Read Kuranko Isikiyɛli 46 Bible Online

Isikiyɛli 46 - Kuranko bible

Isikiyɛli 46

¹Ma Tigi Mari ko, “Tenbi-bolɔn min bi Bato-Bon-luyi tele-bɔɛ waralɛ rɔ, mɔgɛnu bi wɔlila tele wɔrɛ minnu kɔrɔ, don-dɛ wo latogonnɛ ni to tolon! Kɔnɔ Sulen-Tele anubɛ Karɛ-Tele-Fɔlɛ-Ladɛn ma, a lakanɛ ni to.

²Mansɛ si ta kata burɔ ka ta a sɔ luyima-tenbi-bolɔn dandan-kɔrɔ sɛnbɛrɛn-kɔn fɛ. Saraka-masɔlɛnu tenbi saraka-mintantɛnu anubɛ yisi-kima-saraka-bɔɛ kun na, a sɔnɛ nyɔ. Ale ye batoli kɛla don-dɛ la nyɔ le, yanni a ni bɔ. Anu ti don-dɛ wo latogon fɔɔ wurɛ la.

³Sulen-Tele wo Sulen-Tele, Karɛ-Tele Fɔlɔ wo Karɛ-Tele Fɔlɔ, mɔgɛnu si anu madu ka Mari bato tenbi-bolɔn wo kɔrɔ.

⁴“Sulen-Tele ma, mansɛ wo si na saga-den wɔrɔ anubɛ saga-yigi kelen na, fɛɛ sa minnu na ka wonu ma saraka-mintantɛnu na.

⁵A wa na saga-yigi la tuma-wo-tuma, a si na dɛgɛ-munke pani-kunbɛ-nya tan na a bolo. A ye nala saga-dan min bɛɛ la, dɛgɛ-munke fenfen nyɔgɔn diyara a ye, a si na wo la. Ni a nara dɛgɛ-munke pani-kunbɛ-nya tan la, fɔ a wa na tulu-kilasi-nya tan-ni-wɔrɔ la.

⁶Karɛ-Tele Fɔlɛ-Ladɛn kuma, mansɛ si tura-bulun kelen anubɛ saga-den wɔrɔ anubɛ saga-yigi kelen bɔ ka anu ma sarakɛ la, fɛɛ sa minnu na.

⁷A ye turɛ anubɛ saga-yigi minnu bɔla, fɔ a ni dɛgɛ-munke pani-kunbɛ-nya tan-tan sa wo bɛɛ kuma. A ye saga-dan minnu bɔla, dɛgɛ-munke min nyɔgɔn diyara a ye, a ye wo le sala saga-dan wonu kuma. A wa ban pani-kunbɛ-nya tan bɔla, a si tulu-kilasi-nya tan-ni-wɔrɔ tan-ni-wɔrɔ sa wo fanan kuma.

⁸Mansɛ wo wa wuli bɔla tenbi-bolɔn la, a donta gbere min fɛ, a ye bɔla gbere wo le fɛ.

⁹“Mɔgɛnu ba na Mari bato-tinɛ ladiya-wo-ladiya rɔ, minnu ba don kantɔ-tenbi-bolɔn la, wonu si bɔ dugula-tenbi-bolɔn la. Minnu ba don dugula-tenbi-bolɔn la, anu ba ban batoli kɛla, wonu si bɔ kantɔ-tenbi-bolɔn le la. Mɔgɔ-wo-mɔgɔ ti bɔ a gbere fɛ a donta kan min.

¹⁰Mɔgɛnu bi donna wati min, mansɛ fanan bi donna wati wo le. A ye a mala wo nya na le fanan, anu tenbi bɔla.

¹¹Ladiya-sɛnimɛ anubɛ ladɛn doinu kuma, ni min ya turɛ wa saga-yigi bɔ, wo tigi si dɛgɛ-munke pani-kunbɛ-nya tan sa a kuma anubɛ tuli kilasi-nya tan-ni-wɔrɔ. Ni min ya saga-dan bɔ, dɛgɛ-munke fenfen diyara a ye, a ye wo le nyɔgɔn bɔla anubɛ tulu-kilasi tan-ni-wɔrɔ tan-ni-wɔrɔ dɛgɛ-munke-nya tan-tan.

