Read Kuranko Daniyɛli 5 Bible Online

Daniyɛli 5 - Kuranko bible

Daniyɛli 5

¹Lunyɛ do, Nɛbukanasala den Mansa Bɛlisasa ya mɔgɔ waga kelen kele ladiyɛ rɔ, ala mɔgɔ-banu, kɔni. Anubɛ wonu bi gbɛɛ minna nyɔ tumɛ min,

²ale Bɛlisasa ya a fɔ ala wɔli-kɛlɛnu ye ko anu ni ta sɛnɛ-yi-lafɛ anubɛ wodi-gbɛ-mirannu bi. Bɛlisasa fa bɔra miran wonu na a bolo Alla Bato-Bɔn la Yerusalɛm de! A ya wonu makele le alako ala mɔgɔ-banu wo, ala bara-musinu wo, anubɛ ala fɛ-sigi-musinu ni gbɛɛ min wonu tɔ.

³A ma mɛ, anu nara wonu na. Anu damasi ya gbɛɛ min miran wonu tɔ

⁴ka anuna bɛsɛnu kɔ. Bɛsɛ wonu nadannɛ sɛnɛ la anubɛ wodi-gbɛ, anubɛ silɛɛ, anubɛ nɛgɛ, anubɛ kɔlɔma, anubɛ kuri.

⁵Tiriyɛ wo rɔ, lɛnpu-waan-takɛ ye dandan kan tinɛ min bara la, anu ya mɔgɔ bole yen sɛbɛli kɛla anu tɛma mansɛla bon-dandan ma. Ale mansɛ ya wo yen a yɛ la tumɛ min,

⁶a yakɔrɛ sisira, a mɔlɔkɔnta kilan bolo.

⁷A ya a kuli mayɛlɛ a fɔ tinɛ ko anu ni ta ala durinu kele anubɛ a bolo-tafɛlɛnnɛnu anubɛ a hɛnkilimɛnu. Wonu nanɛ, mansɛ ya a fɔ anu ye ko, “Ni min kera sɛbɛli kɛ rakaranna ka a kɔrɛ fɔ n ye, n si ko sawa ma wo tigi ye. N si duruki-ba-hakikɛnu di a ma. Wo kɔma, n si sɛnɛ-yɔlɔkɛ bila a tigi kan na. A laban, ale si tugun nna kandɛ la nyamanɛ kɛ rɔ.”

⁸A hɛnkilimɛnu ya anu taya kɔnɔ mɔgɔ-wo-mɔgɔ ma taran wonu tɔ min si ke sɛbɛli wo rakaranna anubɛ ka a kɔrɛ fɔ.

⁹Wo ya a ma, mansɛ kilanta ka tenbi a fɔlɔtɛ la. Ala mɔgɔ-ba wonu kɔndɔfilita dɔgɔma-ma-de!

¹⁰Ale mansɛ na ya anubɛ ala mɔgɔ-banu sɔnkɔ-kan lamɔɛn tumɛ min, ale fanan tara anu taran bɔn burɔ nyɔ ladiyɛ wo rɔ. A ya a fɔ ala dan ye ko, “Alamɛ i siyi-fɛ yanyara! Alamɛ i kɛndɛyara! Hali i ma kilan.

¹¹Mɔgɛ do ye ila nyamanɛ kɛ rɔ, ale Allata sɛnbɛ anubɛ nyinɛnutɛ ye min fɛ. I fa ye mansayɛ la tumɛ min, kei wo ya hɛnkili-nyimɛ labɔ. Ala ko-lɔn mani de iko ale Allata sɛnbɛ anubɛ nyinɛnutɛ ye nya min. I fa Nɛbukanasa ya ale kei ma a durinu anubɛ a bolo-tafɛlɛnnɛnu anubɛ a hɛnkilimɛnuna kun-tigi la.

¹²A hɛnkili ye kiyo wo kɔrɛ takaran tinɛ, ado a ya sɔgɔsɔgɔma-tilinu-kɔrɛ lɔn. Hali ka ko-dogonni-kɔrɛ fɔ i ye, a ya wo lɔn. Ale keminɛ kele. A tɔgɔ le Daniyɛli. Anu bi a kelela fanan ko Bɛlitisasa. Wo si ke le sɛbɛli kɛ damasi kɔrɛ fɔla i ye.”

¹³Ale Daniyɛli nanɛ, anu tara a la mansɛ wara. Mansɛ ya a manyinika ko, “Daniyɛli le ile la? N fa tara mɔgɛ minnu bira Yuda nyamanɛ rɔ, wo do le ile la, wa?” Daniyɛli ko, “Mansɛ, tonyɛ le wo la.”

¹⁴Mansɛ wo ya a fɔ a ye ko, “N bara a lamɔɛn ko Allata sɛnbɛ anubɛ nyinɛnutɛ ye i fɛ. N bara a lamɔɛn fanan ko i ya hɛnkili-nyimɛ labɔ, ado ko i ya ko-lɔn bɛrɛkɛ!

¹⁵N bara nna hɛnkilimɛ damasi kele alako anu ni sɛbɛli kɛ rakaran kɔnɔ anu ma ke a kɔrɛ lɔnna mumɛ!

