Read Kuranko Hoseya 8 Bible Online

Hoseya 8 - Kuranko bible

Hoseya 8

¹Mari ko, “Wo ni kɛlɛ-buri fɛ. Wo yogenu bi nala wo kan ma iko kokɛ bawo wo ya sarama-kan min kiri wobɛ nde, Mari tɛma, wole ara wo waralɛ tinya ka murutiya nta tɔnnu ma.

²Hali wo ye a fɔla ko wota Alla le nde la, ado nfan, wo ye a fɔla fanan ko ntɛ le wole la, ado wo ko wo ya nde, Mari lɔn,

³wo ara wo kan-kɔ don ko-kinyɛ wo la. Ka a tɛgɛ wo sɔn wo ma, wo yogenu si wo sagaran tolon!

⁴“Wole nta mɔgɛnu bi mansɛnu sigila wo nyɛrɛ ma. Wo sa n nalɔnna ka n sako nyini fɔlɔn. Wo ara sɛnɛ anubɛ wodi-gbɛnu nadan wola bɛsɛnu na. Wo kasara-kunyɛ le bɛsi-ladan wo la.

⁵Sɛnɛ min nadannɛ tura-danla muninyɛ rɔ, Samariya kɛnu bi min batola, wo batoe gbo n ye dɔgɔma-ma-de! Wo ara n yisi kɔrɔtɔ n ma kosɛbɛ! Wo si wo fara wola bɛsi-kɔɛ kɛ la muntuma?

⁶Isirɛla boloma-wɔli-kɛlɛ do le ya turɛ wo ladan dɔrɔn. Nde, Alla ma wo la. Tura-danla muninyɛ wo ra si mɔsɔkɔn-mɔsɔkɔn.

⁷Ni min ya wunduyogoyɛ fui, wo tigi ye kasarɛ le tɛgɛla. Wola fui-fen-kuran ti ma dɛgɛ la wo ye. Hali wo mara lefan, sundannu denu bi nala wo dɔnna wo bolo.

⁸Wole Isirɛla mɔgɛnu bara ma iko sibolo-gbɛrɛnu. Wo ara ma iko bɔnku-daga-gbɛnkian mɔgɛ mako sa min na.

⁹Wole Isirɛla mɔgɛnu bara ta wo kun fɛ iko sofɛli-kalabante. Wo ya wo buri tala Asiriyanu bara wo dɛnbɛn-koe rɔ. Wo ara wo kun madiya sibolo-gbɛrɛnu na wo lakanan-koe la.

¹⁰Nde, Mari si wo kundɛn kan-tina-kelen ka wo tɔrɔ. Asiriya mansɛ wa a lagbɛlɛya wo kuma tumɛ min, wo si to wo forongbesila dugi ma.

¹¹“Wole Isirɛla mɔgɛnu bi tola saraka-mintan-tinɛnu nadanna nya min wo hakɛ makoto-koe ma, wo ye tola hakɛ-kɛ-tinɛnu nasiyayala wo nya na le.

¹²N bara tɔn-siyaman sɛbɛ wo ye nun kɔnɔ wo ye wo banna tɔn wonu na iko wo sa anu nya-yenna.

¹³Wo ye sarakɛnu bɔla wo buyinu denu ye, nde, Mari ma de! Nde, Mari sewani ma wonuna ko la mumɛ! N si n yili to wo hakɛ ko ka wo latuntun yɔɔnyɛ rɔ wo tɔrɔya-koe la iko wo taranta Iyipiti[8] nya min nun.

¹⁴“Wole Isirɛla mɔgɛnu bara bon-hakikɛnu sɔ wo nyɛrɛ ye ka nyina nde, wo Dali-Mari ko salon! Wole Yuda kɛnu fanan bara wola so-latankanɛnu sɔ kɔnɔ nde, Mari si tɛ layigi ka bon-hakikɛ wonubɛ so-latankanɛ wonu mintan gburr!”