latogonni kɔmɛ, n si mansɛ do sigi anu kun na min si dɔn-fen-sɛnimɛnu dɔn n yala nyɔ. A si don-ni-bɔ kila-kunna-konko la min bi tenbi-bolɔn wo burɔ.”

⁴Tenbi-bolɔn min bi kantɔ-wara la, kei wo ya n bi ka n nabɔ nyɔ ka ta n na Bato-Bɔn yakɔrɔ. N ya n yɛ lata ka Mari Bato-Bɔn mafɛlɛn. N ya a yen, a lafanɛ Marita waan la pen! N ya n naburun a ma dugi ma.

⁵Mari ya a fɔ n ye ko, “Ile hadama-dan, i ye min tayenna i yɛ la wo, i ye min namɔɛnna i tole la wo, i hɛnkili ni to wonu ko. N bi Bato-Bon-tɔnnu bara-koe fɔla i ye. Mɔgɛ minnu ni don wo, a ma bɛn minnu ni don wo, a bɛnnɛ, i ni i yili to tɔn wonu ko.

⁶“I ni a fɔ Isirɛla mɔgɔ-murutiyanɛ wonu ye ko nde, anu Tigi Mari ti sɔn anuna kisimiriya koe wonu ma muk!

⁷Saraka-masɔlɛnu tenbi kɛɛnnu anubɛ yele bɔla n ye sarakayɛ la tumɛ min, Isirɛla mɔgɛnu bara nta Bato-Bɔn latinya ka sɔn sibolo-gbɛrɛ-kemininyabɛlɛnu ni don nyɔ, ado sibolo-gbɛrɛ wonu tolo gbere kati! Nna mɔgɛnu bara sarama-kan tinya ma tɛma ka a tɛgɛ anuna kisimiriya-ko-ladannu ma.

⁸A bɛnta, anu denu ni wɔlɛ min kɛ nna Bato-Bɔn la, anu ya wɔlɛ wo gbala sibolo-gbɛrɛ wonu bolo la.

⁹“Nde, Isirɛla Tigi Mari ara a gbɛ ko sibolo-gbɛrɛ wo sibolo-gbɛrɛ ti a kunyɛ ladon nna Bato-Bɔn la tun, katarala kemininyabɛlɛ-tolo-gbere kɛnu ma. Hali minnu siginɛ wole Isirɛla mɔgɛnu tɛma, wonu ti don.”

¹⁰Mari ya a fɔ n ye ko, “N bi Lifayi bɔnsɔn kɛnu tɔrɔla anubɛ Isirɛla mɔgɛ minnu bara anu ban nde la ka don bɛsi-kɔ-koe rɔ.

¹¹Kɔnɔ anu si ma nna Bato-Bɔn don-da-makandannɛnu na. Anu si Bato-Bon-wɔlɛ donu kɛ. Mɔgɛnu bi nala saraka-mintantɛ anubɛ sarakɛ doi minnu na, anu si kolo-fan wonu faga. Anu si wɔli mɔgɛnu ye nyɔ fanan.

¹²Kɔnɔ anu ya Isirɛla mɔgɛnu nadon hakɛ rɔ ka anu don bɛsi-kɔ-koenu tɔ min kɛ, woletɔ nde, anu Tigi Mari wara ban a latɛgɛla ko fɔ anu ba tɔrɔ.

¹³Anu ti saraka-masɔ-wɔlɛ kɛ n ye tun. Anu ti anu gbɛrɛn fen-sɛninyanɛ ma tun, ado anu ti don Sɛnima-Sɛnima-Tinɛ rɔ tun. Bawo anu bara kisimiriya-koe minnu nadan, wo le ya a to, n bi anu tɔrɔla wo nya na.

¹⁴Woletɔ n bi Bato-Bon-wɔli-buruburunɛ kɛnu dila anu ma.”

¹⁵Ma Tigi Mari ko, “Isirɛla mɔgɛ toenu ya anu ban n na tumɛ min, Lifayi saraka-masɔlɛ minnu bɔra Sedoki kebilɛ rɔ, wonu denu ya nna wɔlɛ kɛ n ye nta Bato-Bɔn la a kila-bɛrɛbɛrɛ fɛ. Kaka, anu denu denu bɛnta ka don nna Bato-Bɔn la ka wɔlɛ kɛ n ye. Anu denu si kɛɛn anubɛ yele bɔ n ye sarakayɛ la.

¹⁶Anu denu denu dɔrɔn bɛnta ka don nna Bato-Bɔn la ka wɔlɛ kɛ saraka-mintan-tinɛ. Anu denu denu bɛnta ka n bato-koe rabɛn nna Bato-Bɔn la.

