Read Kuranko Yilan-Yilan Koe 24 Bible Online

Yilan-Yilan Koe 24 - Kuranko bible

Yilan-Yilan Koe 24

¹Kɔnɔ kaka gbɛ, Belam nyɛrɛ ya a lɔn ko a sɔgɛ ye Mari la, ale ni duwa Isirɛla mɔgɛ wonu ye. Woletɔ a ma a nyɛrɛ tɔrɔ iko a duruta nya-nyini-kɛla nya min. A ya a yɛ lamunun wula-da-rakolɔn la,

²ka Isirɛla mɔgɛnu daga-makɛnɛ yen. Anuna bɔnsɔn faranɛ iko anu siginɛ nya min. Marita Sɛnbɛ donta a sɔndɔmɛ rɔ

³ka wɔlɔyiya-kumɛ kɛ fɔ mansɛ ye ko, “Sarakanɛ le kɛ la nde, Beyorila dan Belam bolo ka a fɔ wo ye bi. N bara wula-yanna-koe ragbɛ.

⁴N bara Alla kuman-kan nya-yen. Alla Sɛnbɛ-Bɛɛ-Tigi ara ko-rayirɛ kɛ n ye. N bara n sa dugi ma Alla kɔrɔ, n yɛ la ara ka. Nde le nyɛrɛ ye kɛ fɔla wo ye yati!

⁵Hɛɛ! Isirɛla mɔgɛnuna sigi tinɛnu kin!

⁶Anuna fani-bɔnnu sɔnɛ tala anu sansan-yili ma iko tin-kurinu. Anu kin iko nakɔɛ minnu bi bɛ dafɛ. Anu kin iko lɛnkɛ-gbɔngbɔn Marita nakɔɛ rɔ iko bandan-kuru-wɛ min bi yi dala.

⁷Anu si yiri ka siyaya. Anu kegeyɛnu si taran nyamani-siyaman tɔ. Anuna mansɛ si fanka sɔrɔn ka tenbi Amalɛki Mansɛ Ekagi la. Ata mansaya-sɛnbɛ si koloya ka ke kan-tina-siyaman tɔ.

⁸Alla ya anu nabɔ Iyipiti. A si kɛlɛ kɛ Isirɛla mɔgɛnu ye iko sigi-dalamɛ. Anu si anu yogenu faga ka anu kolenu takeri ka anuna kalabɛnnu takerikeri.

⁹ Isirɛla mɔgɛnu manɛ iko yara-feremɛnu. A tenbi kinɔgɔla, mɔgɔ-wo-mɔgɔ ti kerinteya a lakundenna. Ni min duwara Isirɛla mɔgɛnu ye, wo tigi si duwɛ sɔrɔn. Ni min ya anu danka, wo tigi si dankɛ sɔrɔn.”

¹⁰Mansa Balaki ya a bole lagbu yisi-tinya bolo. A ya a fɔ Nɛbi Belam ye ko, “N ya ile kele ko i ni n yogenu danka n ye. Kɔnɔ a sawa nyɔgɛ le kɛ la gbɛ, i ye duwala anu ye.

¹¹Sɛgi i warɛ i bɔra kan min. N ya lanyiri kiri i ye ko n si i sara kɔnɔ Mari ya a ma, i ti fenfen sɔrɔn n bolo tun.”

¹²Nɛbi Belam ya a fɔ a ye ko, “N ma n sara ila kilayɛnu na nun ko

¹³hali i ya i bolo-fan damasi di n ma, n ti nta Mari kuman-kan boloka ka n nyɛrɛ diyana-kumɛ fɔ. Mari ye min fɔla n ye, n bi wo le dɔrɔn fɔla i ye!”

¹⁴A ya a fɔ mansɛ ye tun ko, “N bi sɛgila n kɔma nna mɔgɛnu bara. Kɔnɔ samani n ni ta, n ni i makawandinu to. Isirɛla mɔgɛnu bi nala min mala ila mɔgɛnu na wati-natoe, n si wo fɔ i ye.”

¹⁵Wo wɔlɔyiya-kumɛ le kɛ la Belam ya min fɔ ko, “Sarakanɛ le kɛ la nde, Beyorila dan Belam bolo ka a fɔ i ye bi.

¹⁶N bara wula-yanna-koe ragbɛ. N bara Alla kuman-kan nya-yen. N bara hɛnkili sɔrɔn ka bɔ Alla Min Bi Fan Bɛɛ Kun Na. Alla Sɛnbɛ-Bɛɛ-Tigi ara ko-rayirɛ kɛ n ye. N bara n sa dugi ma Alla kɔrɔ. N yɛ la ara ka. Nde le nyɛrɛ ye kɛ fɔla wo ye yati!

¹⁷‘N bi wula-yanna-koenu yenna nala kɔnɔ a ma ke wɛ fɔlɔn. N bi mansɛ do yenna nala ka bɔ Isirɛla mɔgɛnu tɛma kɔnɔ a fɛ-yan fɔlɔn. A ye malanna iko lolo-malanni-wɛnu. A si Mohabu kun-tiginu kunyɛ ratii. A si mɔgɔ-wasinɛnu anubɛ kɛlɛ-tɛgɛlɛ kɛnu tinya feu!

¹⁸A yoge minnu bi Idɔm nyamanɛ rɔ, a si wonu kasara. A si nyamanɛ wonu ma a nyɛrɛtɛ la. Kɔnɔ hali wo, Isirɛla mɔgɛnu si to fanka sɔrɔnna dɛɛ!

¹⁹Anu si to anu yogenu tadonna anu kian kɔrɔ iko bore. Anu si to anu fagala ka anu ban fegba!’ ”

²⁰Mari ya ko-rayirɛ kɛ Nɛbi Belam ye Amalɛki mɔgɛnuna ko la. A ya wɔlɔyiya-kumɛ doni fɔ anuna ko la. “Fanka-tigi le Amalɛki mɔgɛnu na ka tenbi mɔgɛ kɛnu na kɔnɔ hali wo, ala ban anu si kasara pɔ!”

²¹Mari ya ko-rayirɛ kɛ a ye tun Kena mɔgɛnuna ko la ka wɔlɔyiya-kumɛ donu fɔ anuna ko la. “Wole siginɛ kan min, nyɔ latankani de! Wole siginɛ kɔnkɔ wa latelennɛ kuma.

²²Kɔnɔ Asiriya mɔgɛnu ba na wo bira tinɛ wati min, wole Kena mɔgɛnu si halaki.”

²³Nɛbi Belam ya wɔlɔyiya-kumɛ kɛ fɔ tun. “Yon bi mɔgɛ kɛnu na minnu bi anu nadɛnna kantɔ-wara la?

²⁴Mɔgɛ kɛnu si na yi kuma ka bɔ Saiparasi yi-tɛma-dugi rɔ. Anu si Asiriya anubɛ Iburu mɔgɛnu nɔ. Kɔnɔ mɔgɛ wo minnu bi nala ka bɔ Saiparasi, wonu si faga ka ban feu!”

²⁵Wo le mara Belam wulumatoe la gbɛ ka ta, a bɔra kan min.