Read Kuranko Nehami 1 Bible Online

Nehami 1 - Kuranko bible

Nehami 1

¹ Wɔlɔyiya-kumɛ le kɛ la Ninɛfa soela ko la. Ko-rayen kɛ kɛra nde, Nɛbi Nehami ye min bɔra Ɛlikosi soe burɔ.

²Mari Alla ti sɔn a senɛ ma. Minnu bi a rasɛla, a si wonu tɔrɔ. A fonde bɔnɛ si a tayili sara.

³Mari fonde ti bɔ tiriya kɔnɔ a sɛnbɛ makawanɛ, ado a ti sɔn mɔgɔ-yilikinɛ tɔrɔbɛlɛ ni to. Mari wa a tontɛ sɔ kan min, tɔnkɔlɔn le wulila nyɔ. A tontɛ gbangban si yɛlɛma banda-kole la.

⁴A wa a fɔ kɔgɔ-yi ma, “gbala,” latiriya-bole ma, wo ni gbala todo! Wo si a ma fanan, bɛnu ni gbala. A si a ma fanan, Basan-nyamanita-binyɛnu na ni fɔsɔ. Kamɛli-kɔnkɔ-binyɛnu si ma samayo! Lɛbanan-kɔn-ferenu si gbala kerr!

⁵Kɔnkɛnu si to yɛrɛyɛrɛnna Mari yakɔrɔ. Gburukulinu si ta leela bandin! Duninya anubɛ ata mɔgɛnu ta si maga.

⁶Alla fonde wa bɔ tumɛ min, yon si to a niyi la worɔ? A fondo-kaliyanɛ ye tɛ min nabɔla, yon si ke wo rakɔnɔna? Mari wa fondo-magboyɛ labɔ iko ta-mɛlan, farɛnu si ma gbangban la a kɔrɔ.

⁷Mari nyimayanɛ feu! A si ala mɔgɛnu kumafunfan tɔrɔya-wati rɔ. Ni mɔgɛ min ya a ya-lamunun a la, a si to wo kumafɛlɛnna.

⁸A si tugu a yogenu kan ma ka anu nato dogbe iko yi wa tugu a rɔ wuu! Mɔgɛ min ba a rasɛ, a si wonu natosokɔrɔ lakira.

⁹Anu bi yanfɛ kirila Mari ma fu! A si wonu halaki. Mɔgɛ ti a kinyama fila Alla rasɛ tinɛ, a makolɔn ni to.

¹⁰Anu si mintan iko wɔnɔ-dɛngban anubɛ bin-gbalɛ si mintan nya min gburr!

¹¹Wole Ninɛfa kɛnu, mansɛ do bɔra i burɔ min sɔndɔmɛ lafanɛ kɛwuyɛ anubɛ yanfanteyɛ la. A ya yanfɛ rabɛn Mari kan ma.

¹²Mari ye a fɔla ala mɔgɛnu ye Yuda nyamanɛ rɔ ko hali wole Asiriyanu tagbɛlɛ, ado wo siya, wo si kasara ka tunu yen! Mari ko a ya a ma nun, Yuda nyamanita-mɔgɛnu tɔrɔta kɔnɔ a ko a ti wo ma tun!

¹³A ko a si Yuda mɔgɛnu kunyɛ bɔ wota Asiriya mansa-masibɛ kɔrɔ ka yɔlɔkɛnu tatɛgɛ, anu kirinɛ minnu na.

¹⁴Mari ara ban kɛ latɛgɛla wole Asiriya kɛnuna ko la. A ko wo ti kegeya-wo-kegeya sɔrɔn minnu si to wo kɔmɛ lasabatila. A ko bɛsɛ minnu bi wola kɔ tinɛnu tɔ, a si wonu kasara pɔ! A ko a ye wole Asiriyanu kaburu-sinyɛ kun na kaka! Wo wunduyogo kati!

¹⁵ Wole Yuda kɛnu, wo ni wo yɛ lata kilayɛ ma nala kuma-nyimɛ la a bolo kɔnkɛnu kuma. A ye nala wo yogenu nɔ-koe fɔla wo ye. Wo ni wola ladiyɛnu kɛ tun. Wo ara lanyiri kiri Alla ye minnu na, wo ni wonu di a ma. Wo yogenu ti bɔ Ninɛfa ka na bui wola nyamanɛ kɛ ma tun! Anu na ara to dogbe!