Read Kuranko Yilan-Yilan Koe 32 Bible Online

Yilan-Yilan Koe 32 - Kuranko bible

Yilan-Yilan Koe 32

¹Ninki siyaman bi Rubɛn bɔnsɔn anubɛ Kadi bɔnsɔn bolo. Anu ya a yen ko Yasa anubɛ Kaliyadi duginu kin, ado bin siyaman bi nyɔ anuna kolo-fannu si min dɔn.

²Woletɔ anu tara Musa anubɛ Ɛliyasa anubɛ kun-tiginu wara ka a fɔ anu ye ko,

³“Ma ya a lɔn ko Mari ya soe kɛnu di ma ma ka a mɔgɛ bɛɛsi faga. Ataroti wo, Dibon wo, Yasa wo, Nimira wo, Hɛsibɔn wo, Ɛlɛyela wo, Sibima wo, Nibɔ wo, Biyɔn wo, ma ya wo bɛɛ bi anu bolo. Ma ya a yen ko nyamanɛ wo kin ninkinu ye, ado ninki siyaman bi ma bolo.

⁵Wo yandi, ma ni nyamanɛ kɛ sɔrɔn ma nyɛrɛ ma. Hali male ma ta Yorodan bɛ kɔgɔma ka ma sigi nyɔ.”

⁶Musa ya anu yabi ko, “A sɔgɛ ye wole la, wo ni to yan tɔ, wo ta-nyɔgɛnu ni ta kɛlɛ rɔ, wa?

⁷Wo si ma yisi-tinyɛ la wo ta-nyɔgɛnu bolo anu tenbi bɛ tɛgɛla ka ta kɛlɛ rɔ, Mari ya kan tinɛ min di wo ma.

⁸ Wo fanu ya a ma ka le wo tumɛ n ya anu nabɔ Kɛdɛsi-Baniya soe ka ta nyamanɛ wo lakɔrɔsi tinɛ.

⁹Anu tara wula-yan la ha Tɔnsɔn fole ma ka Kenan nyamanɛ mafɛlɛn. Wonu nara tumɛ min, anu ya anu ta-nyɔgɛnu yisi tinya alako anu kana ta lanyiri-nyamanɛ wo rɔ Mari ya min di anu ma.

¹⁰ Wo wulɔn tele nyɛrɛ rɔ, Mari fonde bɔra ha a kumara a sɛnbɛ la. A ko,

¹¹‘Bawo wo ma la n na min kɛ ka a dabira min sɔrɔn ara san mogan bɔ, n ya lanyiri-nyamanɛ min di Iburayima anubɛ Isiyaka anubɛ Yakoba ma, wo do-wo-do ti don nyɔ rɔ.

¹²Wo dama si faga fɔ mɔgɔ fila pe, Yɛfunɛla dan Kelabu anubɛ Nunna dan Yasowa. Mɔgɔ fila pe wonu denu lara nde, Mari la.’ ”

¹³Musa ya a fɔ tun ko, “Mari fonde ara bɔ ko-yogoma-kɛlɛ wonu kuma, woletɔ a ya a ma, anu yilan-yilanta san bi-nani kɔrɔ wulɛ rɔ ha mɔgɔ fɔlɔtɛ wo bɛɛ fagara feu!

¹⁴Kaka, a sɔgɛ ye wole la, wo ni wo sanka wo fanu ma iko anu ya hakɛ kɛ nya min, wa? A sɔgɛ ye wole la, Mari ni diminya Isirɛla mɔgɛnu ma tun ka tenbi a fɔlɔtɛ la?

¹⁵Wole Rubɛn bɔnsɔnnu anubɛ Kadi bɔnsɔnnu, ni wo ya wo ban tala wo ta-nyɔgɛ kɛnu fɛ, Mari si Isirɛla mɔgɛ mumɛ bɛɛsi boloka, ado ni Isirɛla mɔgɛ kɛnu fagara, wo nanparan si to wole kuma, yɔ!”

¹⁶Bɔnsɔn filɛ wonu ya anu madon Musa la, anu ko, “Ni i si sɔn, ma ni karakaran do ladan mala kolo-fannu ye, anubɛ tarɛ ka a mini mala soenu ma alako mala dannu anubɛ mala musinu ni kisi.

¹⁷Wo kɔma, ma si wuli ka ta kɛlɛ-kɛ-tinɛ ma ta-nyɔgɛnu yarɔ. Ma si a ma ha, anu fanan si anuta nyamanɛ sɔrɔn. Woletɔ ma tenbi kɛlɛ rɔ, mata mɔgɛnu si kisi soe wonu tɔ alako yan-mɔgɛnu kana na nɔ-ko sɔrɔn anu ma.

¹⁸Ma ti sɛgi mumɛ fɔ ma ta-nyɔgɛnu ba anuta nyamanɛnu sɔrɔn, yɔ!

¹⁹Ma ti dugu-wo-dugu bi bɛ kɔgɔma ma ta-nyɔgɛnu tɛma bawo male ara matɛ sɔrɔn yan bara la Yorodan bɛ tele-bɔɛ.”

²⁰Musa fanan ya anu yabi ko, “Ni wo sɛbɛ le, wo si wo mabɛn kɛlɛ-kɛ-koe la. Wo ni wo miri ko Mari kolan ye wo la.

