Read Kuranko Yilan-Yilan Koe 16 Bible Online

Yilan-Yilan Koe 16 - Kuranko bible

Yilan-Yilan Koe 16

¹ Lifayila dan Kohati, wo ya den-kei sɔrɔn min tɔgɔ Isihari. Wo fananna dan tɔgɛ le Kora. Rubɛnla dan Pɛlɛti wo fananta den tɔgɛ le Ɔn. Rubɛnla dan doi fanan tɔgɛ le Ɛliyabu. Ɛliyabula den filɛnu tɔgɛ le Datan anubɛ Abairam. Kora wo, Ɔn wo, Datan wo, anubɛ Abairam,

²mɔgɔ nanɛ wonu murutiyara Musa ma. Mɔgɔ nanɛ kɛnubɛ Isirɛla mɔgɔ-ba-sɛbɛnɛnu mɔgɔ kɛmɛ fila, mɔgɔ bi-loli, wonu nara Musa anubɛ Aruna wara

³ka a fɔ anu ye ko, “Nfen ya a to, wo ara wo nyɛrɛ ma iko wo nyɔgɛ sa. Mɔgɔ-sɛnimɛ le ma damasi la kɔnɔ wole miri le ko Mari ara wole dɔrɔn yabɔ ka ma kun-tiginu na male kuma, wa? Ha! Wole, wo ara wotɛ kɛ latenbi!”

⁴Musa ya kumɛ wo lamɔɛn tumɛ min, a ya a maburun Mari kɔrɔ dugu ma.

⁵Wo kɔma, a ya a fɔ Kora anubɛ a ta-nyɔgɛ wonu ye ko, “Sina sɔgɔma, Mari si ata mɔgɛ yira ma la bawo Mari ye sɔnna mɔgɛ min na, a si mɔgɛ wo madon ale la.

⁶Ile Kora anubɛ i gba-fɛ-bilalɛnu, wo ye kɛ le mala sina. Wo ni na wola ta-kɔ-mirannu na wo bolo. Wo ni ta-wɔlɔnnu sa anu tɔ anubɛ isɛnti ka ta a la saraka-mintan-tinɛ iko saraka-masɔlɛ bɛnta ka a ma nya min. Sina, ma si a yen, Mari ara mɔgɛ min yabɔ ma tɛma wona. Wole, wo ara wotɛ latenbi!”

⁷

⁸Musa ya a fɔ Kora ye tun ko, “Wole Lifayi mɔgɛnu, wo ni wo tole masɔ.

⁹Mari ya wole layɛlɛ ka tenbi Isirɛla mɔgɛ toe kɛnu na. Wole ye Marita wɔlɛ kɛla ata Fani-Bɔn la ka a mɔgɛ toe mumɛ madɛnbɛ, ado wo ye mɔgɛnu anubɛ Mari tɛma. Wo dɔgɔ wole yala, wa?

¹⁰Mari ara gbiliya-belebele di wo ma. A sɔgɛ ye wo la, wo ni ma saraka-masɔla-kun-tigi-wɛnu na, wa?

¹¹Ni wo ya gbunya-kumɛ fɔ Aruna ma, wo ma a fɔ Aruna dɔrɔn ma de! Wo ya a fɔ Mari nyɛrɛ le ma ken!”

¹²Musa ya Datan anubɛ Abairam kele. Kɔnɔ anu ko, “Male sa tala.

¹³Ile Musa ara male labɔ Iyipiti nyamani-hakikɛ wo rɔ ka na male la wula-da-rakolɔn kɛ rɔ yan ma faga-koe le la, nyɛ? Wo ma a bɔ, wa? Kun-tigiyɛ di ile ye, nyɛ?

¹⁴I ma na male la nyamani-nyimɛ rɔ mumɛ! I ma dugu-hakikɛ di ma ma anubɛ ki-fen-hakikɛ. Wo ye ma yɛ lakirila ka ma yanfa. Nba, ma ti na sina worɔ mumɛ!”

¹⁵Wo kɔma, Musa yisi bɔra! A ya a fɔ Mari ye ko, “I kana sɔn anuta kɔ-fan la mumɛ! N ma ko-yogoma ma mɔgɛ kɛnu na! N ma anu bɔni fenfen na. Hali sofɛlɛ kelen, n ma wo bi anu bolo kɔ-fenyɛ la.”

