Read Kuranko Yilan-Yilan Koe 5 Bible Online

Yilan-Yilan Koe 5 - Kuranko bible

Yilan-Yilan Koe 5

¹Mari ya a fɔ Musa ye ko,

²“A fɔ Isirɛla mɔgɛnu ye ko ni kiraya-yogomɛ ye mɔgɛ minnu fɛrɛ ma, kei wo, musi wo, hali kirayɛ min si dɛɛ labɔ mɔgɔ yatelenmɛ ma, wo ni mɔgɛ wo bɔ dagɛ rɔ nde, Mari ye nta mɔgɛnu fɛ kan min. “Ni mɔgɛ do ya a bole tugu furi la, wo fanan tigi ni bila anu fɛ ka ta dagɛ kɔma kamasɔrɔn anu sɛninyani ma iko tɔn ya a fɔ nya min. Ni wo ma, anu si dagɛ latinya.”

⁴Isirɛla mɔgɛnu ya tɔn wo bira ka mɔgɛ wonu nata dagɛ kɔma.

⁵ Mari ya a fɔ Musa ye ko,

⁶“I ni a fɔ Isirɛla mɔgɛ bɛɛ ye ko ni mɔgɔ-wo-mɔgɔ ya ko-yoge ma a sigi-nyɔgɔ la, a mara ko-yogo sufa wo sufa la, a ni a sɔn a la. A ya ko-yoge min ma wo la, a ya wo ma nde, Mari le la. Ni a ya mɔgɔ kensunya fenfen na, a ya min bɛɛ bi, a ni wo bɛɛ sara. Ni a ya loli-loli le bi, a ni kelen-kelen sa wo kuma ka a dafa wɔrɔ-wɔrɔ ma ka a lasɛgi a tigi ma tun. Wo kɔma, a ni saga-yigi kelen bɔ hakɛ-sarakayɛ la fanan min si a ma, a hakɛ yama ni togon.

⁸Kɔnɔ ni mɔgɔ ya mɔgɛ do kensunya, a ni a taran, mɔgɛ wo ara faga, ado a kebila-mɔgɔ-gbɛrɛ sa nyɔ a si fan wo lasɛgi min ma, fan wo si ma nde, Maritɛ la. A ni wo di saraka-masɔlɛ ma.

⁹Isirɛla mɔgɛnu bi nala kɔ-fan minnu na nde, Mari ye, wo fanan si don saraka-masɔla kelan wo bolo min ya a masɔ.”

¹¹Mari ya a fɔ Musa ye ko,

¹²“A fɔ Isirɛla mɔgɛ bɛɛ ye ko ni kei do suira ala musi ma ko a ara yɛlɛnyɛ kɛ, a ma a bira, ado sereya sa a la.

¹⁵Ni tonyɛ ye a rɔ wo, ni tonya sa a rɔ wo, kei wo si ta ala musi wo la saraka-masɔlɛ wara. Kei wo ni ta bu-gbɛngbɛnnɛ[4] pani-kunbɛ-nya fila la a bolo. Kɔnɔ a kana ɔlifi-tuli kɛ a rɔ, ni wo ma, isɛnti kamasɔrɔn sarakɛ le kɛ la kei wo ya min ma bawo a ara sui ala musi ma. A sɔgɛ ye a la ka tonyɛ labɔ gbɛ rɔ.

¹⁶“Saraka-masɔlɛ si na musi wo la ka a sɔ saraka-bɔ-tinɛ yakɔrɔ.

¹⁷A si yi do bi min dantɛgɛnɛ Mari ma ka a kɛ bɔnku-dagɛ do rɔ. A si gbangban do bi nta Fani-Bɔn bon kole ma ka a kɛ yi wo rɔ.

¹⁸A ni musi wo kun-sigi lafulen ka bu-gbɛngbɛnnɛ wo do bi ka a kɛ musi wo bole tɔ. Saraka-masɔlɛ si sɔ musi wo yarɔ bɔnku-dagɛ ye a bolo. Yi-kunɛ wo min si dankɛ lana, wo ye bɔnku-dagɛ wo rɔ.

¹⁹Saraka-masɔlɛ si a fɔ musi wo ye ko, ‘Ni i ma yɛlɛnyɛ kɛ, i ti tɔrɔ danka-yi kɛ bolo.

²⁰Kɔnɔ ni i wara kei-gbɛrɛkɛ anubɛ ila kei lakofu,

²¹alamɛ Mari ya i tɔrɔ ita mɔgɛnu tɛma. Alamɛ yi kɛ ya a ma, karɛ la kana to i la. Alamɛ yi kɛ ya i buyi yiri.’ “A si a fɔ musi wo ye ko fɔ a ni sɔn koe wo bɛɛ ma ka a fɔ ko, ‘Amina.’

²³“Saraka-masɔlɛ ni dankalɛ wo sɛbɛ gbole do ma. A ni gbole wo sa yi-kunanɛ kɔrɔ ka dankalɛ wo ku gbole wo ma.

²⁴Yanni musi ni yi-ladankanɛ wo min,

²⁵saraka-masɔlɛ si bu-gbɛngbɛnnɛ bi musi bole tɔ ka a di Mari ma ka ta a la saraka-mintan-tinɛ.

²⁶A si a bolo-nya kelen bi ka a ma saraka-mintantɛ la. Bolo-nya kelan wo si a ma iko a ara a damasi mintan. Wo kɔma, saraka-masɔlɛ wo ni a ma, musi ni yi wo min.

²⁷Ni a ya yɛlɛnyɛ kɛ, yi-dankanɛ wo si ma dumɛ la a burɔ. Wo kɔma, karɛ la ti to a la. A si ma dankatoe la ala mɔgɛnu tɛma.

²⁸Kɔnɔ ni fɛɛ sa musi la, a ti yiliki sɔrɔn wo rɔ. A si buyi bi ka dan sɔrɔn.

²⁹“Ni kei ya ala musi makeliya wo, ni a suira a ma yɛlɛnya-koela ko la, tɔn le kɛ bɛɛ la. Kei ni a ma, ala musi ni sɔ saraka-bɔ-tinɛ yakɔrɔ. Saraka-masɔlɛ si wɔlɛ kɛ bɛɛ kɛ iko a fɔnɛ nya min.

³¹Kɔnɔ ni musi ya tɔrɔyɛ sɔrɔn yɛlɛnyɛla ko la, ala kei ti yiliki sɔrɔn wo rɔ. A ya tɔrɔyɛ min bɛɛ sɔrɔn, a nyɛrɛ gbɛ le wo la.”