Read Kuranko Hoseya 14 Bible Online

Hoseya 14 - Kuranko bible

Hoseya 14

¹Wole Isirɛla mɔgɛnu, wo ni wo sɛgi wota Mari Alla ma bawo wo hakɛ ara wo tonko-tankan ka wo labui.

²Wo sɛgi Mari ma. Wo ni matarali-su-kɛ kɛ ko, “Ma makoto ma hakɛ la ka mala matarali-kan labira. Wo kɔma, ma si i matɔgɔ iko ma ara lanyiri kiri i ye nya min.”

³Wo kɔma, wo ni a fɔ ko, “Asiriyanu ti ke ma lakisila. Mala kɛlɛ-kɛ-soeenu ti ke ma lakisila. Ma ti a fɔ tun ko bɛsɛ le mata Alla la.” Wo ni a fɔ ko, “E, Mari, i ni ma dɛnbɛ bawo ma mani de iko kelennɛ minnu bi dɛnbɛnɛ sɔrɔnna ile le bolo.”

⁴Mari ko, “N si wole nta mɔgɛnu gbɛrɛn n ma tun ka wo makoto wola lanayabɛlitayɛla ko la. N si wo keni n yisi bɛɛ la, ado n ti kɔrɔtɔ wo ma tun!

⁵N si diya wole, Isirɛla mɔgɛnu ye iko bandɛ wa kɛ dugu-gbalanɛ ma. Wo si ma iko kɔlɔma min bara fere bɛrɛkɛ! Wo si banban iko Lɛbanan kɔlɔma min suli yiginɛ pon!

⁶Wo si nɔrɔn iko kɔlɔma-wɛ. Wo si kinya iko ɔlifi-kɔlɔma. Wo sumɛ si diya iko sida-kɔlɔma minnu bi Lɛbanan nyamanɛ rɔ.

⁷Wo si taran nta latankalɛ rɔ tun iko fɔlɔ. Wo si ma sɛnɛ la min sabatinɛ a kila-bɛrɛbɛrɛ fɛ. Wo mankan si koloya iko Lɛbanan minni-fan ye nya min.

⁸Wole Isirɛla mɔgɛnu ti wo bolo bila bɛsɛ ko rɔ tun. N si wola madiyalɛnu yabi ka wo fɛ-bira a kila-bɛrɛbɛrɛ fɛ. Wo kuma-tuwalɛ le nde la iko kɔlɔma min nɔrɔnnɛ yabu-yabu bawo wola duwa-kunyɛ mumɛ bɛɛ le nde la.”

⁹Min sɛbɛnɛ yan tɔ, alamɛ hɛnkilimɛnu ya wo nya-yen. Alamɛ anu ya a sa anu yisi rɔ. Allata kilɛ telenni de tede, ado ni mɔgɔ-telennɛnu bilara a fɛ, anu denu si kisi. Kɔnɔ hakɛ-tiginu si tonko-tankan ka bui bawo anu bara anu ban ale Mari la.