¹⁶Musa ya a fɔ Kora ye tun ko, “Wobɛ i gba-fɛ-bilalɛ mɔgɔ kɛmɛ fila mɔgɔ bi-loli (250) ni na sina ka Mari taran ata Fani-Bɔn dɛ la. Wo si Aruna taran nyɔ fanan sina.

¹⁷Wo bɛɛsi ni na wola ta-kɔ-mirannu na wo bolo ka ta-wɔlɔn anubɛ isɛnti sa anu tɔ ka na wo la isɛnti mintan tinɛ kuma.”

¹⁸Anu damasi ya ta-wɔlɔn anubɛ isɛnti bi ka wonu sa ta-kɔ-mirannu tɔ ka ta anu sɔ Marita Fani-Bɔn dɛ la.

¹⁹Wo kɔma, Kora ya Isirɛla mɔgɔ damasi kele ka anu nadɛn Musa anubɛ Aruna yakɔrɔ Marita Bɔn don-dɛ la. Kakɛ wo rɔ, anu bɛɛsi ya Marila ta-waan yen anu yɛ la.

²⁰Mari ya a fɔ Musa anubɛ Aruna ye ko,

²¹“Wo mɔgɔ fila pe ni bɔ Isirɛla mɔgɛ kɛnu tɛma. N si mɔgɛ kɛnu nato kaka dogbe!”

²²Kɔnɔ Musa anubɛ Aruna ya anu maburun dugi ma ka Mari madiya ko, “E, Mari, ma ya a lɔn ko Allatala le ile la. Ile le ya mɔgɔ niyi dan. I si ke ka mɔgɔ niyi bi. Kɔnɔ i si na mɔgɛ kɛ bɛɛ niyi tinya mɔgɔ kelen peta hakɛla ko la, wa?”

²³Wo kɔma, Musa anubɛ Isirɛla mɔgɔ-ba bɛɛsi tara Datan anubɛ Abairam warɛ. Datan anubɛ Abairam anubɛ anuna denbayɛnu bɔra anuna fani-bɔnnu na ka sɔ anuna fani-bɔnnu da kɔrɔ. Iko Mari ya a fɔ nya min, Musa ya a fɔ a mɔgɛ toenu ye wo nya na le ko, “Wo ni wo bɔ mɔgɔ-yogomɛ kɛnuna fani-bɔnnu da fɛ. Wo kana wo bole tugu anu bolo-fan fenfen na. Ni min ya a bole tugu anu bolo-fan do la, wo si halaki anu fɛ anuta hakɛla ko la.” Isirɛla mɔgɔ damasi ya anu masɛgi mɔgɛ kɛnuna fani-bɔnnu na.

²⁸Musa ya a fɔ anu ye tun ko, “Wo si a lɔn kɛ le fɛ ko Mari le ya nde yabɔ. N ma n nyɛrɛ yabɔ n nyɛrɛta sako rɔ ka sɔ wole yarɔ.

²⁹Ni mɔgɛ kɛnu ma faga Allata kabana-koe do fɛ, wo si a lɔn wo rɔ ko Mari sa nde fɛ.

³⁰Kɔnɔ ni Mari ya kabana-koe do ma wo yala bi, wo ma min nyɔgɔn yen bɛ, wo si a lɔn wo rɔ ko mɔgɛ kɛnu bara anu ban Mari la feu! Dugu-dɛ la si ka anu kɔrɔ ka anu nakunu. Anuna denbayɛ wo, anu bolo-fen wo, wo dama kɛndɛ si yigi dugu kɔrɔ ka ta lakira.”

³¹A banta wo fɔla nya min wo, dugu-dɛ lakara Datan anubɛ Abairam kɔrɔ

³²ka anu kɛndɛ lakunu anubɛ anuna denbayɛ anubɛ anu bolo-fan damasi. Korata wɔli-kɛlɛnu fanan taranta anu tɛma. Wo kɔma, dugu-dɛ latogonta anu ma. Anu tununta yen!

³³

³⁴Mɔgɛ bɛɛ ya anu wɔrɔndɔ-kan lamɔɛn tumɛ min, wonu ya anu buri. Anu gbele-gbelenta ko, “Ma ni ma buri, dugi ye nala ma lakununa!”

³⁵Wo kɔma, Mari ya tɛ layigi mɔgɔ kɛmɛ fila, mɔgɔ bi-loli kuma minnu nara isɛnti la. Tɛ wo ya anu damasi mintan gburr!

