Read Kuranko Yilan-Yilan Koe 26 Bible Online

Yilan-Yilan Koe 26 - Kuranko bible

Yilan-Yilan Koe 26

¹ Isirɛla mɔgɛnuna fagalɛ kɔma, Mari ya a fɔ Musa anubɛ Saraka-Masɔla Ɛliyasa ye ko,

²“I ni Isirɛla mɔgɛnu dan kebilɛnu ma, kei minnu sɔrɔn ara san mogan bɔ ha ka tenbi wo la, minnu si ke tala kɛlɛ rɔ, kɔni.”

³Musa anubɛ Ɛliyasa ya a ma iko Mari ya a fɔ anu ye nya min. Anu damasi ladɛnta Yorodan bɛ dafɛ Yɛrikɔ ya-telen ma. Isirɛla mɔgɛ le kɛnu na minnu bɔra Iyipiti.

⁵Yakobala den-kei-sarɛ le Rubɛn na. Rubɛn fanan ya den-kei mɔgɔ nani sɔrɔn. Wonu tɔgɛ le Hanoki, Palu, Hɛsirɔn, anubɛ Karimi.[26]

⁸Ala den Palu ya den-kei do sɔrɔn min tɔgɛ le ko Ɛliyabu. Ɛliyabu fanan ya den-kei mɔgɔ sawa sɔrɔn. Wonu fanan tɔgɛ le Nɛmuwɛli, Datan, anubɛ Abairam. Isirɛla mɔgɛnu ya Datan anubɛ Abairam ma kun-tiginu na nun. Kun-tigi kɛnu denu wulita Musa kan ma ka kofu Kora anubɛ a gba-fɛ-bilalɛnu ma nun.

¹⁰Dugi dɛ lakara anu kɔrɔ ka anu nakunu. Tɛ ya Kora gba-fɛ-bilalɛ mɔgɔ kɛmɛ fila mɔgɔ bi-loli (250) mintan gburr!

¹¹Kɔnɔ Korata den-keminɛnu ma faga anu fɛ wati wo rɔ. Mɔgɛ kɛnu wara-koe mara kawandili-ba la Isirɛla mɔgɛnu tɛma. Rubɛn bɔnsɔn bɛnta mɔgɔ waga bi-nani mɔgɔ waga sawa mɔgɔ kɛmɛ wɔrɔnfila ani mɔgɔ bi-sawa (43,730) ma. Simiyɔn Bɔnsɔn Mɔgɛnu Dan-Koe

¹²Simiyɔn ya den-kei mɔgɔ loli sɔrɔn. Wonu tɔgɛ le Nɛmuwɛli, Yamin, Yakin, Seraha, anubɛ Sala. Simiyɔn bɔnsɔn bɛnta mɔgɔ waga mogan mɔgɔ waga fila ani mɔgɔ kɛmɛ fila (22,200) ma.

¹⁵Kadi ya den-kei mɔgɔ wɔrɔnfila sɔrɔn. Wonu tɔgɛ le kɛnu na, Sɛfiyon, Hagi, Suni, Asini, Ɛri, Arada, anubɛ Arɛli. Kadi bɔnsɔn bɛnta mɔgɔ waga bi-nani ani mɔgɔ kɛmɛ loli (40,500) ma.

¹⁹Yuda ya den-kei mɔgɔ loli sɔrɔn. Wonu tɔgɛ le kɛnu na, Sela, Pɛrɛsi, Seraha, Ɛri, anubɛ Onan, kɔnɔ Ɛri anubɛ Onan fagara Kenan nyamanɛ rɔ. Yuda bɔnsɔn bɛnta mɔgɔ waga bi-wɔrɔnfila mɔgɔ waga wɔrɔ ani mɔgɔ kɛmɛ loli (76,500) ma. Pɛrɛsi ya den-kei fila sɔrɔn. Anu tɔgɛ le Hɛsirɔn anubɛ Hamula.

