Read Kuranko Daniyɛli 10 Bible Online

Daniyɛli 10 - Kuranko bible

Daniyɛli 10

¹Pasiya Mansa Sairasila mansayɛ san sawa nyɔgɛ ma, Alla ya koe do yira nde, Daniyɛli la. N tɔgɛ le fanan Bɛlitisasa. Sarakanɛ wo, tonyɛ le kɔnɔ a ragbɛ ma di. Yanni n ni kɛ nya-yen, Mari ya ko-rayirɛ kɛ n ye.

²Wati wo ya n taran, n bi diyi kɛ kun na lɔgɔkun sawa kɔrɔ.

³N ma dɔn-fen-nyima fenfen dɔn. N ma soge dɔn. N ma baan-wo-baan min ka n tabɛn a kilɛ fɛ ha lɔgɔkun sawɛ wo banta.

⁴San wo karɛ fɔlɛ, a tele mogan-ni-nani nyɔgɛ ma, n tora sɔni Takarasi ba-wɛ dafɛ.

⁵ N ya n yɛ lata ka melika sɔnɛ yen iko hadama-dan, linɛn-kurɛ bilanɛ a kan na, a buta kirinɛ sɛnɛ-hakikɛ la.

⁶A fɛrɛ malan-malannɛ a ma iko kuru-da-gbɛlɛ. A yakɔrɔ-mɛnsan ye tiila a ma iko san-sɛran. A yɛ ye malanna iko tɛ. A bole anubɛ a kian ye malanna iko anu ba silɛɛ yesi. A kuman-kan manɛ iko sɛrɛ-ladɛnnɛ-kan.

⁷Nde, Daniyɛli le kelen pe yɛ latiira kɛ ma. Kɔnɔ minnu bi n fɛ, wonu fenfen ma kɛ yen. Kɔnɔ hali wo, anu kumakɔra ka anu buri tala anu dogon tinɛ.

⁸Wo le ya a to, n kelan tora sɔni ko-makawanɛ kɛ mafɛlɛn tinɛ. N mɔlɔkɔnta kilan bolo. N yakɔrɛ sisira.

⁹Ale mɔgɔ-makawanɛ kɛ kan lamɔɛn n bolo, n kirɔnta-a-la. N naburunta a ma dugi ma.

¹⁰Wo kɔma, mɔgɛ do ya n nawuli a bole la. N burunnɛ tora n bole tɔ. Hali wo, n tora yɛrɛyɛrɛnna kilan bolo.

¹¹Melika wo ya a fɔ n ye ko, “Ile Daniyɛli, i di Alla ye. I lasɔ. I ni i tole masɔ n kuman-kan kɛ la n bi min fɔla i ye. Alla le ya n sɔ i wara.” Wo ban kɛ fɔla, n ya n nasɔ kɔnɔ ha bi, n bi yɛrɛyɛrɛnna.

¹²A ko, “Daniyɛli, i kana kilan. Ka a bi a fɔlɔfɔlɛ rɔ, i ya i famayigi alako i ni ko-rayen kɛ kɔrɛ lɔn, Alla ya ila matarali-kan wo lamɔɛn. Nde fanan bara na alako ila mataralɛ ni yabi.

¹³ Tele mogan-ni-kelan kɔrɔ, Pasiya nyamanɛ nyina-yogomɛ ya kilɛ tɛgɛ n ma. Melika kun-tigi do min tɔgɛ Maikali, wo tara n dɛnbɛn tinɛ bawo n kelan le wara to Pasiya nyamanɛ rɔ wo wati rɔ nun.

¹⁴Wo le ya a to, n bara na alako i ni a lɔn min bi nala mala ila mɔgɛnu na yarɔ. I ye ko-rayen min tayenna kɛ la, sinan-ko-rayen le wo la.”

¹⁵Nba, a ban kɛ fɔla, n ya n kunyɛ layigi, ado n ma ke kumala tun.

¹⁶Wo kɔma, melika min sɔnɛ n dafɛ nun, wo nara a bole tugun n da-gbole la. N dɛ fulenta. N ya a fɔ a ye ko, “N tigi, n mɔlɔkɔnɛ ko-rayen kɛ bolo. Ha bi, n bi yɛrɛyɛrɛnna.

¹⁷N manɛ iko yɔɔn min sɔnɛ a tigi yarɔ. N si ke kumala i ye kama? Sɛnbɛ sa n na. N ni-lafɛ-kan ti ke a nyɔgɔn ma kilan bolo.”

¹⁸A ya a bole tugun n na tun. N tagbɛlɛyara.

¹⁹A ko, “I di Alla ye. Fenfen kana i lakilan ka i kumakɔ.” A ban kɛ fɔla n ye tun, n tagbɛlɛyara a kurɛ la ka n nyɛrɛ lɔn. N ya a fɔ melika wo ye ko, “N tigi, ni i ye min fɔla, wo fɔ bawo n ta ara gbɛlɛya doni.”

²⁰Wo kɔma a ko, “I ya a lɔn n nara i wara min na, wa? Min sɛbɛnɛ Allata Tonya-Buku rɔ, n nara wo ragbɛ tinɛ i ye. N ba ban kɛ rakaranna i ye, n bi sɛgila Pasiya nyina-yogomɛ kɛlɛ tinɛ. N ban wo kɛlɛla, Kirisi nyamanɛ nyina-yogomɛ si na n kan ma. Mɔgɔ-wo-mɔgɔ ti na n dɛnbɛn n yoge kɛnu kɛlɛ tinɛ, fɔ Isirɛla kandan-melika, Maikali, kɔni.”