Read Kuranko Yilan-Yilan Koe 14 Bible Online

Yilan-Yilan Koe 14 - Kuranko bible

Yilan-Yilan Koe 14

¹Su kelen, anu bi gbele-gbelenna yakɔrɔ-mamɔɛ anubɛ nyagbɛla ko la.

²Anu bara gbunya Musa anubɛ Aruna kɔrɔ. Anu ko, “A fisa nun, hali ma tora fagala Iyipiti. Hali ma fagara wula-da-rakolɔn kɛ rɔ yan.

³Nfen ya a to, Mari ye ma kunyɛ telenna nyamanɛ wo la? Ma si ban fagala kɛlɛ rɔ. Anu si mala musinu anubɛ mala dannu bi ma bolo. A fisa, ma ni sɛgi ma kɔma Iyipiti.”

⁴Anu kumara anu nyɔgɔn ye ko, “Ma ni kun-tigi kelen sigi min si ta ma to Iyipiti!”

⁵Musa anubɛ Aruna ya anu maburun dugi ma mɔgɛ bɛɛ yakɔrɔ.

⁶Ko-lakɔrɔsila mɔgɔ filɛ, Nunna den-kei Yasowa anubɛ Yɛfunɛla dan Kelabu, wonu yisi magboyara ha anu ya anuna durukinu tafara[14] yisi-tinya bolo.

⁷Anu ya a fɔ mɔgɛnu ye ko, “Ma tara nyamanɛ wo mafɛlɛn tinɛ. A kin kati!

⁸Ni Mari nyagalenta ma la, a si ta ma la nyamani-hakikɛ wo rɔ ka nyɔ di ma ma.

⁹ Wo kana murutiya Mari ma. Wo kana kilan nyɔ-mɔgɛnu na. Ma si mɔgɛ wonu nɔ le yɛlefɛ! Mari ye ma fɛ. Anu lanɛ anuna bɛsɛ minnu na ko wonu si anu kandan. Fanka ye mata Mari la ka tenbi wonu na. Wo kana kilan hali doni bɛrɛni!”

¹⁰Isirɛla mɔgɛnu ya Kelabu anubɛ Yasowa makilan ko anu bi anu mabonna kuri la ha anu ni faga. Anu bi kumɛ wo kun na gbɛ, mɔgɔ damasi ya ta-waan yen Marita Fani-Bɔn kuma.

¹¹Mari ya a fɔ Musa ye ko, “Mɔgɛ kɛnu si anu ban n na ha wati nyamintan? Hali n bara kabana-ko-siyaman min kɛ anu yala kɔnɔ ha bi, mɔgɛ kɛnu ma la n na.

¹²N si min ma gbɛ, n si kiraya-fitinɛ layigi anu kuma ka anu damasi lato dogbe! Kɔnɔ n si ile, Musa ma bɔnsɔn-kunyɛ la, bɔnsɔn min kolo, ado anu tagbɛlɛ ka tenbi bɔnsɔn kɛnu na!”

¹³ Musa ya a fɔ Mari ye ko, “Ita sɛnbɛ le ya mɔgɛ kɛnu nabɔ Iyipiti. Ni Iyipiti mɔgɛnu ya a lamɔɛn ko i wara ita mɔgɛnu halaki,

¹⁴anu si wo fɔ Kenan mɔgɛnu ye. Kenan mɔgɛnu ya ko siyaman namɔɛn ile Mari wara-koe rɔ i ye ma fɛ nya min, ado anu bara ila banda-fin-gbɛ dunnɛ yen ma kuma. Anu bi ila banda-fin-gbɛ yenna tala ma yarɔ tele rɔ. Suyi rɔ, a ye malanna ma yarɔ iko tɛ.

