Read Kuranko Nehami 2 Bible Online

Nehami 2 - Kuranko bible

Nehami 2

¹E, Ninɛfa kɛnu, Ninɛfa tiilɛ ara na. Wo ni wo sɔ-tinɛnu bi tarɛ kuma. Wo yɛ bɛnnɛ ni to kilɛ ma wo yogenuna ko la. Wo ni wo rabɛn kɛlɛ yarɔ. Wo ni wola kɛlɛ-dannu kundɛn kan-tina-kelen.

²(A ara to doni, Mari ni Yuda nyamanɛ lasɛgi a gbɛ rɔ ka a kinya iko a ya lanyiri kiri nya min Isirɛla nyamanɛla ko la fɔlɔ nun, yanni a yogenu ni a tɔnbɔn.)

³Wole Ninɛfa kɛnu, wo yogenuna kɛlɛ-dannu si na wo kɛlɛ-tinɛ kɔgɔ-matanka-fan-wulenmɛ la anu bolo. Kɛlɛ-duruki-wulan bilanɛ anu kan na. Anu bara anu mabɛn wo kɛlɛ-koe la. Anuna kirindinu silɛ ye tiila anu ma iko ta-mɛlan. Anuna soeenu bi anu nyɛrɛ matɛnna kɛlɛ-kɛ-tinɛ.

⁴Soeenu bi kirindinu saganna wola Ninɛfa soe tonke bɛɛ rɔ. Kirindinu bi yigi-ni-yɛlɛ kɛla soe barɛnu tɛma. Anu dɔnkɔnyɔ ye tenbila iko tɛ tenbi sigila wɔnɔ-gbalɛ la. Anu bi anu burila iko banda-nyin-masɔgɛ.

⁵Anuna kɛlɛ-kuruba-wɛ ye ala kɛlɛ-den-kunyɛnu takelela. Wonu bi nala tonko-tankanna latiriyɛ bolo. Wo kɛlɛ-nyɔgɛnu burimatoe ye tarɛ magbenna ka tara-keri-fan sɔ-bole rabɛn ka wo tuwa anu matanka-koe la.

⁶Anu ya bɛ balannu naka. Yi tugura a rɔ ha wola mansɛla mɔgɛnu kumakɔra.

⁷Anu ya wola mansɛla musi bira ka a makolɔn labɔ luyi ma. A fɛ-biralɛnu bi dila a fɛ iko purulannu. Anu bi anu kɔgɛ magbesila yisi-tinya bolo.

⁸Wole Ninɛfa kɛnu bi wo burila wo yogenu kɔrɔ iko balan wa keri, wo yi ye a burila yigila nya min. Wola kɛlɛ-den-kunyɛnu bi a fɔla ko, “Wo ni wo sɔ. Wo kana ta.” Kɔnɔ hali mɔgɔ-den-kelen ma a yɛ lasɛgi anu ma.

⁹Wo yogenu bi a fɔla ko, “Fen-koloma-siyaman bi anu bolo. Wo ni anu bi. Ma ni anuna sɛnɛnu anubɛ anuna wodi-gbɛnu bi wona.”

¹⁰Wole Ninɛfa kɛnu, wola soe ara kasara pɔ! Wo bɛɛ ara wo buri. Nyɔ ara ma tonbɔn la. Wo ara mɔlɔkɔn kilan bolo ka ma tulan!

¹¹Wole Ninɛfa kɛnu, wola soe kɛ ye mintɔ gbɛ? Fɔlɔ nun, a manɛ iko yara-wɔrɛ. Fɔlɔ nun, a mani de iko yara-bulan de-nyini tinɛ. Fɔlɔ nun, wola soe kɛ lafɛrɛnɛ iko yara-denbɛ anubɛ a dan tenbi faran la,

¹²ado yarɛ si a dɔntɛ faga. A si wo rafarafara ala musi anubɛ ala dannu ye. Faran la si fa dɔntɛ la a bolo pen!

¹³Mari Sɛnbɛ-Bɛɛ-Tigi ko wole Ninɛfa kɛnu ni wo tole masɔ. Wo yogo-bɛrɛbɛrɛ le ale la. Wo si wola kɛlɛ-kɛ-kirindinu mintan gburr! Wola kɛlɛ-nyana dama kunyɛ si to kɛlɛ rɔ. Wo ara min bɛɛsi bi kɛlɛ rɔ, ale fanan si wonu bi wo bolo. Wola kilayɛnu ti ta tun ka gbɛsɛ-gbɛsɛnu makele nyamanita-mɔgɛ doinu na.