Read Kuranko Yona 4 Bible Online

Yona 4 - Kuranko bible

Yona 4

¹Nɛbi Yona ya a yen min kɛ, tunbi ara sigi a tɛrɛn na, a yisi magboyara.

² A ya a fɔ Mari ye ko, “Yanni n ni bɔ n barɛ, n ya a lɔn ko i ye anu makotola le, woletɔ n ya n buri. N ko n ni ta Sipeni. N ya a lɔn nun ko mɔgɛnu di i ye kosɛbɛ, i kinikinite. I si i munyu mɔgɛnu kɔrɔ, i kɛ-nya kin. Hali i si mɔgɛ minnu halaki kɔnɔ i latiri i fonde yɛlɛmana ka kinikini anu ma.

³ Nba Mari, a ma, n ni faga kaka. N furi fisa n kɛndɛ ko.”

⁴Mari ya Nɛbi Yona manyinika ko, “Itɛ mintan bi kɛ rɔ? Nfen bi i diminyala?”

⁵Nɛbi Yona bɔra ka ta soe kɔma ka a sigi tele-bɔɛ wara la. A ya lele sɔ ka a sigi wo ninɛ kɔrɔ. A siginɛ tora nyɔ ka a makɔnɔ. A ni a lɔn min bi nala mala Ninɛfa soe la.

⁶Wo kɔma, Mari Alla ya kɔlɔma-yanba-kun-pinpilamɛ do lafɛrɛn Nɛbi Yona kuma nyɔ tiriya alako tele kana a tɔrɔ.

⁷Wo wulun sɔgɔma subaga, Alla ya tunbi kelen nana ka kɔlɔma wo dɔn. Kɔlɔma wo gbalata kɔrr!

⁸Sun-tele-kɔgɛ, Alla ya fɔn-kalamɛ lana ka bɔ tele-bɔɛ. A tora doni, Yona ni kirɔn-a-la tele-wuyan bolo. A duwara le gbɛ ni a si faga. A ko, “N furi fisa n kɛndɛ ko.”

⁹Kɔnɔ Alla ya Nɛbi Yona manyinika tun ko, “Nfen bi a tola, i ye diminyala kɔlɔma kɛ ma ka?” Nɛbi Yona ya a yabi ko, “A bɛnta, n ni diminya. Sayɛ fisa nde ye kɛ ko.”

¹⁰Mari ya a fɔ a ye ko, “Kɔlɔma kɛ fɛrɛnta tele kelen, a gbalata tele kelen. I turu ma, i tara ma kɔlɔma kɛ lafɛrɛn tinɛ. Hali wo, i yisi-magboyanɛ kɔlɔma kɛla ko la.

¹¹Nfen ya a to gbɛ, nde ti kinikini Ninɛfa mɔgɛ kɛnu ma? I miri de, dennɛ minnu bi Ninɛfa soe kɛ rɔ minnu ma anu hɛnkili sɔrɔn bɛ, anu tenbira mɔgɔ waga kɛmɛ ani mɔgɔ waga mogan na (120,000). Hali kolo-fannu, wonu fanan siya. Nde kana kinikini so-karantan-kɛ-mɔgɛnu ma wo rɔ, wa?”