¹⁶N bara a lamɔɛn fanan ko ile si ke ko-dogonnɛnu kɔrɛ lɔnna le. Hali kɔndɔfili-koenu, i si wonu nya-yen. Ni ile kera sɛbɛli kɛ rakaranna ka a kɔrɛ fɔ n ye, n si ko sawa ma i ye. N si duruki-ba-hakikɛnu di i ma. N si sɛnɛ-yɔlɔkɛ bila i kan na. Wo kɔma, n si i tugun nna kandɛ la nyamanɛ kɛ rɔ.”

¹⁷Daniyɛli ya a fɔ a ye ko, “Mansɛ, ila fan wonu ni to i bolo. Ni wo ma, i ni wonu di mɔgɔ-gbɛrɛkɛ ma. Nde si sɛbɛli kɛ rakaran ka a kɔrɛ fɔ i ye a kin na.”

¹⁸“Alla Min Bi Fan Bɛɛ Kun Na, wo ya i fa Nɛbukanasa ma mansa-sɛnbɛ-tigi la. A ya a ma, mɔgɛnu ya a matɔgɔ ka a gbiliya.

¹⁹Ala mansaya-sɛnbɛ kolo, duninya-mɔgɛ bɛɛsi kilanta a la. Ni mɔgɔ-faga-sɔgɛ ya a bira, a si wo ma. Ni a ye min tola a niyi la, a si wo fanan ma le. Ni mɔgɛ min gbiliya-sɔgɛ ya a bira, a si wo tigi gbiliya. Ni mɔgɛ min yarabi-sɔgɛ ya a bira, a si wo tigi layarabi.

²⁰Kɔnɔ bawo a wasira ka ma tolo-gbɛlɛ anubɛ wunduyoge la, woletɔ Alla ya a bɔ ata sɔ tinɛ rɔ. A foora ala gbiliyɛ dama la.

²¹Mɔgɛnu ya a gben anu kurun tɔ. A hɛnkili mara iko sogenutɛ. A tora tagamana sogenu fɛ binyɛ rɔ ka binyɛ dɔn iko ninki. A tora kila gbɛkole ma. Duri tora yigila a ma nyɔ. Kɔnɔ tɔ-a-la, a sɔnta ko Alla Min Bi Fan Bɛɛ Kun Na, wo le ye duninya-mansɛ-bɛɛ kun na. Min ba diya a ye, a si mansayɛ di le wo ma.

²²“Kɔnɔ ile, ala dan, i sa i famayigila, ado min mara i fa la, i ya kɛ dama lɔn.

²³Ile wo, ila mɔgɔ-banu wo, ila bara-musinu wo, ila fɛ-sigi-musinu wo, wo ara gbɛɛ min Allata mirannu tɔ minnu bɔra a Bato-Bɔn la. Wo ara a ma, i wara bila Ma Tigi Arinyɛnɛ-Mari la. Wo ye gbɛɛ minyɛ wo kun na, wo ye wola bɛsɛnu kɔla fanan minnu nadannɛ sɛnɛ la, anubɛ wodi-gbɛ, anubɛ silɛɛ. Donu nadannɛ nɛgɛ la, anubɛ kɔlɔma, anubɛ kuri. Nba wo ye bɛsɛ minnu kɔla, wonu ya sa, anu tolo sa, anu hɛnkili mumɛ sa. Kɔnɔ wo niyi ye Allatala min bolo, wo sa wo gbiliyala.

²⁴Woletɔ ale Alla ya bole kɛ lana ka sɛbɛli kɛ kɛ.

²⁵“Min sɛbɛnɛ, wo le kɛ la, A DAN, A DAN, A SUMAN, A TALA.[3]

²⁶Wo kɔrɛ le ka a fɔ, ‘A DAN,’ Alla ara ila mansaya-telenu dan, a ko a ara a bɔ.

²⁷Ka a fɔ, ‘A SUMAN,’ wo kɔrɛ le, Alla ara ila mansayɛ suman, a ara a lɔn ko i ma bɛn.

²⁸Ka a fɔ, ‘A TALA,’ wo kɔrɛ le, Alla ara ila nyamanɛ bi i bolo ka a ratala Midiya kɛnu anubɛ Pasiya kɛnu na.”

²⁹ Tiriyante wo rɔ, Bɛlisasa ya a fɔ ala wɔli-kɛlɛ do ye ko a ni ta duruki-ba-hakikɛ donu bi ka na anu don Daniyɛli bolo. Anu ya sɛnɛ-yɔlɔkɛ fanan bila a kan na. Min sanɛ wo kuma, a ya a mayon ko ale Daniyɛli mara ala kandɛ tatugunnɛ la.

³⁰Wulɔn suyi nyɛrɛ rɔ, mɔgɛ do nara Mansa Bɛlisasa faga tinɛ. Mansa Dariyasi min bi Midiya nyamanɛ kun na, Babilɔn nyamanɛ tora wo bolo. Wo ya a taran, Dariyasi sɔrɔn-san ara san bi-wɔrɔ ani san fila (62) bɔ.