Read Kuranko Daniyɛli 8 Bible Online

Daniyɛli 8 - Kuranko bible

Daniyɛli 8

¹Bɛlisasata mansayɛ san fila, a sawa nyɔgɛ ma Babilɔn nyamanɛ rɔ, ko-rayira fila nyɔgɛ kera nde, Daniyɛli ye.

²Nna ko-rayen kɛ rɔ, n tara tɛrɛna n nyɛrɛ la Susa soe burɔ tarɛ mininɛ min ma Ilam nyamanɛ rɔ. N bi yi-nɛ do dafɛ min tɔgɛ Wulai.

³N ya n yɛ lata. N ya saga-yigi-sɔnɛ yen yi wo dafɛ. A kere-yan filɛ ye a kuma. Doi yan doi ko kɔnɔ a wurumɛ wo fɔlɔn bɔra. A yanmɛ bɔra ala ban la.

⁴A tugura duninya tonko sawa wara la, fɔ tele-bɔɛ, a ma tugu nyɔ le wara la. Sogo-wo-sogo ti ke tɔn sigila a ma, ado anu ti ke bɔla ata sɛnbɛ kɔrɔ. Koe min ba diya a ye, ale ye wo le mala. A wasinɛ ala fanka wo rɔ.

⁵Nba, n bi n mirila kɛ kɔrɛ ma tumɛ min, n ya baa-kɔrɔn-burimatoe yen bɔla tele-yigi wara la. A manɛ iko a kin sa tugula dugi la. A kere-wa kelen sɔnɛ a ya filɛ tɛma, ado mɔgɔ nɛn-naban a yenna, i yɛ si bɛn a kere fɔlɔn na.

⁶Saga-yigi min bi yi-nɛ wo dafɛ, baa-kɔrɔn wo nara wo wara la. A burimatoe tugura saga-yigi wo kan ma.

⁷A ye saga-yigi wo kɛlɛla, n yɛ bɛnnɛ a ma. Saga-yigi wo tɔntɔn a bolo, wo kere filɛ kerita paun! Sɛnbɛ-wo-sɛnbɛ ma taran saga-yigi wo bolo tun. Baa-kɔrɔn ya a latosokoro dugu ma ka to a ratɛntɛnna. Mɔgɔ-wo-mɔgɔ ma ke a kisila.

⁸Baa-kɔrɔn wo tora a kɔnkɔnna ata sɛnbɛla ko la kɔnɔ a sɛnbɛ ke a dan ma, a kere kelan wo kerita. A kere sɔnɛ kan min nun, kere nani bɔra nyɔ. Wo bɛɛ sungban latanɛ a dan na.

⁹A kere nanɛ wonu tɔ, kelan bolɔn sɔra a ma, ado mɔgɔ nɛn-naban a yenna, i yɛ si bɛn a kere fɔlɔn na. Bolon-nɛ min sɔra a ma wo la, wo fanka tara dugula wara la anubɛ tele-bɔɛ wara la anubɛ lanyiri-nyamanɛ waralɛ rɔ, Isirɛla, kɔni.

¹⁰ Kere wo tora yanyala ha a kera Arinyɛnɛta-kɛlɛ-dannu ma. A ya Arinyɛnɛta-kɛlɛ-dan donu nabui dugi ma ka wonu tatɛntɛn.

¹¹Kere wo nyɛrɛ bilara Alla nyɛrɛ la, ale min bi Arinyɛnɛta-kɛlɛ-dannu kun na, kɔni. Anu bi sarakɛ minnu bɔla Alla ye tele-wo-tele, a ya wo tinya. A ya Mari Bato-Bɔn tinya.

¹²Ka a tɛgɛ mɔgɛna kisimiriya-ko-ladan la nyɔ, mɔgɛnu ma ke sarakɛnu bɔla tun iko anu duruta a mala nya min. Kere wo ya Alla-bato-koe fili dugu ma, ado a ya koe min bɛɛsi ma, a mara-a-la wonu dama rɔ.

¹³Wo kɔma, n ya a yen, melika fila ye kumala anu nyɔgɔn na. Doi ko, “Koe min bi mala ko-rayen kɛ rɔ, wo si to a kun na ha wati nyamintan? Kisimiriya-koe kɛnu si to a kun na ha wati nyamintan sarakɛnu gbɛ rɔ? Anu si to Arinyɛnɛta-kɛlɛ-dannu anubɛ Bato-Bɔn ratɛntɛnna ha wati nyamintan?”

