Read Kuranko Hoseya 2 Bible Online

Hoseya 2 - Kuranko bible

Hoseya 2

¹Wo tumɛ wa ke, wo si wo ta-nyɔgɛ Isirɛla mɔgɛnu kele ko, “Allatɛ” anubɛ “Mari ara hina minnu na.”

²Nna dannu, wo ni wo na makawandi bawo nna musu ma a la tun, ado ala kei ma n na tun. Wo ni wo na madiya alako a ni fara kei-gbɛrɛ-makiyi anubɛ yɛlɛnyɛ la.

³Ni a ma sɔn, n si a makolonya iko a na ya a sɔrɔn nya min. A si ma iko dugu-magbalanɛ anubɛ gbangban. Kan-nagbalɛ si a faga.

⁴Nde, ala kei ti kinikini wole, ata den-sɔrɔnnɛnu ma bawo wole bɔra ata yɛlɛnya-milibɛliyɛ rɔ. Ale musi nyɛrɛ ko a ye bilala ala keminɛnu denu fɛ bawo wonu denu bi a de-nyinina ka a lamin. A ko wonu denu bi fɛrɛya-bɔ-hakikɛ dila a ma anubɛ fen-diyama-su-bɛɛ.

⁶Ka a tɛgɛ wo le ma, n bi wɔnɔ-sansan donna a ma. N si sansan don ka kilɛ tɛgɛ a ma.

⁷Ala keminɛnu sagaran-kilɛ bɛɛ si faga a ma. A ti fenfen sɔrɔn wonu bolo tun. Wo kɔma, a si to a fɔla ko a ye sɛgila le tun nde, ala kei-kɔrɛ ma bawo a wara-koe sa tun iko fɔlɔ.

⁸A ma di a ye, a ni a fɔ ko nde le ye a de-nyinina. Ado nfan, n bi sɛnɛ anubɛ wodi-gbɛ min dila a ma, a duruta tala wo le la Beyali kɔ tinɛ.

⁹Dɔn-fen-tɛgɛ-wati wa ke, n si dɔn-fan wo songban a bolo. Minni-fan-burun-wati wa ke, n si wonu fanan bi a bolo. N ya fɛrɛya-bɔɛ minnu di a ma nun, n si wonu fogbɔ a bolo.

¹⁰Wo kɔma, n si a mawuran ala keminɛnu yala. Mɔgɔ-wo-mɔgɔ ti ke a latankala nta sɛnbɛ kɔrɔ.

¹¹N si tɔn sigi ala tolonta tɛ bɛɛ ma. A san-ladiyɛ wo, a karɛ-ladiyɛ wo, a Sulen-Tele-ladiyɛ wo, n si tɔn sigi a ma wo bɛɛ rɔ.

¹²A ya ki-fen-gbɔ-hakikɛ min bɛɛ sɔrɔn ala keminɛnu bolo a sarayɛ la, n si wo damasi halaki. N si ala ki-fan bɛɛ ma fɔgbɛ la, ado firarɔ-sogenu si to wonu dɔnna.

¹³N si a tɔrɔ bawo a ye n bolokɛ min kɛla ka ta isɛnti mintan ala bɛsi Beyali ye. N bi a tɔrɔla bawo a ye a makiri boloko-nyimɛ-kɛla ka bila ala keminɛnu fɛ. Mari kan le kɛ la.

¹⁴N bi nala tala a la wulɛ rɔ. N ba ke a la nyɔ, n si a manugu-nɛgɛ-kumɛnu fɔ alako n ni diya a ye tun.

¹⁵ N si ala ki-fannu nasɛgi a ma tun ka ala kɔndɔfili[5] bɛɛ yɛlɛma a ye yigi la. A sɔndɔmɛ si sa ntɛ kuma buda iko fɔlɔ, a fonike wati min wo tumɛ a bɔ-san Iyipiti.

¹⁶Wo wati rɔ, a si n kele ko, “N buin.” A ti n kele tun ko, “N tigi.”

¹⁷N si a ma, ala bɛsi Beyali wara-koe la ni nyina a la.

¹⁸Wo wati rɔ, sogo wo, koni wo, sagan-fen wo, nde, Alla ko anubɛ wonu si sarama-kan kiri anu nyɔgɔn tɛma alako wonu kana ko-yogoma fenfen ma nta mɔgɛnu na. N si kɛlɛ-kɛ-fannubɛ kɛlɛ wara-koe bɛɛ ka-a-la nyamanɛ rɔ, a faan wo, a kalabɛn wo. Nta mɔgɛnu si to yisi-kimɛ anubɛ lafɛrɛ rɔ wulɔn.

¹⁹Nde, Mari si i ma n halala-musi la tɛban! N si ma telenbaga la i ye. N si nna hinɛ anubɛ kinikinɛ yira i la.

²⁰N si nta lanyiri latɔnbagaya ka ile Isirɛla ma n halalɛ la. I si n lɔn i Mari la.

²¹Ni ile Isirɛla ya n matara ko-wo-ko rɔ wo wati rɔ, n si wo lamɔɛn. N si a ma, bandɛ ni bui dugi ma. Wo si a ma, Yɛsɛreli[6] lɛɛ ni dɔn-fan labɔ, a fui-fen wo, a ki-fen wo.

²³ N si nta mɔgɛnu fui nyamanɛ wo rɔ ka anu bara-koe lata yarɔ. N ya a fɔ minnu ma ko, “Hinabɛlɛnu,” n si hina wonu na. N ya a fɔ minnu ma ko, “Nta ma,” n si a fɔ wonu ma ko, “Nta mɔgɛ le kɛnu na.” Wonu fanan si a fɔ ko, “Mata Alla le ile la.”