Read Kuranko Emɔsi 4 Bible Online

Emɔsi 4 - Kuranko bible

Emɔsi 4

¹Wole Samariya musu-ba-kunbanu Basan nyamanɛ rɔ, wo kunbayanɛ iko bɔrɔkɛ. Wo ni wo tole masɔ. Wo sa fɛlɛtenɛnu anubɛ bolo-kolɔnnu birala a kin na! Wo ye wola keinu fɔrɔsɛla alako anu ni to nala baan la wo ye tuma-wo-tuma.

²Allatala-sɛnimɛ ya lanyiri kɛ kiri, a ko wati ye nala, wo yogenu si wo bira iko yungbun-kɛlɛ si yɛgɛ bira nya min ka a sa ala sole rɔ.

³Anu si wo sagan dugu la gbɔɔ ka ta wo malɔfɔkɔrɔyanɛ sa tara-kerinɛ dɛnu na ka wo fili tarɛ kɔma.

⁴Allatala ko wole Isirɛla mɔgɛnu, ni a di wo ye, wo ni ta wola kan-tina-sɛnimɛ Bɛtɛli ka hakɛ kɛ iko a di wo ye nya min. A ko wo ni ta Kiligali fanan ka murutiya iko a di wo ye nya min. Wo si na wola sarakɛ minnu na san la, ni a di wo ye, wo ni to nala wonu na sɔgɔma-wo-sɔgɔma. Wo si na wola yaka min na san kɔrɔ iko sawa, ni a di wo ye fanan, wo ni na wonu na tele-sawa wo tele-sawa kɔrɔ.

⁵Ni a di wo ye fanan, wo ni na wola biredinu na wo bolo wasinteyɛ la ka a ma baraka-bira-kɔ-fannu na iko a di wo ye nya min. Wo ye wo nyɛrɛ matagbala kɔ-fan minnu di-koe rɔ, ni a di wo ye, wo ni to wo nyɛrɛ matɔgɔla iko a di wo ye nya min. Nba, Mari ko bawo ko-sufa wonu di wole, Isirɛla mɔgɛnu ye, awa, wo ni to wo sufanu mala iko a di wo ye nya min.

⁶Mari ko ale nyɛrɛ-nyɛrɛ nara kɔnkɔ-fitinɛ la wole kuma kɔnɔ hali wo, Mari sɔgɔ-labɔnɛ wo la lass!

⁷Ni wo ya a yen kɔnkɔ-fitinɛ nara, Mari ko ale le ya wo beli banda-yi la. A ya bandɛ lana soe donu tɔ, a ya donu beli a la. A ya bandɛ lana sɛnɛ donu tɔ, a ya donu beli a la.

⁸Wo sɔn magbalata dɔgɔma-ma-de! Hali min ba wuli ka ta soe do rɔ yi-nyini-tinɛ, a ti yi taran nyɔ. Kɔnɔ hali wo, wo ma sɛgi Mari ma mumɛ!

⁹Mari ko a ya fɔn-kalamɛ lana wola ki-fannu kuma ka anu bɛɛsi lagbala. A ya kondɔnnu natugu wola ki-fannu anubɛ wola fui-fannu kuma ka anu gbenda feu! Hali wo, wo ma sɔn sɛgila Mari ma.

¹⁰Mari ko ale le ya tɔrɔyɛ sigi wo la iko a ya a ma Iyipiti kɛnu na nya min. Ale le ya a ma, wola den-keminɛnu fagara kɛlɛ rɔ. Wo yogenu tara wola soeenu na. A ya a ma, furinu tulun-sumɛ ya wo tɔrɔ wola dagɛnu tɔ. Hali wo, wo ma sɔn wo ya-lamununna Mari la mumɛ!

¹¹ Mari ko ale le ya wole, Isirɛla mɔgɛ donu kasara iko a ya Sɔdɔm anubɛ Kɔmɔra soenu tɔrɔ nya min. Mɔgɔ-toe minnu tora anu niyi la, wonu mani de iko ta ma sɔgɔ kundi. Kɔnɔ hali wo, wo ma sɔn sɛgila Mari ma.

¹²Woletɔ Mari ko a si wole, Isirɛla mɔgɛnu tɔrɔ. Bawo a ye nala wo tɔrɔla, nba, wo ni wo rabɛn Mari yarɔ min bi wo kitila.

¹³Sɛnbɛ-Bɛɛ-Tigi le ale Mari la. Ale Alla nyɛrɛ le ya kɔnkɛnu anubɛ fɔnyɔ ladan. Ale le si a ma, hadama-dannu ni a miriyanu lɔn. Ale le ye suyi anubɛ tele labɔla. Ale le ye duninya bɛɛ kuma mansayɛ la.