Read Kuranko Maika 7 Bible Online

Maika 7 - Kuranko bible

Maika 7

¹Nɛbi Maika ya a fɔ ko, “Mata tɔrɔyɛ ara to ma ma fufafu! N yigi tɛgɛnɛ iko kɔnkɔtoe wa a labɔ ki-fannu ma kɔnɔ a ma a gbɔ taran a la. Kɔn-gbɔɛ min dɔn-sɔgɛ wa a bira, a wa ta nyɔ, a ni wo lakolɔn taran filili!

²Hali mɔgɔ-den-kelen sa wole, Isirɛla mɔgɛnu tɛma min telennɛ Alla ye. Mɔgɛ bɛɛ kɔnkɔnnɛ a ta-nyɔgɛ faga-koe ma. Wo ye belenna gbɛrɛnu nasigila wo nyɔgɔn ye.

³Ko-yogoma-kɛlɛnu karan-mɔgɛ le wole la. Wola kun-tiginu anubɛ wola kiti-salɛnu bi dogonta-fannu makelela mɔgɛnu bolo kiti-sa-tinɛ. Sɛnbɛ ye minnu na, wonu bi yanfɛnu donna mɔgɛnu ma.

⁴Hali minnu natelennɛ wo tɛma, wonu mani de iko dɛran. Hali mɔgɔ-nyimɛ minnu bi wo tɛma, wonu mani de iko mɔgɛnu bi binyɛ minnu dɛnna. “Wo tɔrɔ-wati le wara ke kɛ la Mari bolo iko nɛbinu ya wo lalɔn nya min nun. Wo damasi nyagbanɛ kɔndɔfili bolo.

⁵ Dannu si anu fanu lɔn yuwɛnu na. Den-sunkurɔnnu si tɛgɛ anu nanu tɔ kasikasi! Musunɛ minnu ba ta kei-wara-sigi rɔ, wonu si anu mamanu kɛlɛ. Kei bɛɛ yoge si ma ala bonna-mɔgɛ la. Wo ni a ma wo fɛrɛma kuma tinɛ. Wo kana wo kɔntɔ-koenu fɔ wo diyana-mɔgɛnu yala hali wola musinu.

⁷“Hali wo, nde, Nɛbi Maika, n bi n kisilɛ Mari Alla makɔnɔna. Nta Mari Alla si a wɔlɔ matɔlɔ nta kumɛ kɛ la.”

⁸Ko-yogomɛ min bi sigila ma la, ma yogenu kana wonu ma ma rasɛ-kunya la. Hali ma dɛ ra ara gborokan, ma si ma lasɔ tun. Hali pinpi burunnɛ ma ma bɛff, kɔnɔ Mari si waan raka ma ma waran!

⁹Ma ara hakɛ kɛ Mari la. Fɔ ma ni ma munyu ata diminyɛ kɔrɔ wati-kundu-ni kɔrɔ. Wo wati wa ban, a si ma fɛka ka ma tayili sara ma yogenu na. A si ma labɔ pinpi rɔ ka ma kun nayere.

¹⁰Ma yogenu ba a yen, Mari ara ma dɛnbɛn tun ka ma lasɔ, anu si miliya ka a tɛgɛ anu darɔ-kan ma. Anu denu denu ya ma manyini ko, “Mata Mari Alla wo ye mintɔ?” Kɔnɔ ma si ma yoge wonu tinyanɛ yen. Anu si ma iko bore, mɔgɛnu bi minnu tatɛntɛnna.

¹¹Wo wati wa ke, wole Yerusalɛm kɛnu, wo si wola so-tarɛ sɔ a gbɛ rɔ tun. Nyamanɛ do si sa wola nyamanɛ kuma ka koloya.

¹²Wo na-kelen-nyɔgɛnu si na ka bɔ Asiriya nyamanɛ rɔ anubɛ Iyipiti nyamanɛ rɔ ha ka ta ke Yufereti bɛ ma ka anu sigi wo tɛma. Anu si na ka bɔ duninya-tonko-nanɛ bɛɛ rɔ.

¹³Kɔnɔ yanni wo wati ni ke, wo yogenuna nyamanɛnu si ma nyamani-tinyanɛnu na ka a tɛgɛ anuna ko-yogomɛnuna ko ma.

¹⁴I yandi Mari, i ni ma ila mɔgɔ-yabɔnɛ kɛnu ye iko saga-fɛ-biralɛ. Ma ye dugi min tɔ kaka, dugu-hakika ma wo la. I yandi Mari, a ma, ma ni ta ma sigi Basan nyamani-hakikɛ rɔ anubɛ Kaliyadi nyamanɛ iko ma benbanu ya a ma nya min wati-tenbinɛ.

¹⁵Mari, i yandi, i ni ko-makawanɛ kɛ ma ye iko i ya a ma mala mɔgɛnu ye nya min nun anu bɔɛ Iyipiti nyamanɛ rɔ.

¹⁶Kɔnɔ ni i ya wo ma, hali sibolo-gbɛrɛkɛ-mɔgɛnu tagbɛlɛ, anu kɔndɔ si fili miliyɛ bolo. Isirɛla mɔgɛnuna ta-koe yarɔ, wo lamɔɛn-sɔgɛ ti anu bira. A sɔgɔ sa anu na, anu ni anu dɛ bila Isirɛla mɔgɛnu bara-koe rɔ tun. Anu dɛ si ma gbɔgbɔrɔ!

¹⁷Anu si anu yakɔrɛ sa gbangban rɔ iko duguma-fan si a ma nya min. Duninya si a lɔn worɔ ko sɛnbɛ sa anu na tun! Anu si kanan kan-tinɛ minnu tɔ, anu yɛrɛyɛrɛnmatoe si bɔ nyɔnu tɔ kilan bolo. Anu si dɛgɛ min mata Mari Alla ye.

¹⁸Alla gbɛrɛ sa nyɔ min manɛ iko ile Mari. Mɔgɛ minnu bi anu niyi la kaka, ile si wonu makoto anu hakɛ la. I fonde magboyani ma ita mɔgɛnu kuma tuma-wo-tuma. I nyagalennɛ ka ila keninteyɛ yira anu na tuma-wo-tuma.

¹⁹I si kinikini ma ma tun. Ma ara hakɛ minnu kɛ nun, i si wonu bi ka anu sa i tontɛ kɔrɔ ka anu matɛn ka anu nafili kɔgɔ-yi-dumɛ-kuri la.

²⁰I si ita lanayɛ anubɛ ila keninteyɛ yira Iburayima anubɛ Yakoba kegeyɛnu na, ita mɔgɛnu, kɔni, iko i ya lanyiri kiri anu ye nya min nun!