Read Kuranko Emɔsi 7 Bible Online

Emɔsi 7 - Kuranko bible

Emɔsi 7

¹Ko-Rayirɛ Fɔlɔtɛ Nde, Nɛbi Emɔsi ko Allatala ya ko-rayirɛ do kɛ n ye. N ya a yen, Isirɛla mɔgɛnu ban-san le anuna dɔn-fen-kun-fɔlɛnu tɛgɛla ka anu di mansɛ ma. Anuna sɛnɛ-bɛ minnu tonɛ, n ya a yen, kondɔnnu bara na ka kɛ wonu ma saf!

²N ya a yen ko anu bara dɔn-fen-fɛrannu dɔn sa! N ya Alla madiya ko, “I yandi, ila mɔgɛnu makoto. Mɔgɛ kɛnu si ke anu beli-fan sɔrɔnna kama? Fanka sa anu na, ado anu ma siya.”

³Woletɔ Mari ya a fonde yɛlɛma ka a fɔ nde, Nɛbi Emɔsi ye ko, “N bara n miri ko-yogomɛ min ma mɔgɛ kɛnu bara la, n ti wo ma tun.” Ko-Rayira Fila Nyɔgɛ

⁴Wo kɔma, Mari ya ko-rayirɛ do kɛ n ye tun. N ya a yen, Alla ya tɛ rabɛn ala mɔgɛnu halaki-koe la. Tɛ wo ya yinu gbala duninya bɛɛ rɔ. Wo kɔma, tɛ ya a ya-lamunun dugu-kole la.

⁵N ya Alla matara, n ko, “E, Alla, tɛ kɛ ladufen ma ye. Ila mɔgɛnu si kisi kama? Fanka sa anu na, ado anu ma siya.”

⁶Wo kɔma, Mari ya a fonde yɛlɛma ka a fɔ nde, Nɛbi Emɔsi ye ko a ti anu halaki tɛ la muk! Ko-Rayira Sawa Nyɔgɛ

⁷Wo kɔma, Mari ya ko-rayirɛ do kɛ n ye tun. N ya Mari yen dandan dafɛ, yili ye a bolo a ya dandan natelen min na.

⁸Mari ya nde, Nɛbi Emɔsi manyinika ko, “I ya nfen yen n bolo?” N ko, “Dandan suman-yili.” Wo kɔma, Mari ya a fɔ tun ko, “N bi nala Isirɛla mɔgɛnu sumanna ka a yira anu na ko anu tadunɛ iko dandan min telenni ma. N ti n yisi yɛlɛma, fɔ n ba anu tɔrɔ le serr!”

⁹Nɛbi Emɔsi ya Mari kuman-kannu natenbi ko, “Isiyaka kegeyɛnu bi ale Mari batola anuta kan-tina-sɛnimɛ minnu tɔ Isirɛla nyamanɛ rɔ, Mari ko a si kan tinɛ wonu kasara ka nyɔnu ma tonbon-kole la. Mari ko a si mansayɛ bɔ Mansa Yɛrabowami kebilɛ bolo.”

¹⁰Saraka-Masɔla-Kun-Tigi-Wɛ Hamasa min bi Bɛtɛli soe burɔ, wo ya Nɛbi Emɔsi pɛpɛ don Mansa Yɛrabowami na. A ya a fɔ ko, “Emɔsi kɛ ye a da tankala ile Mansɛ anubɛ Isirɛla mɔgɛnu na. A ye kumɛ minnu fɔla, wo si a ma, Isirɛla nyamanɛ ni tinya pɔ!

¹¹A ye belenna a fɔla ko ile mansɛ ye tola kɛlɛ rɔ. A ye a fɔla fanan ko kɛlɛ si Isirɛla mɔgɛnu bira ka anu ma yɔɔnnu na.”

¹²Wo kɔma, Saraka-Masɔla-Kun-Tigi-Wɛ Hamasa ya a fɔ Nɛbi Emɔsi ye ko, “E, ile Emɔsi, itɛ ara a bɔ. Sɛgi i warɛ Yuda nyamanɛ rɔ. I ni ta ila wɔlɔyiya-kumɛnu fɔ nyɔ. Wonu si to i sarala.

¹³I kana ila wɔlɔyiya-kumɛnu fɔ male warɛ Bɛtɛli soe kɛ burɔ yan tun. Mata mansɛ warɛ le yan na, ado a si Alla bato yan de fanan.”

¹⁴Woletɔ Nɛbi Emɔsi ya a fɔ Saraka-Masɔla-Kun-Tigi-Wɛ Hamasa ye ko, “Wo nɛbi ma n na min bi nɛbiyɛ kɛla nɔnfulila ko la. Ki-fannu anubɛ kolo-fannu bi n bolo n barɛ.

¹⁵Mari le ya n bɔ wonu kun na ka na n na yan alako n ni wɔlɔyiya-kumɛnu fɔ wole, Isirɛla mɔgɛnu ye.

¹⁶Ile ya a fɔ n ye ko n ni n fara wɔlɔyiya-kumɛnu fɔla Isirɛla mɔgɛnu ye.

¹⁷Nba, ile Saraka-Masɔla-Kun-Tigi-Wɛ Hamasa, i ni i tole masɔ Mari ye nala min fɔla i wara-koe rɔ. Mari ko ila musi si ma yɛlan la ka to yilan-yilanna keinu kuma. Ila dannu si to kɛlɛ rɔ. Wo yogenu si na wola nyamanɛ kɛ bi wo bolo ka a tala anu nyɔgɔn na. Anu si ta Isirɛla mɔgɛnu na ka anu ma yɔɔnnu na nyamani-gbɛrɛ rɔ. Ile Hamasa nyɛrɛ-nyɛrɛ si faga nyamani-gbɛrɛ rɔ.”