¹⁵Ni i ya ila mɔgɛ kɛ bɛɛ faga kaka nya-kun-kelen wulɛ kɛ rɔ, Kenan mɔgɛ min bɛɛ ara ita kabana-koe kɛnu namɔɛn,

¹⁶anu si a fɔ ko i wara ila mɔgɛ bɛɛ faga wulɛ rɔ bawo i ti ke tala anu na lanyiri-nyamanɛ rɔ.

¹⁷Mari, i yandi, n bi i madiyala. Ita sɛnbɛ yira ma la. I ni wo bɛɛsi ma iko i wara a rabɛn ma ye nya min fɔlɔ nun. Ile nyɛrɛ-nyɛrɛ le ya a fɔ nun ko,

¹⁸ i ti diminya yona, ko i si ita habadan-keninteyɛ yira mɔgɛnu na anubɛ ita lanayɛ. I si mɔgɛnu makoto minnu bi hakɛ kɛla anubɛ minnu bi murutiyala i ma. Kɔnɔ ile ya a fɔ nun fanan ko i si hakɛ-tiginu sara iko anuna hakɛ ye nya min. Ni mɔgɛ ya hakɛ kɛ, ata hakɛ yakɔrɔ-mamɔɛ wo si sigi ala dannu kuma ha ka ta a sigi a tolo-birɛnu anubɛ a tolo-bira-sɔɛnu na.

¹⁹I yandi, i ni mɔgɛ kɛnu makoto anu hakɛ la bawo ita habadan-keninteyɛ wo ti yɛlɛma, ado kebi ma bɔra Iyipiti, i ya anu makoto iko siyaman.”

²⁰Mari ya a fɔ Musa ye ko, “Awa, n si anu makoto iko i wara a fɔ n ye nya min.

²¹ Iko n bara n keli n nyɛrɛ ma anubɛ nta gbiliyɛ min bi kan tinɛ kɛ bɛɛ rɔ nya min,

²²nba, anu do-wo-do ti don Kenan nyamanɛ rɔ. Anu damasi ya nna ta-waan wo yen serr! Anu ya kabana-ko-siyaman yen n ya min ma Iyipiti anubɛ n ya min ma wula-da-rakolɔn rɔ. Anu ya a yen, n ya n munyu anu kɔrɔ iko siyaman. Hali wo, anu ma sɔn ka nta kumɛ bira.

²³N ya nyamanɛ min di anu benbanu ma, anu ti don nyɔ rɔ muk! Minnu ya n nafɛya, hali wonu kelen ti don Kenan nyamanɛ wo rɔ mumɛ!

²⁴ Fɔ Kelabu min ya a tole masɔ n na, ale sa iko a mɔgɛ toenu. Wo le ma bɔ n kɔma, woletɔ n si a ma, a ara nyamanɛ min tatagama nun, a ni don nyɔ rɔ.

²⁵Wonubɛ a kebilɛ bɛɛ si sigi folo-wɛnu tɔ Amalɛki anubɛ Kenan mɔgɛnu bi kan min kaka. Sina, wo sɛgi wulɛ rɔ Kɔgɔ-Yi-Wulen bolɔn doi telen tɔ.”

²⁶Mari ya a fɔ Musa anubɛ Aruna ye ko,

²⁷“Mɔgɔ-yogomɛ kɛnu si to gbunya-kumɛ fɔla n ma ha wati mintan? Mɔgɛ kɛnuna gbunya-kumɛ sɔgɔ-wo-sɔgɔ sa n na tun!

²⁸Kumɛ kɛ latenbi anu ma n ye ko, ‘N bara n keli n nyɛrɛ ma, ado wo ni la a la worɔ yati, ko n si a ma wo ye iko ile Musa ya n manyinika nya min. Wo Mari le nde la min bi kɛ fɔla.

²⁹ Wo si faga. Wo furinu ni basan wula-da-rakolɔn kɛ la. Mɔgɛ minnu bara tenbi san mogan la, wonu ti don nyamanɛ wo rɔ mumɛ, fɔ dennɛ minnu ma ke wɛ san mogan rɔ, wonu dɔrɔn si don.

