Read Kuranko Yilan-Yilan Koe 4 Bible Online

Yilan-Yilan Koe 4 - Kuranko bible

Yilan-Yilan Koe 4

¹Mari ya a fɔ Musa anubɛ Aruna ye ko,

²“Wo ni Lifayi bɔnsɔn, Kohati kebila-mɔgɛnu tɔgɛ sɛbɛ. Min sɔrɔn ara tenbi san bi-sawa la, i ni wonu tɔgɛ sɛbɛ min si ke wɔlɛ kɛla Marita Fani-Bɔn la. Wonuta wɔlɛ le ka fen-sɛnimɛnu fɛ-bira nta Bɔn la. Kɔnɔ min sɔrɔn ara tenbi san bi-loli la, i kana wonu tɔgɛ sɛbɛ.

⁵“Anu tenbi tala tumɛ min, Aruna anubɛ ala dannu si don nta Fani-Bɔn la ka yorolan layigi ka tɔn-kenkirɛ yamatogon wo la.

⁶Anu ni gbolo-koloni-hakikɛ burun yorolan kuma anubɛ kura-bilolamɛ fanan. Anu ni a bi-kɔlɔmanu don bolo-kalama-dɛɛn wonu woe rɔ.

⁷“Wo kɔma, anu ni kura-bilolamɛ do rafulen biredi kuma tebulu wo kuma. Anu si nɔnbɔ-gbɔ-yi-sarakɛ kɛ panɛ minnu tɔ, anu ni panɛ wonubɛ piletinu anubɛ yi-kɛ-fannu anubɛ yi-lafɛnu sigi kurɛ wo kuma.

⁸Anu ni kura-wulenmɛ wo sa miran wonu kuma ka gbolo-kolonɛ sa wo fanan kuma. Anu ni a bi-kɔlɔmanu don bolo-kalama-dɛɛn wonu woe rɔ minnu bi tebulu tɔnkɔnnu tɔ.

⁹“Wo kɔma, anu ni kura-bilolamɛ bi ka a sa lɛnpu-sigi-fan wo kuma anubɛ lɛnpu nyɛrɛnu anubɛ a tirɛnu anubɛ saraba-tɛgɛ-fannu anubɛ tuli-kɛ-fannu.

¹⁰Anu ni kɛ bɛɛ sa anu nyɔgɔn kuma ka gbolo-koloni-hakikɛ mamini wo ma ka a sigi fɛrannu kuma anu si a bi minnu na.

¹¹“Anu ni kura-bilolamɛ sa isɛnti mintan tinɛ kuma ka gbolo-koloni-hakikɛ burun wo kun na. Anu ni a bi-kɔlɔma filɛ don bolo-kalama-dɛɛnnu tɔ.

¹²Anu ni miran bɛɛ bi min bi Kan-Tina-Sɛnimɛ rɔ ka kura-bilolamɛ burun wonu kuma ka gbolo-koloni-hakikɛ burun wo bɛɛ kuma. Anu ni wo bɛɛ bi ka a sa fɛrannu kuma anu si a bi minnu na.

¹³Anu ni saraka-bɔ-tinɛ wo ta-gbangban kɔ ka kura-bilolamɛ burun saraka-bɔ-tinɛ wo kuma.

¹⁴Anu ni ata mirannu sa a kuma, a ta-kɔ-mirannu wo, a sogo-sɔgɔ-fannu wo, a sɔbulunu wo, anubɛ a yele-purupuru-mirannu. Anu ni gbolo-koloni-hakikɛ burun wo bɛɛ kuma ka a bi-kɔlɔma fila don bolo-kalama-dɛɛnnu woe rɔ.

¹⁵Aruna anubɛ ala dannu ba ban miran kɛ bɛɛ yamatogonna tumɛ min, Kohati kebilɛ ni na ka Kan-Tina-Sɛnimɛ miran kɛnu bi. Kohati kebilɛ min bi miran kɛnu bila, anu fenfen kana tugu miran-dantɛgɛnɛ kɛnu na, fɔ a bi-kɔlɔma filɛnu. Ni anu tugura wo fenfen na, anu si faga. “Wo wa ta kan-bo-kan, Kohati kebilɛta wɔlɛ le kɛ la.

¹⁶“Arunala dan Ɛliyasa ye kun-tigiyɛ kɛla Fani-Bɔn mumɛ bɛɛ kuma, katarala kɛnu ma, tulu-sɛnimɛ min bi kɛla lɛnpu rɔ wo, isɛnti wo, dɛgɛ-munke ka a ma kɔ-fan la wo, dantɛgɛ-tuli wo, anubɛ fenfen min dantɛgɛnɛ Mari ma, ale si taran wonu kuma.”

¹⁷Mari ya a fɔ Musa anubɛ Aruna ye ko,

¹⁸“Kohati kebilɛnu ba don kan-tina-sɛnimɛ miran wonu madunɛ rɔ tumɛ min, wo kana a ma, anu ni faga. Ka anu tanka wo ma, Aruna anubɛ ala dannu ni a fɔ anu kelen-kelennamɛ-bɛɛ ye anu si miran-sɛnimɛnu dunɛ bi nya min.

