Read Kuranko Hɔbadaya 1 Bible Online

Hɔbadaya 1 - Kuranko bible

Hɔbadaya 1

¹ Mari Sɛnbɛ-Bɛɛ-Tigi ya kumɛ kɛ le fɔ nde, Nɛbi Hɔbadaya ye Idɔm nyamanita-mɔgɛnu wara-koela ko la. Mari ya mɔgɛ do sɔ ka kuma sibolo-siyamɛnu ye, ado ma ara kumɛ wo lamɔɛn. A ko, “Wo ni wo rabɛn ka ta bui Idɔm mɔgɛnu ma.”

²Mari ya Idɔm nyamanita-mɔgɛnu wara-koe fɔ Isirɛla mɔgɛnu ye. A ko, “Wole Idɔm mɔgɛnu, nde, Mari si a ma, wo ti fanka sɔrɔn wo kɛlɛ-nyɔgɛnu kuma, ado mɔgɛ bɛɛ si wo mafɛlɛn iko fen-fufafuyi.

³Wola mansa-soe manɛ farɛ la. Wola sigi tinɛnu manɛ kɔnkɔ-layan-bɛ la. Wo mirinɛ ko mɔgɔ-wo-mɔgɔ ti ke wo labuila kɔnɔ wola wasinteyɛ ara wo yanfa feu!”

⁴Hali wole mirinɛ ko wola sigi tinɛnu bi san-kolo-wɛ ma iko kokɛ-nyagan tenbi lolenu tɛma san-kole rɔ. Kɔnɔ hali wo, ale Mari ko a si wo gbesi dugi la.

⁵Kankannu ba na suyi rɔ ka kankanyɛ kɛ, anu ba anu wasakara maka bɔn la, anu si ta anu ye worɔ. Kɔn-gbɔɛnu mo-wati wa ke, anu si a monɛnu bɔ a la ka do to nyɔ. Kɔnɔ wole Isɔ kegeyɛnu, Mari ko wo yogenu ti kinikini wole ma wo nya. Anu si wo bolo-kolonya feu! Anu si wo bolo-fan mumɛ bɛɛ bi tɛrr!

⁷Wo dɛnbɛnɛ-kɛnu si wo yanfa ka wo gben wola nyamanɛ rɔ. Wobɛ kɛ minnu bi ko-kelan rɔ nun, wonu si yɛlɛma wo kuma ka wo nɔ. Wobɛ minnu bi fan dɔnna wo nyɔgɔn tɛma nun, a ko wonu si gbɛrɛ lasigi wo ye kɔnɔ wo ti anu kɔrɔ yen muk!

⁸Ale Mari wa na wo tɔrɔ tinɛ, a ko a si wola hallintorenu tɔrɔ. A si wola hɛnkilimɛnuna hɛnkili yabasan.

⁹Wola kɛlɛ-kurugbɛnu kun ma si kɔ Idɔm[1] nyamanɛ rɔ. Wola kɛlɛ-dannu dama si faga tɛrr!

¹⁰Mari ko tɔrɔyɛ bɛɛ si na wo kuma kamasɔrɔn wo ara wo na-kelen-nyɔgɛnu Yakoba kegeyɛnu kankan ka anu faga. Woletɔ a ko wole Idɔm mɔgɛnu si yarabiyi sɔrɔn ka halaki pɔɔ!

¹¹Isirɛla yogenu nara tumɛ min ka Yerusalɛm tarɛ dɛnu keri, wo sɔnɛ tora wo gbɛ rɔ. Wo ma sɔn wo na-kelen-nyɔgɛnu dɛnbɛna kɛlɛ la mumɛ! Wo ma ta kankannu fɛ kankanya-kɛ-tinɛ kɔnɔ a ko wo yogo iko mɔgɛ wo minnu ya kankanya-fannu tala anu nyɔgɛnu tɛma.

¹²Wo yɛlɛnta wo na-kelen-nyɔgɛnu ma wo tumɛ anu bi nanparan rɔ, ado wo ma kin. Wo sewara wo tumɛ anu bi kasarɛ rɔ, ado wo ma kin. Wo ya sarandɛ ratii wo tumɛ wo na-kelen-nyɔgɛnu bi tɔrɔyɛ rɔ, ado wo fanan ma kin mumɛ!