²³Isakari ya den-kei mɔgɔ nani sɔrɔn. Wonu tɔgɛ le Tola, Pusa, Yasubu, anubɛ Simirɔn. Isakari bɔnsɔn bɛnta mɔgɔ waga bi-wɔrɔ mɔgɔ waga nani ani mɔgɔ kɛmɛ sawa (64,300) ma.

²⁶Sɛbulɔn ya den-kei mɔgɔ sawa sɔrɔn. Wonu tɔgɛ le kɛnu na, Sɛrɛdi, Hilon, anubɛ Yaliyɛli. Sɛbulɔn bɔnsɔn bɛnta mɔgɔ waga bi-wɔrɔ ani mɔgɔ kɛmɛ loli (60,500) ma.

²⁸Yusufu ya den-kei mɔgɔ fila sɔrɔn. Kelan tɔgɛ le Manasa. A fila nyɔgɔn tɔgɛ le Ifɛrɛm. Mɔgɔ filɛ wonu mara bɔnsɔn-kun-tiginu na.

²⁹Manasa fanan ya den-kei mɔgɔ fila sɔrɔn, Makiri anubɛ Asirɛli. Makiri fanan ya Kaliyadi sɔrɔn. Kaliyadi fanan ya den-kei mɔgɔ wɔrɔ sɔrɔn. Wonu tɔgɛ le kɛnu na, Iyasa, Helaki, Asirɛli, Sɛkɛm, Sɛmida, anubɛ Hifa. Manasa bɔnsɔn bɛnta mɔgɔ waga bi-loli mɔgɔ waga fila ani mɔgɔ kɛmɛ wɔrɔnfila (52,700) ma. Kaliyadila dan Hifa, wo fanan ya den-kei filasɔrɔn. Den kei filɛ kɛ, mɔgɔ kelen, anu bi a fɔla min ma ko Silafihadi, wole ya dunmusu mɔgɔ loli sɔrɔn. Wonu tɔgɛ le kɛnu na, Mala, Nowa, Hagila, Milaka, anubɛ Tirisa.

³⁵Ifɛrɛm ya den-kei mɔgɔ sawa sɔrɔn. Wonu tɔgɛ le kɛnu na, Sutɛla, Bika, anubɛ Tahan. Kɔnɔ Sutɛla kɛ ya Ɛran sɔrɔn. Ifɛrɛm bɔnsɔn bɛnta mɔgɔ waga bi-sawa mɔgɔ waga fila anubɛ mɔgɔ kɛmɛ loli (32,500) ma.

³⁸Bɛnyamɛ ya den-kei mɔgɔ loli sɔrɔn. Wonu tɔgɛ le Bela, Asiba, Ahiram, Sefufam, anubɛ Hufam. Bela wo fanan ya den-kei mɔgɔ fila sɔrɔn. Mɔgɔ filɛ wonu tɔgɛ le kɛnu na, Adi ani Neyaman. Bɛnyamɛ bɔnsɔn bɛnta mɔgɔ waga bi-nani mɔgɔ waga loli ani mɔgɔ kɛmɛ wɔrɔ (45,600) ma.

⁴²Dan ya den-kei kelen pe le sɔrɔn. Wo tɔgɛ le Suham. Dan bɔnsɔn bɛnta mɔgɔ waga bi-wɔrɔ mɔgɔ waga nani anubɛ mɔgɔ kɛmɛ nani (64,400) ma.

⁴⁴Asɛra ya den-kei mɔgɔ sawa sɔrɔn. Wonu tɔgɛ le Imina, Yɛsuwi, anubɛ Bɛriya. A ya den musi kelen fanan sɔrɔn min tɔgɛ le Sera. Ala den-kei Bɛriya fanan ya den-kei mɔgɔ fila sɔrɔn. Kelen tɔgɛ le Makiyɛli, doi wo tɔgɛ le Hibɛri. Asɛra bɔnsɔn bɛnta mɔgɔ waga bi-loli mɔgɔ waga sawa ani mɔgɔ kɛmɛ nani (53,400) ma.

