Read Kuranko Maika 6 Bible Online

Maika 6 - Kuranko bible

Maika 6

¹Wo ni wo tole masɔ Allata kiti la Isirɛla mɔgɛnu kan ma. Mari ye nala a lakɔɛnmana ka ata kumɛ rakaran. Mari ye minnu fɔla, kɔnkɛnu si ma wonu sereyɛ la.

²Wole kɔnkɛ minnu manɛ duninya-kurun-fannu na, wole min na ti maga, wo ni wo tole masɔ Marita kumɛ la. Kumɛ do ye Mari anubɛ ata mɔgɛnu tɛma. A ye nala wo rakaranna wo ye.

³Wole Marita mɔgɛnu, Mari ko a ya nfen ma wole la? A ya wo niyi ragbɛrɛn wo ma nya min, wo ni wo fɔ.

⁴ Ale le ya wo labɔ yɔɔnyɛ rɔ Iyipiti nyamanɛ rɔ ka na wo la yan. Ale le ya Musa sɔ wo yarɔ anubɛ Aruna anubɛ Miriyam.

⁵ A ko wole Isirɛla mɔgɛnu, wo ni wo miri Mohabu nyamani-tigi ma, Mansa Balaki min ya yanfɛ kiri wo tɔgɔ rɔ. Wo ni wo miri fanan Beyorila den Belam ma, a ya ale Mansa Balaki yabi nya min wulɔn. Wo ni wo miri minnu mara wo ye tagama rɔ, a ya Yorodan bɛ gbala wo yarɔ nya min Akasiya dagɛ anubɛ Kiligali dagɛ tɛma. Ni wo ya wo miri wo dama ma, wo fɔlɔn ya ko bɔ wo kisi-koe rɔ.

⁶Isirɛla mɔgɛnu ya a fɔ anu nyɔgɛ ye ko, “Mari Alla min bi Arinyɛni tɔ, male si na nfen na ale ye a bato-tinɛ min si a hɛnɛ? Ni ma nara san kelen ninki-den-hakikɛnu na ka anu ma saraka-mintantɛnu na, wo si a bɔ?

⁷Ni ma nara saga waga-siyaman na Mari ye, wo si a hɛnɛ? Ni ma nara tuli la, kurukurun ti min ban, tarali ti min ban, wo si a ma, Mari ni sewa ma la, wa? Ni ma ya mala den fɔlɛnu ma sarakɛnu na Mari ye, wo si a ma, ma hakɛ ma ni koto, wa?”

⁸Nɛbi Maika ko, “Ma si min ma wona, Mari ara wo fɔ ma ye nun. A ye nyinina minnu ma ma bolo, wo le kɛnu na. A dabira fɔlɔtɛ, a ko ma ni ko-latelennɛ kɛ. A fila nyɔgɛ, ma ni ma nyɔgɔn keni anubɛ Alla. A sawa nyɔgɛ, ma ni Alla diyana-koenu kɛ gbiliyɛ rɔ.

⁹Ni ma ya wonu ma, hɛnkilimaya-koe le wo la.” Nɛbi Maika ya Mari kuman-kan latenbi Isirɛla mɔgɛnu ko, “Nba, kumɛ kɛ ara fɔ nkɛkuna ka ban, wole so-burɔ-mɔgɛnu, wo ni wo tole masɔ.”

¹⁰A ko karagbɛlɛnte donu bi nyɔ minnu bi nɔnfulinu namarala anu nyɛrɛ ye anuna bɔnnu na, anu ma minnu nyini a kilɛ fɛ. Wo ye mɔgɛ donu kensunyala fen-suma-fannu na, ado wo don ma di ale Mari ye.

¹¹Mari si wole makoto worɔ, wa?

¹²A ko nɔnfulu-tiginu bi bolo-kolɔnnu bolo labirala. Wonu damasi ye foninyɛ fɔla.

¹³Woletɔ Mari ko a ara wuli wole, Isirɛla mɔgɛnu tɔrɔyala ka wo halaki wola hakɛnuna ko la.

¹⁴Wo si to fannu dɔnna kɔnɔ wo ti fa. Dɔn-fannu si taran wo bolo kɔnɔ a ti wo rabɔ. Wo si wola bondɔnnu nafa dɔn-fannu na kɔnɔ kɛlɛ si a ma, wonu ta ni kolonya filili!

¹⁵Wo si wola suginu fui kɔnɔ wo ti wo fenfen tɛgɛ kɛlɛ bolo. Wo si tulinu bɔ kɔnɔ wo ti tɔnɔ sɔrɔn anu tɔ. Wo si wola nɔnbɔ-gbɔɛnu burun kɔnɔ wo ti anu yinu min.

¹⁶ Wo ara ko-yogomɛ ma iko wola mansɛ Hɔmɔri anubɛ ala den Mansa Ehabu, woletɔ tɔrɔya-su kɛ ye nala sigila wo la. Mari si wola nyamanɛ kɛ halaki. Mɔgɛnu si wo mayɛlɛn dɔgɔma-ma-de! Fɔ ni wo ya wo munyu manyinɛnu kɔrɔ bawo wo ma sɔn Marita kumɛ birala.