¹³Wo tara yɛlɛn tinɛ Marita mɔgɛnu ma anuna mansaya-soe burɔ. Minnu tara anu bolo-fannu bi tinɛ, wo kɔfura wonu ma, ado wo don ma kin hali!

¹⁴Wo na-kelen-nyɔgɛ minnu ya anu buri anu yogenu kɔrɔ, a ko wo ya wonu napɛrɛn kila-farannu na. Wo ya anu bira ka anu don anu yogenu bolo tun, ado wo don ma kin de!

¹⁵Sibolenu kiti-sa-koe ara gbɛrɛn ale Mari bolo. Wole Idɔm mɔgɛnu bara min ma, a ko anu si na wo nyɔgɔn sigi wole fanan na, yɔ! Wo ya min nyɔgɔn ma, a ko a ye wo le nyɔgɔn mala wo la.

¹⁶Ata mɔgɛnu ya tɔrɔya-yi min Yerusalɛm soe burɔ. Kɔnɔ wole minnu bi Yerusalɛmna foolɛ rɔ, wole si tɔrɔya-yi min min, a ko yi wo si kunaya ka tenbi ata mɔgɛnuta tɔrɔya-yi la pirr! Wole ata mɔgɛnu, wo yogenu ya wo tɔrɔya kɔnkɔ-sɛnimɛ kuma Yerusalɛm soe burɔ kɔnɔ wo yoge minnu bi Yerusalɛmna foolɛ rɔ, a ko wonu fanan si tɔrɔyɛ sɔrɔn ka tenbi wole la ka tunu tɔrɔyɛ bolo!

¹⁷Kɔnɔ hali wo, Mari ko ata mɔgɔ-biranɛ donu si ke anu burila ka sɛgi anu barɛ Yerusalɛm soe burɔ ka a bato nyɔ. Yakoba kegeyɛnu si ke anu halala-nyamanɛ sɔrɔnna a gbɛ rɔ tun, yɔ!

¹⁸Yakoba kegeyɛnu si ma iko tɛ. Ata den Yusufu fanan kegeyɛnu si ma iko ta-mɛlan, ado Isɔ kegeyɛnu si ma iko bin-gbalɛ. Kɔnɔ a ko wonu si Isɔ kegeyɛnu mintan ka anu nato dogbe! Ale Mari kuman-kan le kɛ la.

¹⁹Isirɛla mɔgɛ minnu bi Yuda nyamanɛ rɔ dugula wara la, Mari ko wo donu si ta anu sigi Idɔm nyamanɛ rɔ. Minnu bi kɔnkɔ-nyamanɛ rɔ tele-yigi wara la, a ko wonu si ta anu sigi Filisiti nyamanɛ rɔ. Wo donu si ta anu sigi tun Ifɛrɛm anubɛ Samariya nyamanɛ rɔ. Bɛnyamɛ bɔnsɔn-mɔgɛnu fanan si ta Kaliyadi nyamanɛ bi anu bolo tun ka anu sigi nyɔ.

²⁰Isirɛla mɔgɛ minnu siginɛ kantɔ-wara la nun, wo yogenu nara anu bira ka ta anu na pon! Kɔnɔ Marita mɔgɛnu si na hɔrɔyɛ rɔ ka anu sigi kantɔ-wara la ka nyamanɛ wo nɔ. Anu si ta anu yoge kɛlɛla Finisiya nyamanɛ rɔ ka anu bira ha ka ta ke Sɛrɛfati soe burɔ. Minnu biranɛ Yerusalɛm nun, wonu fanan si na hɔrɔyɛ rɔ ka anu sigi Saradasi soe burɔ. Wonu fanan si ta Yuda nyamanɛ dugula wara la ka wonuna soenu bi anu bolo.

²¹Mɔgɛ kɛnu ba ban soe kɛnu bila anu bolo, anu si ta Idɔm nyamanɛ fanan bi ka a mara. Ale Mari nyɛrɛ si ma mansɛ la ata mɔgɛnu kuma nyɔ.