Read Kuranko Yilan-Yilan Koe 23 Bible Online

Yilan-Yilan Koe 23 - Kuranko bible

Yilan-Yilan Koe 23

¹Belam ya a fɔ Balaki ye ko, “I ni saraka-bɔ-tina wɔrɔnfila ladan n ye yan tɔ. I ni na tura wɔrɔnfila la anubɛ saga-yigi wɔrɔnfila la i bolo.”

²Mansa Balaki ya a ma iko a ya a fɔ a ye nya min. A ya turɛ anubɛ saga-yiginu mintan saraka-bɔ-tinɛ kɛnu kuma.

³Wo kɔma, Belam ya a fɔ Mansa Balaki ye ko, “I sɔ ila sarakɛ kɛnu dafɛ ka n makɔnɔ anu tɔgɔfɛ. N ni ta n dan na. Tumado Mari si kuma n na. N ni a lɔn a ye nala min fɔla n ye. A ya fenfen fɔ n ye, n si a ma, i ni wo lɔn.” Ale kelen pe yɛlɛta a ma a dan na.

⁴Mari tara a taran nyɔ. Belam ya a fɔ Mari ye ko, “N bara saraka-bɔ-tina wɔrɔnfila ladan. N bara tura kelen anubɛ saga-yigi kelen mintan saraka-bɔ-tina kelen-kelannu kuma i ye.”

⁵Mari ya kuman-kan don Belam bolo a si ta min fɔ Mansa Balaki ye.

⁶A tara mansɛ anubɛ ala mɔgɔ-ba-sɛbɛnɛnu sɔnɛ taran anu gbɛ rɔ.

⁷Belam donta wɔlɔyiya-kuma-fɔɛ rɔ. A ko, “Mohabu Mansɛ Balaki ara na n na ka bɔ Siriya nyamanɛ rɔ tele-bɔɛ wara la kɔnkɔ-nyamanɛ rɔ. A ya a fɔ n ye ko n ni na kuma ale ye. N ni Isirɛla mɔgɛnu danka ale ye.

⁸Kɔnɔ nde si mɔgɛ kɛnu danka kama Alla ma minnu danka? Nde si kuma-yogomɛ fɔ mɔgɛ kɛnu ma kama, ni Alla ma min fɔ anu denu ma?

⁹N tenbi kɔnkɔ-kolo-wɛ kuma, n si anu yen. N tenbi kɔnkɔ-layan-bɛ kɛ kuma, n bi anu tagbɛla feu! Mɔgɛ le kɛnu na minnu ti basan sibolo-gbɛrɛkɛnu na. Mɔgɛ le kɛnu na minnu si anu sigi anu dan na yiri!

¹⁰Mɔgɛ ti ke kɛnu danna. Anu siya iko gbangban. Alamɛ nna ban mara iko Isirɛla mɔgɛ kɛnu. N ba faga wati min, alamɛ n mara iko mɔgɔ-telennɛ kɛnu!”

¹¹Mansa Balaki ya a fɔ a ye ko, “I wara nfen ma n na kɛ la? N nara ile la yan ka n yoge kɛnu danka nde ye. Kɔnɔ ile ma sɔn anu danka-koe ma mumɛ, fɔ ka duwa anu ye dɛɛ!”

¹²Belam ya a yabi ko, “Mari ye min fɔla nde ye, nde ye wo le dɔrɔn fɔla i ye.”

¹³Hali wo, Mansa Balaki yisi ma kima. A ya a fɔ Nɛbi Belam ye tun ko, “Ma ni ta kan-tina-gbɛrɛ i si Isirɛla tɔnkɔn donu yen kan min. I si ke anu dankala n ye nyɔ le.”

¹⁴Anu tara Pisiga kɔnkɔ-ralɛɛnɛ kuma. Kan tinɛ wo tɔgɛ le, “Nyamanɛ Mafɛlɛn Tinɛ.” Mansa Balaki ya saraka-mintan-tina wɔrɔnfila ladan nyɔ ka tura kelen anubɛ saga-kɔndɔn kelen mintan saraka-mintan-tina-kelen-kelannu kuma.

¹⁵Wo kɔma, Belam ya a fɔ a ye ko, “I sɔ ila sarakɛ kɛnu dala yan tɔ ka n makɔnɔ anu dafɛ. N bi tala Mari taranna pan tɔ.”

¹⁶Mari tara a taran nyɔ. Mari ya kuman-kan don Belam bolo ka ta a fɔ mansɛ ye.

¹⁷A tara mansɛ anubɛ ala mɔgɔ-banu sɔnɛ taran anu gbɛ rɔ saraka wonu dafɛ. Mansɛ wo ya Nɛbi Belam manyinika ni Mari ya min fɔ a ye.

¹⁸Belam ya wɔlɔyiya-kumɛ dabira ko, “Mansa Balaki, i madon n na. N bi nala min fɔla i ye, i ni i tolo masɔ wo la.

¹⁹Alla sa iko mɔgɔni-finyɛ minnu si foninyɛ fɔ. A ti a miriya yɛlɛma iko hadama-dannu. A ya lanyiri kiri fenfenna ko la, a si wo ma, yɔ! Ni a kumara, a ara ban.

²⁰A ya n sɔ ko n ni duwɛ kɛ. Ni Alla ya duwɛ minnu kɛ, nde ti ke wonu yɛlɛmana tun.

²¹N bara a yen, wati ye nala, Isirɛla mɔgɛ kɛnu ti nanparan mumɛ sɔrɔn. Anuta Mari Alla ye anu fɛ. Anu si a fɔ ka a gbɛ feu, ko anuta mansɛ le Alla la.

²²Alla nara anu denu na ka bɔ Iyipiti. A ye kɛlɛ kɛla anu ye iko sigi-dalamɛ.

²³Bɛsi sa nyɔ min si ko ma anu na. Suwagayɛ mako sa anu na. Mɔgɛnu si kawa anu ma, anu ni a fɔ ko, ‘Wo ni mɔgɛ kɛnu mafɛlɛn ba, Alla ya min ma anu ye.’

²⁴Isirɛla mɔgɛ kɛnu mani de iko yara-yuwan. A ti a sulen fɔ a buyi wa fa. Ni a ya min faga, fɔ a wa ban wo yele manɛla.”

²⁵Mansɛ ya a fɔ Belam ye ko, “Ni ile ti sɔn mɔgɛ kɛnu danka-koe ma, nba, hali i ma duwa anu ye wo rɔ.”

²⁶Belam ya a yabi ko, “N ma a fɔ i ye nun ko Alla wa min fɔ n ye, n bi wo le fɔla ile ye?”

²⁷Balaki ya a fɔ a ye tun ko, “Bila n fɛ. Ma ni ta kan-tina-gbɛrɛ. Tumado Mari si a ma, i ni mɔgɛ kɛnu danka n ye nyɔ.”

²⁸A ya Belam bi ka ta a la Piyɔri kɔnkɛ kuma. Anu tenbi nyɔ, anu si wula-da-rakolɔn ragbɛ feu!

²⁹Nɛbi Belam ya a fɔ a ye ko, “I ni saraka-mintan-tina wɔrɔnfila ladan yan tɔ. I ni na tura wɔrɔnfila anubɛ saga-kɔndɔn wɔrɔnfila la i bolo.”

³⁰Mansa Balaki ya a ma iko a ya a fɔ a ye nya min ka tura kelen anubɛ saga-kɔndɔn kelen mintan saraka-mintan-tina-kelen-kelan bɛɛ kuma.