²¹A wati wa ke tumɛ min, Mari si sɔ wo yarɔ. Wo ni bɛ tɛgɛ. Wo si wo yogenu kɛlɛ ha wo si fanka sɔrɔn anu kuma. Mari ni anu faga wo ye

²²ha nyamanɛ si to wo bolo. Wo wa ban wo mumɛ mala, wo ara wota lanyiri kanbali worɔ Mari ye anubɛ wo ta-nyɔgɛnu ye worɔ. Wo si sɛgi wo warɛ. Mari si sɔn worɔ, Yorodan bɛ tele-yigi kɛ ni ma wole fanantɛ la.

²³N bi wo makawandila, ni wo ya lanyiri kɛ tinya, wo ara hakɛ kɛ Mari la worɔ. Wo la a la serr, ko wo hakɛ-yulumu si wo bira gben!

²⁴Wo ni ta wola karakarannu nadan tinɛ anubɛ wola tarɛnu wola soenu ma kɔnɔ wo kana nyina wola lanyiri ko muk!”

²⁵Kadi bɔnsɔn-kun-tiginu anubɛ Rubɛn bɔnsɔn-kun-tiginu ya a fɔ Musa ye ko, “Ma fa, male, ita wɔli-kɛlɛnu si a ma iko i wara a fɔ ma ye nya min.

²⁶Mala musinu wo, mala dannu wo, anubɛ mala kolo-fannu, ma si wo damasi to ma kɔma Kaliyadi nyamanɛ kɛ rɔ.

²⁷Ma dama si wuli ka ta kɛlɛ-kɛ-tinɛ Mari fɛ. Ma si Yorodan bɛ tɛgɛ iko i wara a fɔ ma ye nya min.”

²⁸ Musa ya a fɔ Ɛliyasa anubɛ Yasowa anubɛ Isirɛla bɔnsɔn-kun-tigi toenu ye ko,

²⁹“Ni Kadi bɔnsɔn anubɛ Rubɛn bɔnsɔn kɛlɛ-dannu ya Yorodan bɛ tɛgɛ Marita tɔn-kenkirɛ yarɔ, wo si a ma, anu ni Kaliyadi nyamanɛ kɛ sɔrɔn. Fɔ anu ni wo dɛnbɛ Kenan nyamanita-mɔgɛnu kɛlɛla ka anu faga.

³⁰Ni anu ma sɔn bɛ tɛgɛla ka ta wo fɛ kɛlɛ-kɛ-tinɛ, anu ti anuta nyamanɛ sɔrɔn yan fɔ Kenan nyamanɛ rɔ wo dafɛ.”

³¹Kadi anubɛ Rubɛn bɔnsɔn-kun-tiginu ya Musa yabi ko, “Nba, ma fa Musa, ma si a ma iko Mari ya a fɔ nya min, yɔ!

³²Ni Mari sɔnta, ma si bɛ tɛgɛ ka ta Kenan nyamanɛ kɛlɛ-kɛ-tinɛ. Woletɔ male fanan si matɛ sɔrɔn Yorodan bɛ kɔma tele-yigi wara la.”

³³Amora Mansɛ Saihɔnta nyamanɛ wo anubɛ Basan Mansɛ Ɔkuta nyamanɛ wo, Musa ya wonu bi ka anu di Manasa bɔnsɔn tɔnkɔn kelan ma anubɛ Kadi bɔnsɔn anubɛ Rubɛn bɔnsɔn ma. Anu ya soe wonu bi nyamanɛ wo rɔ ka wonu ma anutɛ la.

³⁴Kadi bɔnsɔn ya soe kɛnu sɔ a kurɛ la ka tarɛnu mini soe wonu ma, Dibon anubɛ Ataroti anubɛ Arɔra anubɛ Atoti-Sofan anubɛ Yeyasa anubɛ Yɔgabɛha anubɛ Bɛti-Nimira anubɛ Bɛti-Haram. Anu ya saga-karakarannu nadan fanan.

³⁷Rubɛn bɔnsɔn ya soe kɛnu sɔ a kurɛ la tun, Hɛsibɔn anubɛ Ɛlɛyela anubɛ Kiriyateyim anubɛ Nibɔ anubɛ Beyali-Meyɔn anubɛ Sibima. Anu ya tɔgɔ-kurɛ sa soe wonu kuma.

³⁹Manasala dan Makiri buira Kaliyadi nyamanɛ mɔgɛ donu ma ka anuna duginu bi anu bolo. A ya Amora mɔgɛ wonu gben ka anuna soenu bi anu bolo.

⁴⁰Musa ya Kaliyadi nyamanɛ do di Makiri ma alako a kebilɛnu ni sigi nyɔ.

⁴¹Makiri kegeyɛ min tɔgɛ Yeya, wo fanan tara bui soe donu ma Kaliyadi nyamanɛ rɔ ka soe wonu tɔgɔ sa Yeyaya.

⁴²Makiri kegeyɛ do fanan min tɔgɛ Noba, wo fanan buira Kinati soenu ma. A ya soe wonu ma a tɔgɔma la ka anu kele ko Nobaya.