Read Kuranko Emɔsi 6 Bible Online

Emɔsi 6 - Kuranko bible

Emɔsi 6

¹“Wole Isirɛla mɔgɔ-lafɛrɛnɛ minnu siginɛ Yerusalɛm,[4] wole minnu yisi-kimanɛ Samariya soe burɔ, Isirɛla mɔgɛnu bi tala wole min bara wo dɛnbɛn-koe rɔ, a si gbɛlɛya wo kuma gben!

²Wo ye a fɔla wola mɔgɛnu ye ko anu ni ta Kalanɛ so-tinyanɛ mafɛlɛn, wo kɔma, anu ni ta Hamati so-karantan tinya-nya mafɛlɛn. Anu ni ta Kati so-wɛ mafɛlɛn min bi Filisitinu bolo. Wo ya anu manyinika ko, ‘Soe minnu bi Isirɛla anubɛ Yuda nyamanɛnu tɔ yan, wonu ma fisa sibolo-gbɛrɛ kɛnuna soenu ko, wa? Wola nyamani filɛ kɛnu ma kolo sibolo-gbɛrɛ kɛnuna nyamanɛnu ko, wa?’

³Wo miriya ko wo kɛ-nya ara wo tɔrɔya-tele wo masɛgi wo la pon kɔnɔ wo kɛ-nya ye wo yogenu kelela wo kan ma ka wo kasara.

⁴A si gbɛlɛya wole, nɔnfulu-tiginu kuma, wole min bi wo sala wola sa-fen-hakikɛnu kuma ka mɛ fen-diyamɛnu dɔn tinɛ.

⁵Sigi-kurɛnu-sɛ di wo ye seremanu tɔ. A sɔgɛ ye wo la ka wo nyɛrɛ sanka Mansa Dawuda ma.

⁶Wo ye wola gbɛɛ-barɛnu sɔla wo kun na ka wola tulu-hakikɛnu susa wo ma tuma-wo-tuma. Wo ye wo diyana-koe wo damasi mala kɔnɔ wola ko sa Isirɛla kasara koe rɔ.

⁷Wole mɔgɔ-yogomɛnu, wole fɔlɔn si don yɔɔnyɛ rɔ wo yogenu bolo. Wola saramayɛ anubɛ wola nyɛrɛ-ladiyɛ damasi si ban.

⁸“Allatala ara a tanɛ sigi wo ye ka wo makawandi ko wole, Isirɛla mɔgɛnuna wasinteyɛ ma di ale ye mumɛ! A ko wo sa hɔnna mɔgɔ-gbɛrɛkɛ la, fɔ wo ye bon-hakikɛ minnu sɔla wo nyɛrɛ ye. Mari ko a si wobɛ wola so-karantan don wo yogenu bolo fasai!”

⁹“Ni mɔgɔ tan ya anu dogon bɔn la, hali wo, anu si faga.

¹⁰Furi wonu na-kelen-nyɔgɛnu ba na anu nabɔ tinɛ bɔn wo la, anu ni ta mɔgɛ do taran nyɔ, anu si a manyinika ko, ‘I kelan le yan?’ Wo si anu yabi ko, ‘Ɔn!’ Furi wo na-kelen-nyɔgɛnu si a fɔ mɔgɛ wo ye ko, ‘I rade don! I kana Alla tɔgɛ ratɛgɛ yan tɔ tun alako mɔgɔ-gbɛrɛkɛ kana faga.’

¹¹“Mari wa a fɔ wo yogenu ye tumɛ min ko anu ni ta wola bɔnnu tinya, wola bon-kinama wo, a dɔgɔma wo, anu si wo damasi murundu.

¹²Soeenu si ke anu burila kuru-gbɔgɔsa-gbagasɛnu kuma, wa? Sara-ninkinu si ke fara-gbaran rasinna, wa? Hali koe kɛnu min ma daga mala, wole Isirɛla mɔgɛnu bara ko-latelennɛnu yɛlɛma ko-yogomɛnu na.

¹³Wo ye wo nyɛrɛ matɔgɔla ko wo ara Lodiba[5] soe wo bira. Wo ye wasila a la ko wo ragbɛlɛ bawo wo ara Kanam[6] soe bi.

¹⁴“Mari Sɛnbɛ-Bɛɛ-Tigi nyɛrɛ-nyɛrɛ le ya kɛ fɔ ko a si kɛlɛ-dan donu nabɔ nyamani-gbɛrɛ rɔ ka na bui wole, Isirɛla mɔgɛnu ma ka wola nyamanɛ bi wo bolo. Anu si bɔ wo birala Lɛbanan kɔnkɛnu kɔrɔ ha ka ta ke Kɔgɔ-Dalɛ dan ma. Anu si wo damasi bira tɛrr!”