¹⁴Melika doi fanan ya a yabi, a ko, “Anu si to kɛ kun na tele waga kelen, tele kɛmɛ kelen ani tele bi-loli[5] kɔrɔ (1,150). Tele kɛnu ma, anu si to foola saraka-bɔɛ la sɔgɔma ani wurɛ la tele-wo-tele. Tele kɛnu ba tenbi tumɛ min, Bato-Bɔn wara-koe si ta a kilɛ fɛ.”

¹⁵Nde, Daniyɛli ye ko-rayirɛ kɛ kɔrɛ lɔn-koe rɔ tumɛ min, latiriya-bole wo ma, n ya fan do yen sɔni n yakɔrɔ min muninyanɛ hadama-dan la.

¹⁶ N ya hadama-den-kan lamɔɛn ka bɔ yi-nɛ wo kuma min tɔgɛ Wulai. A ko, “Yibirila, ko-rayen kɛ kɔrɛ rakaran ale Daniyɛli ye.”

¹⁷Yibirila nara sɔ n dafɛ min kɛ, n kilanta dɔgɔma-ma-de ka n gbesi dugi la a kɔrɔ. Ale Yibirila ya a fɔ n ye ko, “Hali hadama dan le ile la, a sɔgɛ ye n na, i ni ko-rayen kɛ kɔrɛ lɔn. Ko-rayen kɛ kolomɛ le duninyala ban-koe la.”

¹⁸A ye kumɛ wo kun na n ye, n kirɔnta-a-la. Kɔnɔ a ya n bira ka n nasɔ.

¹⁹A ko, “Allata diminya-wati ye nala a labanna nya min, n bi nala wo le fɔla i ye kɛ la. Alla ara wati min natɛgɛ watila ban wara-koe rɔ, ko-rayirɛ kɛ kolomɛ le wo wara-koe la.

²⁰“I ya saga-yigi minnubɛ a kere filɛ yen wo la, wo tamasere le Midiya mansɛ anubɛ Pasiya mansɛ wara-koe la.

²¹Wo kɔma, i ya baa-kɔrɔn min yen wo la, wo tamasere le Kirisi mansayɛ wara-koe la. Mɔgɔ latiri a kere kelan min yenna wo la, Kirisi mansa fɔlɔtɛ le wo la.

²²I ya a kere min yen kerila wo la, kere nani bɔra a gbɛ rɔ baa-kɔrɔn wo kunyɛ ma, wo kɔrɛ le ko Kirisi nyamanɛ si fara. A ni ma nyamani nani na. Kɔnɔ nyamani nani kɛnu ti sɛnbɛ sɔrɔn iko anu nakofunɛ wati min.

²³“Nyamani nani kɛnuna wati-laban wa ke tumɛ min, ado anu hakɛ dan na ara tenbi, mansa-gbɛrɛkɛ si wuli anu tɛma nyɔ. Wo si ma mansa-wunduyoge anubɛ karagbɛlɛ anubɛ yanfante la.

²⁴Wo si sɛnbɛ sɔrɔn dɔgɔma-ma-de kɔnɔ a nyɛrɛ sako ma. A si kasara-siyaman kɛ, ado a ya a bole don ko-wo-ko rɔ, wo ra si bɛn a ma. A si sɛnbɛ-tiginu kasara, hali Allata mɔgɛnu.

²⁵Ka a tɛgɛ ala kɛwuyɛ wo ma, ala yanfanteyɛ wo bɛɛ ra si bɛn a ma. A si ma mɔgɔ-makawanɛ la a nyɛrɛ yala. Hali a ma minnu nalɔn, a si wonu natɛrɛna ka anu kasara. Hali wo, a si Mansɛ-Bɛɛta-Mansɛ kɛlɛ, Alla nyɛrɛ, kɔni. Kɔnɔ tɔ-a-la, a si kasara kɔnɔ a tɔgɔ ti to hadama-den na.

²⁶“N bɔ-san sɔgɔma-ani-wurala-saraka bɔ-koe min takaranna i yala, ko-rayen wo si bɔ-a-la. Kɔnɔ i kana a fɔ mɔgɔ-wo-mɔgɔ ye. A to i hɛnkili ma bawo yanni kɛ damasi ni bɔ-a-la, a si mɛ fɔlɔn.”

²⁷Ka a tɛgɛ nde, Daniyɛlita ko-rayen kɛnu ma, a ya tele-siyaman bɔ n mankulan bɔnɛ n ma. Wo kɔma, Mansa Bɛlisasa wo ya n sɔ wɔli min na, n tara wo kɛ tinɛ. Kɔnɔ hali wo, ko-rayen wo ya n kɔndɔfili. N ma ban nun a nya-yenna.