Read Kuranko Isikiyɛli 47 Bible Online

Isikiyɛli 47 - Kuranko bible

Isikiyɛli 47

¹ Ko-rayirɛ wo rɔ, kei wo sɛgira n na Bato-Bɔn don-dɛ la. Yi ye bɔla don-dɛ kɔrɔ ka yigi tele-bɔɛ wara la, Bato-Bɔn yɛ lamununnɛ kan min, kɔni. Yi wo kunyɛ ye Bato-Bɔn dugula wara la le. A ye tenbila saraka-mintan-tinɛ dugu la wara la.

²Wo kɔma, kei wo bɔra n na kantɔ-tenbi-bolɔn la. A tara n na fɔɔ tenbi-bolɔn min bi tele-bɔɛ wara la. N ya yi-nɛ yen yigila ka bɔ tenbi-bolɔn wo dugula wara la.

³A ya ala fen-suman-kɔlɔma wo bi ka bɔ yi wo sumanna nyɔ rɔ. A ya yi wo nunkan-nya waga kelen suman yi wo dugu la tele-bɔɛ wara la. N ke nyɔ, a ko n ni yigi yi rɔ nyɔ. Yi wo ya n bira n wɔlɔkɛ ma.

⁴Wo kɔma, a ya a nyɔgɔn waga kelen suman tun. Nyɔ ya n bira n kunbelan ma. A ya a nyɔgɔn waga kelen suman tun. Yi wo ya n bira n lenkan ma.

⁵A waga nani nyɔgɛ sumɛ a bolo, n kian ma ke nyɔ-kole la. Fɔ n ya n bɔn a ma le ka ba-matɛgɛlɛ kɛ.

⁶A ya a fɔ n ye ko, “Ile hadama-dan, i yili to koe kɛnu ko a kila-bɛrɛbɛrɛ fɛ.” Wo kɔma, kei wo ya n bi tun ka sɛgi n na bɛ wo kɔnkɔn dɛ fɛ.

⁷N ke nyɔ, n ya kɔlɔma-siyaman taran bɛ wo tɔnkɔn filɛ rɔ.

⁸A ya a fɔ n ye ko, “Bɛ kɛ ye tala le ka nyamanɛ ratɛgɛ kasan, ka ke Yorodan-ba-lɛɛ ma ha ka ke Dalɛ Faganɛ ma. A wa ke Dalɛ Faganɛ wo ma, a si kɔgɔ-yi wo yɛlɛma yi-nyimɛ la.”

⁹A ko, “Yi kɛ tara kan-bo-kan, i si yɛgɛ anubɛ sogo-su bɛɛ taran nyɔ. Yi wo si Dalɛ Faganɛ ma yi-nyimɛ la. A tara kan-bo-kan, a si fan bɛɛ lakanan.

¹⁰Ka a bi Ɛngidi tenke ma, ha ka ta sigi Ɛnɛgilayim tenke la, nyɔ ra ti kolonya yɛgɛ-biralɛnu na. Anu si anuta yalɛnu tagbala nyɔ. Yɛgɛ-subolo-siyamɛ minnu bi Mɛdetereniyan kɔgɔ-yi rɔ, wonu subole bɛɛ si taran Dalɛ Faganɛ rɔ fanan.

¹¹Dala kuma-kinɔgɔnɛ anubɛ yi-nɛ minnu bi ale Dalɛ Faganɛ dafɛ, anu si to kɔgɔ-yiyɛ la. Nyɔ si to mala mɔgɛnuna kɔgɔ bi tinɛ la.

¹² Kɔlɔma minnu bi bɛ wola foolɛ rɔ, wonu si to gbɔla tisikiri! Anu yanba-kunyɛ ti gbala, ado anu gbɔɛ ti dasa anu na ka a tɛgɛ yi-nɛ wo ma min bi bɔla Bato-Bɔn kɔrɔ. Karɛ-wo-karɛ, anu si anu gbɔ-kurɛ sigi anu na. Kɔlɔma wonu si dɔn-fan labɔ nima-fannu ye, ado anu yanba-kunyɛ si ma bɛsɛ la mɔgɛnu ye.”

¹³Ma Tigi Mari ko, “Dugi min bi talala wole Isirɛla bɔnsɔn tan-ni-filɛ tɛma, wo dan le kɛnu na, ado Yusufu bɔnsɔn ye kan-tina fila le sɔrɔnna nyamanɛ kɛ rɔ.

¹⁴Nde, Mari ara lanyiri kiri wo benbanu ye ko a si dugi kɛ di wo ma. Wo ni a tala wo nyɔgɔn na a kilɛ fɛ.

¹⁵“Nyamanɛ-kantɔɛ-dan si a fɔlɔ Mɛdetereniyan kɔgɔ-yi ma ka ta tele-bɔɛ wara la ka a sigi Hɛtilɔn soe la ka tenbi Hamati kɔnkɔ-gbɛran rɔ ha ka ke Sidadi soe ma.

¹⁶Wo kɔma, wo le ye tala a labilala Bɛrotati soe anubɛ Sibarayim soe ma. (Soe wonu bi Damasika anubɛ Hamati nyamanɛnu tɛma le.) Wo kɔma, dan wo le kunyɛ tara a labɔ Tikɔn soe ma min bi Hɔran sigisɔn dan la.

¹⁷Nyamanɛ-kantɔɛ-dan min ya a dabira Mɛdetereniyan kɔgɔ-yi ma, dan wo tara tele-bɔɛ wara la furr, ha ka ke Hesa-Inan soe ma. Damasika anubɛ Hamati nyamanɛ-dan ye dan kɛ kantɔ-wara la le.

¹⁸“Kan-tinɛ do rɔ Damasika soe anubɛ Hɔran sigisɔn tɛma, dan min bi tele-bɔɛ wara la, wo le yigira a ma ka na a labila Yorodan bɛ ma. Isirɛla nyamanɛ ye bɛ tele-yigi wara la le. Kaliyadi nyamanɛ fanan bi bɛ tele-bɔɛ wara la ha ka ke Tama soe ma Dalɛ Faganɛ kɔma.

¹⁹“Dugula-dan ya a dabira Tama soe ma ka ta tele-yigi wara la ha ka a sigi Sɔnkɔ-sɔnkɔ tenke la min bi Kɛdɛsi-Mɛriba soe dala. Wo kɔma, a bilara Iyipiti dan fɛ yɛlɛla ha ka ta sigi Mɛdetereniyan kɔgɔ-yi ma.

²⁰“Tele-yigi-warala-dan mara Mɛdetereniyan kɔgɔ-yi la. A tele-yigi-dan min bi kantɔ-wara la, wo ye Hamati kɔnkɔ-gbɛran tele-yigi wara la le.

²¹“Wo ni dugi kɛ fara wo nyɔgɔn tɛma iko wola sibolenu bi nya min.

²²A ni ma wo halala-nyamanɛnu na tolon! Sibolo-gbɛrɛ minnu siginɛ wo tɛma, ado min bara dannu sɔrɔn wo tɛma nyɔ, wonu fanan ni anuta nyamanɛ sɔrɔn. Wo ni anu bira iko wo ye Isirɛla mɔgɛnu birala nya min. Wonubɛ Isirɛla mɔgɛnu ni korɔn lakɛ wo nyɔgɔn tɛma ka dugi ratala.

²³Sibolo-gbɛrɛ minnu bi wo tɛma, wonu ni anuta dugi sɔrɔn wole dugurannu tɛma anu siginɛ bɔnsɔn-mɔgɛ minnu fɛ.” Ale ma Tigi Mari kan le kɛ la.