Read Kuranko Sakaraya 1 Bible Online

Sakaraya 1 - Kuranko bible

Sakaraya 1

¹ Pasiya Mansa Dariyasila mansayɛ san fila nyɔgɛ, karɛ segin nyɔgɛ ma, Mari ya sarakanɛ kɛ don Bɛrɛkayala dan, nde, Nɛbi Sakaraya bolo, Idɔ mamanɛ, kɔni.

²Mari Sɛnbɛ-Bɛɛ-Tigi ya a fɔ nde, Sakaraya ye ko n ni a fɔ wole, ala mɔgɛnu ye ko ale Mari fonde bɔnɛ wo benbanu kuma nun dɔgɔma-ma-de!

³Kɔnɔ kaka, a ye a fɔla ko wo ni sɛgi ale Mari ma. A ko ale bɛrɛn si a ya-lamunun wo la.

⁴Mari ko wo kana wo benbanu kɛ-nya bi. A ko wati do ara tenbi nun, a ya ata nɛbinu sɔ anu bara alako anu ni anu fara ko-yogoma-kɛ la kɔnɔ anu ma anu tole masɔ a la ka a kan to a gbɛ rɔ.

⁵A ko wo benbanu anubɛ nɛbi wonu sa anu niyi la tun.

⁶Ala wɔli-kɛlɛ wonu minnu bi ata nɛbiyɛ la, a ko wonu ya wo benbanu makawandi-siyaman kɛ ka tɔn fanan di anu ma kɔnɔ anu ya wonu kan bɔrɔbɔ ka tɔrɔya-belebele sɔrɔn. Wo kɔma, a ko anu ya anu sɔ anu hakɛ la ka a fɔ ko anu ya tɔrɔyɛ min sufa sɔrɔn Mari Sɛnbɛ-Bɛɛ-Tigi bolo, wo bɛnta le, yɔ, ado wo bɔra-a-la iko ale Mari ya a miri a ma nya min! Soeenu Yen-Koe

⁷Dariyasila mansayɛ san fila nyɔgɛ, karɛ tan-ni-kelen nyɔgɛ ma min tɔgɛ Sebati, wo tele mogan-ni-nani nyɔgɛ ma, Mari ya sarakanɛ don nde, Sakaraya bolo ko-rayirɛ rɔ suyi rɔ.

⁸ N ya Marita melika yen siginɛ so-wulan la gbɔfɛ kuma lɛɛ rɔ, ado so sawa sɔnɛ a kɔma. Kelan wulennɛ. Kelan mapusennɛ. Kelan gbɛnɛ. A laburilɛ siginɛ so sawɛ wonu na.

⁹Melika min bi ko-rayirɛ kɛ kɔrɛ yirala n na, n ya wo manyinika ko, “N fa, soee kɛnu kɔrɛ ye kama?” Wo ya a fɔ n ye ko a si a kɔrɛ yira n na.

¹⁰Wo kɔma, Marita melika min bi so-wulan la, wo ko ale le ya soee doi wonu sɔ duninyarɔ-tagama la.

¹¹Minnu siginɛ soee doi wonu na, wonu ya a fɔ Marita melika ye ko, “Male ara duninya bɛɛ korongban. Ma ya a yen ko duninya mumɛ bɛɛ ye yisi-kimɛ rɔ.”

¹²Wo kɔma, Marita melika kumara Mari Sɛnbɛ-Bɛɛ-Tigi ye. A ko, “A ara san bi-wɔrɔnfila bɔ dɛgɛdɛgɛ, i fonde bɔnɛ Yerusalɛm soe anubɛ soe doinu kuma Yuda nyamanɛ rɔ. I fonde bɔnɛ si to kɛnu kuma ha muntuma?”

¹³Melika min bi ko-rayirɛ kɛ kɔrɛ yirala n na, Mari Sɛnbɛ-Bɛɛ-Tigi ya yisi-kima-kumɛ fɔ wo ye.

¹⁴Wo kɔma, Mari ya min fɔ, melika wo ko n ni wo rakaran wole, Isirɛla mɔgɛnu ye. A ko keninteya-belebele ye a bolo ata so-yabɔnɛ Yerusalɛmna ko la.

¹⁵A ko a diminyanɛ sibolo-gbɛrɛnu ma minnu siginɛ yisi-kimɛ rɔ kaka. A ko a diminyanɛ anu ma bawo wo tumɛ wole, ala mɔgɛnuna koninteyɛ siginɛ a burɔ, anu bi wo yakɔrɔ-mamɔla kosɛbɛ!

¹⁶Woletɔ a ara sɛgi Yerusalɛm soe burɔ ka kinikini wo ma. Mari Sɛnbɛ-Bɛɛ-Tigi ko wo si a Bato-Bɔn anubɛ ata soe sɔ-kurɛ-kɛ tun.

¹⁷Mari Sɛnbɛ-Bɛɛ-Tigi ko ala soenu si sabati tun. A ko a si wole Yerusalɛm kɛnu dɛnbɛ ka wola soe wo ma a halalɛ la tun. Kere Nani Yen-Koe

¹⁸N ya sara-ninki-kere nani yen ko-rayirɛ do rɔ tun.

¹⁹Ale melika min bi ko-rayirɛ kɛ kɔrɛ yirala n na, n ya wo manyinika tun, n ko, “Kere kɛnu kɔrɛ ye kama wo?” Ale ko, “Wonu denu bi duninya-fanka-tiginu tamasereyɛ la min bara a ma, Yuda anubɛ Isirɛla nyamanita-mɔgɛnu anubɛ Yerusalɛm so-burɔ-mɔgɛnu ta ara nyɛnsɛn.”

²⁰Wo kɔma, Mari ya nunakɛ mɔgɔ nani yira n na.

²¹N ya nyinikalɛ sa, n ko, “Kei kɛnu nara nfen ma tinɛ?” Ale melika ya a fɔ n ye ko, “Wonu nara kere nani kɛnu takilan tinɛ le minnu bara Yuda nyamanɛ tinya ka nyɔ-mɔgɛnu tanyɛnsɛn.”