⁴⁸Nafatali ya den-kei mɔgɔ nani sɔrɔn. Wonu tɔgɛ le Yasila, Kuni, Yesa, anubɛ Silɛm. Nafatali bɔnsɔn bɛnta mɔgɔ waga bi-nani mɔgɔ waga loli anubɛ mɔgɔ kɛmɛ nani (45,400) ma.

⁵¹Mɔgɛ wo mumɛ bɛɛsi lakofunɛ bɛnta mɔgɔ waga kɛmɛ wɔrɔ mɔgɔ waga kelen, mɔgɔ kɛmɛ wɔrɔnfila anubɛ mɔgɔ bi-sawa (601,730) ma.

⁵² Mari ya a fɔ Musa ye ko,

⁵³“Wo ni nyamanɛ tala bɔnsɔnnu tɛma koron-nakɛ fɛ iko anu siya nya min. Bɔnsɔn min siya, nyamani-kinamɛ si to wonu ye. Bɔnsɔn min ma siya, nyamani-dɔgɔmɛ si to wonu ye.”

⁵⁷Lifayi ya den-kei mɔgɔ sawa sɔrɔn. Wonu tɔgɛ le Kɛrisɔn, Kohati, anubɛ Mɛrari. Wonu fanan ya anuta den-keinu sɔrɔn. Anuta dan do tɔgɛ le Libini, Hiburɔn, Mahali, Muuse, ani Kohati mamanɛ Kora. Den-kei do fanan bi Kohati bolo. A tɔgɛ le Amiram. Amiram wo ya a tɛnɛ-musi Yakabɛdi furu min sɔrɔnta Iyipiti. Wonu ya den-kei fila sɔrɔn anubɛ dunmusi kelen. Mɔgɔ filɛ wonu tɔgɛ le Aruna anubɛ Musa. Dunmusi kelan wo fanan tɔgɛ le Miriyam.

⁶⁰ Aruna ya den-kei mɔgɔ nani sɔrɔn. Mɔgɔ nani wonu tɔgɛ le kɛ la, Nedabu, Abaihu, Ɛliyasa, anubɛ Itamarayi.

⁶¹ Nedabu anubɛ Abaihu nara tɛ la Marila saraka-bɔ-tinɛ kuma a ma bɛn anu ni na min na. Wo le ya a ma, Mari ya anu faga nyɔ rɔ.

⁶²Anu ya Lifayi keimɛnu dan ka a fɔlɔ min sɔrɔn ara karɛ kelen bɔ ha ka tenbi wo la, anu yatɛ bɛnta mɔgɔ waga mogan, mɔgɔ waga sawa (23,000) ma. Kɔnɔ anu bi Isirɛla mɔgɛnu danna tumɛ min, Lifayi mɔgɛnu ma kofu anu ma bawo anu ma nyamanɛ sɔrɔn anu nyɛrɛ ma.

⁶³Musa anubɛ Aruna ya Isirɛla mɔgɛnu tɔgɛ sɛbɛ fɔlɔn Sinayi wulɛ rɔ. Wo tumɛ Isirɛla mɔgɛnu daga makɛnɛ Mohabu lɛɛ rɔ Yorodan bɛ dafɛ Yɛrikɔ ya-telen ma, Musa anubɛ Ɛliyasa ya mɔgɛ kɛnu tɔgɛ sɛbɛ tun.

⁶⁴Ka dabira Musa anubɛ Aruna ya mɔgɛnu dan tumɛ min ka a sigi ha Ɛliyasa anubɛ Musa ya mɔgɛ dan tumɛ min, mɔgɔ-wo-mɔgɔ ma to a niyi la fɔ mɔgɔ fila pe.

⁶⁵ Mɔgɔ filɛ wo tɔgɛ le kɛnu na, Yɛfunɛla dan Kelabu anubɛ Nunna den-kei Yasowa. Mari ya a fɔ fɔlɔ nun ko a mɔgɛ toe kɛ bɛɛ si faga wula-da-rakolɔn rɔ. Wo bɛɛ mara iko Mari ya a fɔ nya min.