Read Kuranko Maika 2 Bible Online

Maika 2 - Kuranko bible

Maika 2

¹“Gbalo si taran wo mɔgɛnu ma minnu si anu miri ko-yogomɛ ma anu ta-nyɔgɛnuna ko ma suyi rɔ. Anu bi duwala le ko banda ni ka. Bandɛ wa ka tumɛ min, anu si anu nawuli anuna karagbɛlɛyɛnu na anu bolo iko anu ya anu miri a ma suyi rɔ nya min.

²Ni mɔgɔ-su kɛnu bi nyinina mɔgɛ do bolo-fan do ma, a mara wɔli-kɛ-tinɛ la wo, a mara bɔn la wo, anu si a bi kensunteyɛ la anu ta-nyɔgɛ donu bolo, hali anu ta-nyɔgɛ donuna denbayɛ donu.

³“Woletɔ Mari ko minnu bi kɛ sufa mala, a si nyankankantan lana anu kuma ka anu tɔrɔ, anu ti ke anu bɔla min kɔrɔ. Anu si tɔrɔyɛ sɔrɔn. Anu kɔmakɔmɛ si belenna tagamana.

⁴Wo kɔma, mɔgɛnu si to anu sɔn-kɔrɛ wonu takaranna ka anu ma tamasere la. Mɔgɛ kɛnu si to wole kensunte-kɔrɛnu mayɛlɛn-sigi sala. Mɔgɛ donu bi dila kaka ko, ‘Ma ara tinya pɔ! Mari ara mala kebila-dugi bi ma bolo. A ara a don ma yogenu bolo minnu si ma bira ka ma ma yɔɔnnu na.’ ”

⁵Maika ya a fɔ ko, “Woletɔ Marita mɔgɛnu ba sɛgi anuta nyamanɛ rɔ tumɛ min, wole kensunte-kɔrɛnu bɔnsɔnnu ti fenfen sɔrɔn wola nyamanɛ rɔ tun.

⁶“Mɔgɛnu bi kumala n ma ko n kana kuma-su kɛnu fɔ anu ye. Anu ko, ‘Alla si male lamiliya, wa?’ Anu bi n manyinikala ko,

⁷‘Isirɛla mɔgɛnu dankani de?’ Anu ko, ‘Mari ti a munyu male kɔrɔ tun, wa? Ile lara a la ko a si ko-sufa kɛnu ma ma la, wa?’ Anu ko tun ko, ‘Hali mɔgɛ minnu bi ko-nyimɛ kɛla, Mari ti kuma wonu ye a kin na tun, wa?’ ”

⁸Maika ya Mari kuman-kan latenbi kensuntenu ma ko, “Wole Isirɛla mɔgɛnu, wo ye wo ta-nyɔgɛ mɔgɔ-tɔrɔnɛnu kɛlɛla iko wo yogenu. Mari ko mɔgɔ-tɔrɔnɛ wonu mani de iko kɛlɛ-dannu ba sɛgi ka bɔ kɛlɛ rɔ tumɛ min, anu bi anu mirila ko anu bara kanan anuna bɔnnu na kɔnɔ yaga, wole kensunte-kɔrɛnu siginɛ ka anu makɔni anu bolo-fannu ko-latɛgɛ koe rɔ.

⁹Wo ye bɔnnu bila kɛɛ-musinu bolo kensunteyɛ la. A bɛnta, wonuna dannu ni minnu sɔrɔn Mari bolo, wo ara wonu bɔ kelennɛ wonu bolo wola kensunteyɛ la feu!

¹⁰Mari ko wole kensunte-kɔrɛnu, wo ni wo bɔ yan, wo ni ta pon! Wo sigi-tina sa yan tɔ tun, wo si taran wo diya kan min. Wo hakɛ ara a ma, kan-tinɛ kɛ ara tinya pɔ!

¹¹“Mari ko wole kensuntenu bi nyinina foninya-nɛbinu ma minnu si wo mayuwaya. Wonu si belenna a fɔla wo ye ko, ‘Baan-feremɛnu bi wola ko la duk!’

¹²“Mɔgɔ-toe minnu tora Isirɛla nyamanɛ rɔ, Mari ko a si wonu kundɛn iko sagɛ minnu bi donna kulɛ rɔ. Wola nyamanɛ kɛ si fa mɔgɛnu na tun iko sagɛnu si saga de-nyini-tinɛ lafa nya min.”

¹³Nde, Maika ko wo biranɛ minnu bolo nun, Alla si wonuna tara-dɛ keri a ma ka wo labɔ nyɔ. Wo la si fɛrɛ worɔ. Wota mansɛ, Mari si sɔ wo yarɔ ka kilɛ laka wo ye.