Read Kuranko Daniyɛli 6 Bible Online

Daniyɛli 6 - Kuranko bible

Daniyɛli 6

¹Mansa Dariyasi ya kun-tigi mɔgɔ kɛmɛ ani mɔgɔ mogan sigi ata nyamanɛ kun na.

²A ya mɔgɔ fila sa Daniyɛli kuma ka wonu sigi ata mɔgɔ-siginɛ kɛnu kun na pati-mansayɛ la alako wonu kana ale mansɛ yakɔrɔ-mamɔ.

³A ma mɛ, mansɛ wo ya Daniyɛli kɛ nya-yen ko a kusan wɔlila ka tenbi a ta-nyɔgɛ mɔgɔ filɛ wonu na anubɛ kun-tigi mɔgɔ kɛmɛ ani mɔgɔ mogan. Bawo ale kusan ala wɔlɛ la min kɛ, woletɔ a sɔgɛ ya mansɛ bira ka ale ma ala kandɛ la nyamanɛ wo rɔ.

⁴Daniyɛli wɔli-kɛ-nyɔgɛnu anubɛ nyamanita-mɔgɔ-banu ya anu taya ka fɛɛ sa Daniyɛlila wɔlɛ la kɔnɔ anu ma ke a nɔla. Mɔgɔ-latelennɛ le Daniyɛli la, ado a ti sɔn ko-radunɛ ma.

⁵Anu ya a fɔ anu nyɔgɔn ye ko, “Ma ti ke fɛɛ sala a la ka a tɔgɔ tinya, fɔ ala dina wara-koe rɔ. Ma si ke a nɔla nyɔ le.”

⁶Kun-tigi wonu tara mansɛ kɔndɔn tinɛ anu nyɔgɔn fɛ. Anu duwara mansɛ ye ko, “Mansa Dariyasi, alamɛ i mɛra. Alamɛ i kɛndɛyara.

⁷Male pati-mansɛ minnu bi i dɛnbɛna ila nyamanɛ marala, anubɛ a sigisɔn-mansɛ wo, a so-tigi wo, anubɛ a kemini-tigi wo, male damasi ara sɔn ko i ni tɔn kelen sa ila nyamanɛ kɛ rɔ ka tɔn wo mabalan. Kɔnɔ a sɔgɛ ye ma la, tele bi-sawa kɔrɔ, mɔgɔ-wo-mɔgɔ kana fenfen madiya ile kɔma. Ni min ya ila tɔn wo tinya, i si wo tigi lakɛ ila yarɛnu kɔrɔ denkɛ rɔ.

⁸Woletɔ mansɛ, i ni tɔn kɛ sa ka a sɛbɛ. Wo si ma Midiya anubɛ Pasiya kɛnuta tɔn do la min ti yɛlɛma muk!”

⁹Wo le ya a ma, Mansa Dariyasi ya wo ma tɔn la ka a sɛbɛ.

¹⁰Nba, Daniyɛli ya a lamɔɛn ko tɔn-sa-koe kɛ ara ma tonyɛ la, a tara a warɛ bɔn la. A yɛlɛta ala san-bon-burɛ do rɔ min wundan yɛ-lamununnɛ Yerusalɛm waralɛ la. Iko a duruta Alla matarala nya min kinyama sawa tele la, a ya ala wundan-dɛ laka ka Alla matara.

¹¹Daniyɛli yoge wonu ya a yen min kɛ a ye Alla matarala,

¹²anu dama tara anu nyɔgɔn fɛ mansɛ wara ka Daniyɛli maburi. Anu ya a fɔ mansɛ wo ye ko, “Ma tigi, i wara tɔn sa nun ka a sɛbɛ. I ko ni mɔgɔ-wo-mɔgɔ ya fenfen matara ile kɔma tele bi-sawɛ kɛ kɔrɔ, i ko i si wo tigi lafili ila yarɛnu kɔrɔ denkɛ rɔ.” Mansɛ wo ya a fɔ ko, “Tonyɛ le. Wo ara ma Midiya anubɛ Pasiya kɛnuta tɔn la, ado a ti yɛlɛma muk!”

¹³Anu ya a fɔ mansɛ ye tun ko, “Kɛlɛ bɔra mɔgɛ minnu na Yuda nyamanɛ rɔ, wo mɔgɔ kelen bi nyɔ, a sa sɔnna ila tɔn birala, ila kandɛ, Daniyɛli, kɔni. A ye matarali-kɛla a nyɛrɛ ma iko sawa tele la.”