³⁰N bara ban a latɛgɛla bawo wo ya a fɔ nun ko Kenannu si wo kɛlɛ ka wola dannu bi wo bolo. Wole ya wo ban nyamanɛ min na, wo le ye nala tola wola dannu ye gbɛ! Nyɔ si ma anu barɛ la. N ya lanyiri kiri wo ye nun, n ko wo ni sigi nyɔ kɔnɔ wo do-wo-do ti sigi nyɔ tun fɔ Kelabu anubɛ Yasowa.

³²Wo bɛɛ si faga wulɛ kɛ rɔ yan.

³³ Wola dannu si yilan-yilan wo fɛ wulɛ rɔ san bi-nani kɔrɔ. Anu si tɔrɔyɛ sɔrɔn wola dɛnkɛninyabɛlitayɛla ko la ha kina wo dama ni faga.

³⁴Wo si tɔrɔya wo hakɛla ko la. Wo si san bi-nani bɔ, wo ye yilan-yilanna iko wo ya tele bi-nani bɔ nya min nyamanɛ wo mafɛlɛn tinɛ. Wo si na a lɔn ni n bi nya min ni nde sa wo fɛ!

³⁵Nde, Mari ko tamayi mumɛ sa kɛ rɔ. Kɛ diyara, a gboyara, n bi kɛ le mala wole mɔgɔ-yogenu na, wole min nadɛnnɛ n kan ma! Wo si faga le wulɛ kɛ rɔ yan, yɔ! Wo Mari le nde la min bi kumɛ kɛ fɔla wo ye.’ ”

³⁶Ko-lakɔrɔsila mɔgɔ tan minnu nara foninya-kumɛ la Isirɛla mɔgɛnu ye, wonu denu ya a ma, Isirɛla mɔgɛnu murutiyara Mari Alla ma. Woletɔ Mari ya kiraya-fitinɛ layigi mɔgɔ tan wonu kuma. Anu dama fagara tɛrr!

³⁸Min kɛndɛ tora ko-lakɔrɔsila mɔgɔ tan-ni-filɛ kɛnu tɔ, mɔgɔ fila pe, Kelabu anubɛ Yasowa.

³⁹Musa banta Marila kumɛ latenbila Isirɛla mɔgɛnu ma wati min, anu damasi yisi kɔrɔtɔra ka di kosɛbɛ!

⁴⁰Wo wulun sɔgɔma subaga, Isirɛla mɔgɛnu wulita ka ta mɔgɛnu kɛlɛ tinɛ minnu bi kɔnkɔ-nyamanɛ rɔ. Isirɛla mɔgɛnu ya a fɔ Musa ye ko, “Mari ya kan tinɛ minna ko fɔ ma ye nun, ma ara wuli ka ta nyɔ. Male ya a lɔn ka a fɔ ko ma ara hakɛ kɛ nun.”

⁴¹Kɔnɔ Musa ya a fɔ anu ye ko, “Nfen ya a to, wole ya Marita kumɛ masɔsɔ?

⁴²Wo kana ta mumɛ! Wo ti anu nɔ hali! Mari sa wo fɛ mumɛ! Wo yogenu si wo nɔ ka wo faga.

⁴³Ni wo tara wo sɔ Amalɛki mɔgɛnu anubɛ Kenan mɔgɛnu yakɔrɔ ka anu kɛlɛ, anu si wo dama faga. Mari sa wo fɛ mumɛ, bawo wo ara wo ban Marita kumɛ birala.”

⁴⁴Hali wo, anu ya anu tui ka ta kɔnɔ Marila tɔn-kenkirɛ anubɛ Musa ma bɔ dagɛ rɔ mumɛ!

⁴⁵Amalɛkinu anubɛ Kenannu nara anu taran kilɛ la. Wonu ya Isirɛla mɔgɛnu gbesi ka anu gben ha anu kera kan tinɛ do ma anu si na min tɔgɔ sa “Kasara Soe.”