²⁰Kɔnɔ wo tenbi miran wonu mabɛnna tumɛ min, Kohati kebilɛ kana wo fenfen yen anu yɛ la minnu yamatogonni ma hali ka a mafɛlɛn anu yɛ la falaku! Ni anu ya a yen, anu si faga yati!”

²¹Mari ya a fɔ Musa anubɛ Aruna ye ko, “Wo ni Lifayi bɔnsɔn tɔgɛnu sɛbɛ, Kɛrisɔn kebila-mɔgɛnu, kɔni. Min sɔrɔn ara tenbi san bi-sawa la, i ni wonu tɔgɛ sɛbɛ min si ke wɔlɛ kɛla Marita Fani-Bɔn la. Wonuta wɔlɛ le ka nta bɔn duni. Kɔnɔ min sɔrɔn ara tenbi san bi-loli la, i kana wonu tɔgɛ sɛbɛ.

²⁴Anu si nta bon-kurɛnu duni anubɛ saga-yigi gbolo-koloni-wulenmɛ anubɛ gbolo-koloni-hakikɛ min si burun wonu kuma anubɛ kurɛ min dunnɛ bonda-dɛ la.

²⁶Kata-masansan-kurɛ Fani-Bɔn anubɛ saraka-mintan-tinɛ lafoonɛ ye min na, anu si wo duni anubɛ a yilinu anubɛ tenbi-bolon-kurɛ anubɛ kurɛ wonu dun lundannu. Anuta wɔlɛ le ka miran kɛ bɛɛ rabɛn tagamala ko la.

²⁷Anu bi wɔlɛ min bɛɛ kɛla Aruna anubɛ ata dannu kɔrɔ, wo le ka miran kɛnu duni kɔnɔ anu bi wɔlɛ wo min kɛla, Arunala dan Itamarayi le wo kun-tigiyɛ kɛla wo bɛɛ kuma.”

²⁹Mari ya a fɔ Musa ye ko, “I ni Lifayi bɔnsɔn tɔgɛnu sɛbɛ, Mɛrari kebila-mɔgɛnu, kɔni. Min sɔrɔn ara tenbi san bi-sawa la anubɛ min si ke wɔlɛ kɛla Marita Fani-Bɔn la, i ni wonu tɔgɛ sɛbɛ. Kɔnɔ min sɔrɔn ara tenbi san bi-loli la, i kana wonu tɔgɛ sɛbɛ.

³¹Anuta wɔlɛ le kɛ la. Anu si bon-fɛrannu anubɛ anu kiannu duni anubɛ kɔlɔma-yannu. Anu si kata sansan-kɔlɔmanu duni anubɛ a gbɛsɛ-gbɛsannu anubɛ a yili-kolenu anubɛ wonu fɛ-mirannu. Ita wɔlɛ le min na, wole ka mɔgɔ kelen-kelen bɛɛta dunɛ yira anu na.

³³Mɛrari kebilɛta wɔlɛ le ka miran kɛ bɛɛ duni kɔnɔ Arunala dan Itamarayi le kun-tigiyɛ la wɔlɛ kɛ bɛɛ kuma.”

³⁴Iko Mari ya a fɔ Musa anubɛ Aruna ye nya min, Isirɛla mɔgɔ-banu ya Lifayi bɔnsɔn Kohati kebilɛ anubɛ Kɛrisɔn kebilɛ anubɛ Mɛrari kebilɛ tɔgɛnu sɛbɛ. Anu ya kei bɛɛ tɔgɛ sɛbɛ min sɔrɔn ara tenbi san bi-sawa la anubɛ min si ke wɔlɛ kɛla Marita Fani-Bɔn la. Kɔnɔ min sɔrɔn ara tenbi san bi-loli la, anu ma wonu tɔgɛ sɛbɛ. Kohati kebilɛ bɛɛ lakofunɛ bɛnta mɔgɔ waga fila ani mɔgɔ kɛmɛ wɔrɔnfila, ani mɔgɔ bi-loli (2,750) ma. Kɛrisɔn kebilɛ bɛɛ lakofunɛ bɛnta mɔgɔ waga fila ani mɔgɔ kɛmɛ wɔrɔ, ani mɔgɔ bi-sawa (2,630) ma. Mɛrari kebilɛ bɛɛ lakofunɛ bɛnta mɔgɔ waga sawa ani mɔgɔ kɛmɛ fila (3,200) ma. Kebila sawɛ kɛ bɛɛ lakofunɛ, wo le bɛnta mɔgɔ waga segin ani mɔgɔ kɛmɛ loli ani mɔgɔ bi-segin (8,580) ma.

⁴⁹Iko Mari ya a fɔ Musa ye nya min, Isirɛla mɔgɔ-banu ya kebila sawɛ bɛɛ tɔgɛ sɛbɛ. Mɔgɛ bɛɛsi ya ata dunɛ sɔrɔn anu si min duni.