¹⁴Mansɛ ya wo lamɔɛn tumɛ min, a yisi tinyara Daniyɛlila ko la. Ale mansɛ ya a raya ka Daniyɛli kunyɛ bɔ nanparan wo rɔ. A tora a rayala ha wurɛla-tumɛ la.

¹⁵Kun-tigi wonu nara tun ale mansɛ wara. Anu ko, “Ma tigi, ile ya a lɔn serr, iko Midiya anubɛ Pasiya kɛnuta tɔn ye nya min, ni mansɛ ya tɔn min sɛbɛ, wo ti yɛlɛma muk!”

¹⁶Wo le ya a ma, mansɛ ya a fɔ ko Daniyɛli la ni kɛ yarɛnu kɔrɔ. Nba, anu nara Daniyɛli la ka a lafili yarɛnu kɔrɔ. Mansɛ duwara ale Daniyɛli ye ko, “Ile ye Alla min batola tuma-wo-tuma, alamɛ wo ya i kisi.”

¹⁷Anu ya kuri sigi denkɛ wo don-dɛ la. Wo kɔma, ale mansɛ anubɛ ala mɔgɔ-ba wonu ya anuna mandan sa kuri wo ma alako mɔgɔ-wo-mɔgɔ kana na Daniyɛli kunyɛ bɔ wo rɔ.

¹⁸Mansɛ wo sɛgira a warɛ bɔn la. A kira kudu, a ma kinɔgɔ, ado a ma fen dɔn ka a nyɛrɛ ladiya.

¹⁹Wan-takanɛ sɔgɔma doni, ale mansɛ ya a lasɔ. A burimatoe tara denkɛ wo don-dɛ la.

²⁰A ke denka don-dɛ la nyɔ, a ya a kuli mayɛlɛ. A yisi-gbalanɛ ya Daniyɛli rakele. A ko, “Allata wɔli-kɛlɛ Daniyɛli, i ye Alla-nimɛ min batola tuma-wo-tuma, wo ara i lakisi, wa?”

²¹Daniyɛli ya a labira. A ko, “N tigi, alamɛ i ya simayɛ sɔrɔn. Alamɛ i kɛndɛyara.

²²Nta Alla ara ata melika lana ka yarɛ kɛnu dɛ makiri alako anu kana ko ma n na. A ya kɛ ma le bawo n ma ko tinya, ado n ma ko-yogoma ma i la.”

²³Mansɛ sewara dɔgɔma-ma-de! Ale mansɛ ya a fɔ ala wɔli-kɛlɛnu ye ko anu ni Daniyɛli layɛlɛ ka a bɔ denkɛ rɔ yarɛnu kɔrɔ. Anu ya a layɛlɛ tumɛ min, hali a mawɔrɔ gbɛ, anu ma a yen a ma bawo ale lara Alla la.

²⁴Mansɛ wo ya a fɔ ko, “Minnu ya Daniyɛli maburi n ye, wo ni wonubɛ anuna denbayɛnu bira ka anu nakɛ yarɛnu kɔrɔ.” Anu nanɛ mɔgɛ wonu na, anu ba min nakɛ yarɛnu kɔrɔ, yanni wo ni ke dugu ma, yarɛnu gbanta anu na ka anu ramɔsɔkɔn-mɔsɔkɔn.

²⁵Wo kɔma, ale Mansa Dariyasi ya kɛdi sɛbɛ sibole bɛɛ ma ala nyamanɛ rɔ. A ko, “N bara wo dama kɔndɔn. Alamɛ wo damasi sabatira.

²⁶Min sanɛ wo kuma, n bara ban a latɛgɛla nun nyamanɛ kɛ rɔ, n ko, mɔgɛ bɛɛsi ni kilan Daniyɛlita Alla la ka a gbiliya. Alla-nimɛ le ale la, Aado ale le ye ma lamarala burubukai! Ala mansayɛ ti tinya mumɛ, ado ala fanka dan sa.

²⁷Ale le ye ma latankala ka ma kisi fanan. Ale le ye ko-makawanɛnu kɛla san-kole anubɛ dugu-kole ma. Ale le ya Daniyɛli lakanan yarɛnu masibɛ ma.”

²⁸Daniyɛli wara-koe sabatira Mansa Dariyasi anubɛ Pasiya kɛ Mansa Sairasita wati rɔ.