³⁶Mari ya a fɔ Musa ye tun ko,

³⁷“A fɔ Saraka-Masɔlɛ Arunala dan Ɛliyasa ye ko a ni ta sila-ta-kɔ-miran wonu bi furi wonu bolo tɔ minnu bara faga anu nyɛrɛta hakɛla ko la. Wo ni ta-wɔlɔn wonu tanyɛnsɛn wula-yan la. Ta-kɔ-miran wonu sɛninyanɛ kamasɔrɔn mɔgɛnu bi nala anu na Marila saraka-mintan-tinɛ kuma nun. A ni ta-kɔ-miran wonu nadɛn ka anu tatugutugu ha anu ni dɛnfɛ. Wo kɔma, Ɛliyasa si a bi ka ta a sa Marila saraka-mintan-tinɛ tɔnkɔn bɛɛ ma. Kɛ si ma Isirɛla mɔgɛnu hɛnkili-bila-fan la.”

³⁸

³⁹Woletɔ Ɛliyasa ya a ma iko Mari ya a fɔ Musa ye nya min ka ta-kɔ-miran wonu bi furinu bolo tɔ ka miran wonu don a ta-nyɔgɛnu bolo. Wonu ya miran wonu tatugutugu ha anu ya anu dɛnfɛ. Ɛliyasa ya silɛɛ wo bi ka a sa saraka-mintan-tinɛ wo tɔnkɔn bɛɛ ma.

⁴⁰Miran-sɛnima-dɛnfɛnɛ wonu si ma wo hɛnkili-bila-fan la tɔn ko ko mɔgɔ-wo-mɔgɔ kana isɛnti mintan nyɔ fɔ Aruna anubɛ a kegeyɛnu. Wonu denu dɔrɔn si a mintan nyɔ. Aruna kegeya ma minnu na, wonu fanan si halaki iko Kora anubɛ a gba-fɛ-bilalɛnu mara nya min.

⁴¹Wo wulun sɔgɔma, Isirɛla mɔgɛ bɛɛsi ya gbunya-kumɛ dabira Musa anubɛ Aruna ma ka a fɔ ko, “Wole ya Marita mɔgɛ donu faga le, yɔ!”

⁴²Mɔgɛ kɛnu tora da-kɔrɔ-kumɛ kɛ fɔla tumɛ min, anu ya anu tintan Marita Bɔn wara la ka Marita banda-fin-gbɛ yen ata Fani-Bɔn kuma. Anu ya Marita ta-waan yen banda-fin-gbɛ wo rɔ.

⁴³Musa anubɛ Aruna tara anu sɔ Marita Fani-Bɔn don-dɛ la.

⁴⁴Mari ya a fɔ Musa ye ko,

⁴⁵“Wo ni wo masɛgi mɔgɛ kɛnu na. N si anu halaki tiriya!” Musa anubɛ Aruna ya anu maburun dugi ma Mari kɔrɔ.

⁴⁶Musa ya a fɔ Aruna ye ko, “Ta tiriya ka isɛnti-munke bi anubɛ ta-wɔlɔn do ka bɔ saraka-mintan-tinɛ kuma. I ni wonu sa ila ta-kɔ-miran rɔ bawo Mari fonde ara bɔ ha a ara kiraya-fitinɛ layigi Isirɛla mɔgɛnu kuma. I tiriya ka ta mɔgɛnu bara la alako anu hakɛ yama si togon iko i duruta a mala nya min.”

⁴⁷Aruna ya Musala kumɛ bira. A burumatoe tara ka ta a sɔ mɔgɛnu tɛma. A ya a yen ko kirayɛ ara wara ka a dan-natenbi. A ya isɛnti bi ka a ke ta-wɔlɔn wo kuma ta-kɔ-miran rɔ. Wo sisi yɛlɛta. A ya wo ma kɔ-fan la Mari ye alako Isirɛla mɔgɛ wonu hakɛ yama si togon iko anuna namu ye nya min.

⁴⁸Wo kɔma, kirayɛ tenbira. Aruna tora sɔnɛ kɛndɛwaganu anubɛ furinu tɛma.

⁴⁹Mɔgɛ minnu fagara Kora fɛ, ni anu ma wonu sa mɔgɛ kɛnu kuma minnu fagara kiraya-fitinɛ bolo, mɔgɛ kɛnu yatɛ si ma mɔgɔ waga tan-ni-nani mɔgɔ kɛmɛ wɔrɔnfila (14,700) la.

⁵⁰Kirayɛ wo tenbira tumɛ min, Aruna sɛgira a kɔma tun Musa wara la.