Read Kuranko Isikiyɛli 5 Bible Online

Isikiyɛli 5 - Kuranko bible

Isikiyɛli 5

¹Mari ya a fɔ n ye ko, “Ile hadama-dan, ila faan damɛ bi ka i kunyɛ anubɛ i buyɛ sii wo la. I wa ban, i ni wo suman ka a tala sigi-tina sawa la.

²Kɛlɛ wa ka-a-la ila so-ladannɛ wo rɔ, i ni i kun-sigi, sigi kelan bi ka a mintan nyɔ. A sigi kelan, i ni wo ratɛgɛ gbede-gbede, ila faan wo la soe wola foolɛ rɔ. A sigi kelan min tonɛ, i si wo ranyɛnsɛn. Fɔnyɔ ni ta a la bawo nde, Mari si Isirɛla mɔgɛ wonu sagaran nta faan la.

³Kɔnɔ i ni i kun-sigi wo pɛtɛ-pɛtɛni nagburu ila duruku-bolɔn la.

⁴Wo kɔma, i ni doni bɔ a la ila duruki wo la ka wonu sa tɛ rɔ. Kɛ si ma tamasere la ko tɛ si bira nyɔ le kibɔ, ha a ni Isirɛla bɔnsɔn-mɔgɛnu mintan.

⁵“Nde, i Tigi Mari Alla ko, ‘I ma Yerusalɛm soe yen? N ya a sɔ sibolenu tɛma nun. Nyamanɛ bɛɛ tora ala foolɛ rɔ.

⁶Kɔnɔ Yerusalɛm mɔgɛnu bara murutiya nna tɔnnu ma. Wo ara a yira n na ko anu wunduyogo sibole doinu ko. Tɔn-tinya di anu ye ka tenbi sibolo-gbɛrɛ doinu na minnu bi anuna foolɛ rɔ. Yerusalɛm mɔgɛnu bara anu kan-kɔ sɔ nna tɔnnu na. Anu ma sɔn nna tɔnnu birala mumɛ!’

⁷“Woletɔ i ni n kan latenbi Yerusalɛm kɛnu ma. Wole Yerusalɛm kɛnu, wo ni wo tole masɔ nde, wo Tigi Mari Alla kan la. Wo ara wo ban nna tɔnnu birala min kɛ, wo ara n yakɔrɔ-mamɔ ka tenbi sibole doinu na. Wo ara sibolo-gbɛrɛ doinuna namunu bi.

⁸Woletɔ nde, wo Tigi Mari Alla ye a fɔla wo ye ko wo yoge le nde la gbɛ! N bi wo kitila duninya tɛma le.

⁹Wo ye n gboyana-koenu mala min kɛ, woletɔ n bi tɔrɔyɛ min sigila wole Yerusalɛm kɛnu ma, ha bi, n ma wo nyɔgɔn ma wɛ, ado n ti wo nyɔgɔn ma tun!

¹⁰ Ka a tɛgɛ tɔrɔyɛ wo ma, denbɛnu si anuna dannu dɔn Yerusalɛm soe burɔ. Dannu fanan si anu sɔrɔnnɛnu dɔn. N si wo tɔrɔya ha ni minnu tora anu niyi la, wonu ta si nyɛnsɛn.

¹¹“Woletɔ nde, wo Tigi Mari ko wo ara n Bato-Tinɛ latinya kisimiriya-ko-ladan la. Fananta n bi n niyi la, fɔ n ba wo malanfan de serr! Hali wola hinɛ pe, a ti don n tɔ!

¹²Wole Yerusalɛm kɛnu tatalanɛ sigi-tina sawa la, a tɔnkɔn kelan si to kirayɛ anubɛ kɔnkɛrɔ-soe burɔ. A tɔnkɔn kelan, wonu kundu si bɔ faan la soe kɔma. A tɔnkɔn kelan fanan ta si nyɛnsɛn kesemeren, iko fɔnyɔ wa ta fen na. N si wo sagaran faan la.

¹³“Wo si nna yisi-bɔɛ sɛnbɛ-dan lɔn ha wo tɔrɔya-nya ni n hɛnɛ. Wo wa ma, wo ti tɛrɛna wo la ko nde, Mari le wara kuma. N yisi ara bɔ ka a tɛgɛ wola telenbɛlitayɛ ma.

¹⁴Sibolo-gbɛrɛ minnu tenbi tenbila wo la, wonu bi nyimala wo rɔ ka anu masɛgi wo la.

¹⁵“Nde, Mari wa diminya wo ma ka wo tɔrɔ, sibolo-gbɛrɛ minnu bi wola foolɛ rɔ, wonu kun ma si kɔ. Anu si nyima wo rɔ ka wo rasɛ.

¹⁶N si kilɛ tɛgɛ wola dɔn-fen-koe ma ka wo lakɔnkɔ. Kɔnkɛ si wo dumɛ wo buyi rɔ iko kalabɛn tenbi mɔgɛ rɔ wo ye tɔrɔla nya min.

¹⁷ N si kɔnkɛ anubɛ sogo-feremɛnu natuntun wola dannu ma. N si kɛlɛ anubɛ kiraya-fitinɛ lana wo kuma. Nde, Mari kan le kɛ la, yɔ!”