¹⁷ Anu tenbi donna Bato-Bon-luyi ma, anu ni linɛn-kurɛ don anu kan na, saraka-masɔya-kurɛ, kɔni. Anu tenbi Bato-Bon-wɔlɛ kɛla, anu bi Bato-Bon-luyi ma wo, anu bi bɔn la wo, anu kana fenfen don anu kan na min nadannɛ saga-siyi la.

¹⁸Anu ni linɛn-kurɛ fulɛ mini anu kunyɛ la anubɛ linɛn-kurusi-kundi, alako wusi kana yigi anu ma.

¹⁹ Yanni anu ni bɔ Bato-Bon-luyi ma ka sɛgi kata burɔ, fɔ anu ba Bato-Bon-wɔli-kɛ-kurɛnu bɔ anu ma ka wonu to Bato-Bɔn la konko-sɛnimɛ wonu na. Anu ni duruku-gbɛrɛkɛ don anu kan na alako Bato-Bon-kurɛ kɛnu kana fɛɛ sa mɔgɛnu na.

²⁰“Saraka-masɔla fenfen kana a kunyɛ sii, ado anu kana anu kunyɛnu nagbiri wɛ kɛ. Bɛɛ ni a kunyɛ matɛgɛ a kila-bɛrɛbɛrɛ fɛ.

²¹ Yanni a ni don Bato-Bon-luyi ma, saraka-masɔla fenfen kana gbɛɛ min.

²² Saraka-masɔla fenfen kana musi furu min bara bɔ kei-gbɛrɛkɛ bolo. Fɔ a ni Isirɛla sunkurun-nasolonɛ furu, ni wo ma, saraka-masɔlɛ dola musu-tonɛ.

²³ “Saraka-masɔlɛnu bɛnta, anu ni nna mɔgɛnu karan ka ko-sɛninyanɛ anubɛ ko-sɛninyabɛlɛ dan-natɛgɛ lɔn iko tɔn ya a fɔ nya min. Anu ni a lɔn Allatɛ ye min na anubɛ mɔgɛnutɛ ye min na.

²⁴Ni a taranta kɛlɛ-nyɔgɔnyɛ do ye nyɔ ka a tɛgɛ tɔn-tinya-koe ma, saraka-masɔlɛnu bɛnta ka kiti wo tɛgɛ iko nta tɔn ya a fɔ nya min. A bɛnta, anu ni nna ladiyɛnu kɛ a kila-bɛrɛbɛrɛ fɛ iko tɔn ya a fɔ nya min ka Sulen-Tele bira ka a gbiliya.

²⁵ “Saraka-masɔla fenfen kana a gbɛrɛn furi ma bawo wo si a latinya. Fɔ ni a mara a na la, ni wo ma a fa, ni wo ma ala dan, ni wo ma a na-kelen-nyɔgɔ-keimɛ do, ni wo ma, a tirisan-musi min sa kei bolo.

²⁶A wa ban sɛninyala, fɔ a wa tele wɔrɔnfila bɔ

²⁷yanni a ni to donna Bato-Bon-luyi ma ka sarakɛ bɔ a nyɛrɛ ye a sɛninya-koe la. Wo si a ma, a ni to wɔlila Bato-Bɔn la tun. Nde, wo Tigi Mari kan le.”

²⁸ “Saraka-masɔlɛnu kɛɛ le saraka-masɔ-wɔlɛ kɛ la n ya min di anu ma, ado anu bi wɔlɛ kɛ le tola anu kegeyɛnu bolo. Anu ti anu halala-dugu fenfen sɔrɔn. Anu mako-nyinyalɛ le nde kelen pe la.

²⁹Saraka-dɛgɛnu wo, hakɛ-sarakɛnu wo, yiliki-sarakɛnu wo, wonu denu bi mala saraka-masɔlɛnuta beli-fan la. Hali min bɛɛ dantɛgɛnɛ nde, Mari ma Isirɛla nyamanɛ rɔ, anutɛ le wo bɛɛ la.

³⁰Anutɛ le dɔn-fen-kun-fɔlɔ-hakikɛ bɛɛ la anubɛ anu bi fan min dama dila nde, Mari ma. Mɔgɔ-wo-mɔgɔ wa biredi mintan, a fɔlɔtɛ, saraka-masɔlɛtɛ le wo la. Ni mɔgɔ-wo-mɔgɔ ya wo ma, nna duwɛ ti bɔ wola bɔn la.

³¹ Saraka-masɔlɛnu kana yifa-wo-yifa dɔn, a mara koni la wo, a mara sogo la wo. Hali a tɔgɔ tora sogo-gbɛrɛkɛ le la, anu kana wo dɔn.”