¹²“Ni mansɛ ye saraka-mintantɛ anubɛ yisi-kima-sarakɛnu dila Mari ma a hɛnikɛ la, anu si tele-bɔɛ luyima-tenbi-bolɔn laka a ye. A si hɛniki-sarakɛ wonu bɔ iko a ya Sulen-Teletɛ ma nya min. A wa bɔ, anu si tele-bɔɛ don-dɛ wo latogon a kɔma.”

¹³Mari ko, “Sɔgɔma-wo-sɔgɔma san-kelen-saga-dan si ma sarakɛ la, fɛɛ sa min na. Wo mumɛ si ma saraka-mintantɛ la nde, Mari ye. A si to kɛ mala tele-wo-tele.

¹⁴Wo kɔma, anu si dɛgɛ-munke pani-kunbɛ-nya fila bɔ fui-fen-sarakayɛ la ka a ramaga tulu-kilasi-nya nani na. Wo si sa saga-dan kuma. Nde, Marita saraka-bɔ-nya kɛnu si ma tɔn la wo ye habadan!

¹⁵Saga-den wo, dɛgɛ-munku wo, tulu wo, wonu si to mala sɔgɔma-sarakɛnu na nde, Mari ye burubukai!”

¹⁶Ma Tigi Mari ko, “Ni mansɛ ya a halala-dugi do tɛgɛ a la ka a di ala den-kei do ma, dugi wo si ma dan wota kɛɛ-dugi la.

¹⁷ Kɔnɔ ni mansɛ wo ya ala dugi do di ala wɔli-kɛlɛ do ma, Halala-Fan-Lasɛgi-San wa ke, dugi wo si sɛgi mansɛ ma tun. Dugi wo la si sɛgi mansɛ anubɛ ala dannu ma. Anutɛ dɔrɔn de wo la.

¹⁸Mansɛ kana bui mɔgɛ ma ka a halala-dugi bi a bolo. Ni a ye dugi min dila ala dannu ma, fɔ a ni ma a halala-dugu-bɛrɛbɛrɛ la. Wo si a ma, a ti nde, Marita mɔgɛnu yakɔrɔ-mamɔ dugu-wara-koe la.”

¹⁹Wo kɔma, luyima-tenbi-bolɔn min bi Bato-Bɔn dugula wara la min yɛ lamununnɛ kantɔ-wara la, kei wo tara n na nyɔ ko-rayirɛ wo rɔ. A ya konko-sɛnimɛnu yira n na minnu bi saraka-masɔlɛnuna ko la. A ya kan-tinɛ do yira n na konko wonu tele-yigi wara la.

²⁰A ya a fɔ n ye ko, “Yiliki-saraka wo, hakɛ-saraka wo, kan-tinɛ le kɛnu na saraka-masɔlɛnu si anuta niyi le te kan min. Anu si to anuna dɛgɛ-munke biredi mintanna yan fanan. Wo si a ma, ni fenfen-sɛninyanɛ, wo ti ta mɔgɛnu tɛma kata burɔ a si fɛɛ sa mɔgɛnu na kan min.”

²¹Wo kɔma, a tara n na kata burɔ. A ya kata wo tonko nanɛ yira n na, lu-nɛnu bi kan min. Lu-kole wo kelen-kelennamɛ-bɛɛ lɔngbɔn nunkan-nya bi-nani bi-nani. Wonu kɔnɛ nunkan-nya bi-sawa bi-sawa.

²³Anu nafoonɛ dandan la minnu nadannɛ kuri la. Ta-kɔnɛnu nadannɛ dandannu bara la.

²⁴Kei wo ya a fɔ n ye ko, “Bato-Bɔn yalamayɛ-kɛ-tinɛ le kɛnu na, Bato-Bɔnna wɔli-kɛlɛnu si mɔgɛnuna sarakɛnu te kan min anuta niyi, kɔni.”