Read Kuranko Sakaraya 11 Bible Online

Sakaraya 11 - Kuranko bible

Sakaraya 11

¹Ile Lɛbanan nyamanɛ, ila dɛnu naka alako tɛ ni na sida-kɔlɔma bɛɛ mintan i rɔ.

²Ile pain[5] kɔlɔma, i ni di biribiri bawo sida-kɔlɔma-nyimɛnu bara-koe ara ka-a-la. Ile ɔki-kɔlɔma minnu bi Basan nyamanɛ rɔ, ile fanan ni di biribiri bawo gbɔngbɔn ma ara kerikeri.

³Wo ni wo tole masɔ saga-fɛ-biralɛnu di-kɛ-kan la bawo kolo-fen de-nyini-tinɛnu na ara gbana. Wo ni wo tole masɔ yarɛnu worondo-kan la bawo anu bi anu sala fɔgbɛ minnu kɔrɔ Yorodan bɛ dala, wo bɛɛ ara ban.

⁴Nta Mari Alla ya a fɔ n ye ko n ni ma saga-fɛ-biralɛ la sagɛ wonu ye minnu bi nala fagala.

⁵Minnu bi anu sanna, wonu si anu faga, anu ti nanparan-wo-nanparan sɔrɔn. Minnu bi anu soge mayirala, anu si a fɔ ko, “Mari tanto, n bi mala fen-tigi la.” Minnu bi saga-fɛ-birala nun, wonu bɛrɛn ma kinikini sagɛnu ma.

⁶Mari ara a fɔ ko a ti kinikini mɔgɔ-wo-mɔgɔ ma tun ata nyamanɛ kɛ rɔ. A ko ale le ya mɔgɛ wonu nadon anu nyɛrɛta kun-tigi wonuna sɛnbɛ kɔrɔ. A ko kun-tigi wonu si nyɔ tinya pɔ, ado a ti sɔn ka ala mɔgɛnu nabɔ anuna sɛnbɛ kɔrɔ mumɛ!

⁷Woletɔ minta ye sagɛ wonu na, wonu ya nde, Sakaraya ma saga-fɛ-biralɛ la sagɛ wonu ye minnu bi nala fagala. N ya saga-lagbengben-kɔlɔma fila bi. N ya kelan wo tɔgɔ sa “Diyanayɛ,” n ya doi wo tɔgɔ sa “Kan kelan.” N ya saga-fɛ-biralayɛ dabira.

⁸N kuruta saga-fɛ-birala sawɛ minnu ma, n ya wonu gben karɛ kelen kɔrɔ. N sɔgɔ labɔra sagɛnu fanan na ha n bandanta anu kɔrɔ.

⁹N ya a fɔ sagɛ wonu ye ko, “N ti wo fɛ-bira tun. Ni min bi fagala, wo ni faga. Ni min bi kasarala, wo ni kasara. Ni minnu tora, wonu ni to anu nyɔgɔn dɔnna. Tana ma wo la.”

¹⁰Saga-lagbengben-kɔlɔma kelan min tɔgɛ “Diyanayɛ,” n ya wo rakeri alako bɛɛ ni a lɔn ko Mari ara sarama-kan min kiri sibole bɛɛ ye duninya rɔ, wo ara boloka,

¹¹ado wo tele nyɛrɛ rɔ, sarama-kan wo bolokara. Sagɛ minnu bi nala fagala, ado anu yɛ bɛnnɛ n ma, wonu nara to a lɔnna ko sarama-kan boloka-koe a ma, Mari kuman-kan le.

¹² Nde, Sakaraya ya a fɔ anu ye ko, “Ni n sara-sɔgɛ ye wo la, wo ni n sara. Ni n sara-sɔgɔ sa wo la, awa, tana ma.” Wo le ya a ma, anu ya n sara wodi-gbɛ-gbu bi-sawa pe la.

¹³Mari ya a fɔ n ye ko n ni wodi wo bi ka ta a lakɛ bɔnku-daga-sɔlɛ ma. Woletɔ n ya wodi wo bi ka ta a lakɛ bɔnku-daga-sɔlɛ ma Mari Bato-Bɔn la bawo wodi wo ma kolo.

¹⁴Wo kɔma, saga-lagbengben-kɔlɔma kelan min tɔgɛ “Kan kelan,” n ya wo fanan takeri alako ka a yira ko kan kelan min bi Yuda anubɛ Isirɛla tɛma, wo ara tɛgɛ anu nyɔgɔn na gbat!

¹⁵Wo kɔma, Mari ya a fɔ n ye tun ko n ni don saga-fɛ-biralayɛ la iko saga-fɛ-birala-kuntan

¹⁶bawo a ye nala saga-fɛ-biralayɛ tola mɔgɛ do bolo minna ko sa sagɛ wonuna ko rɔ. Min ba to-a-rɔ, a ti wo nyini. Min ba ta a kun fɛ, a ti wo gba bɔ. Min ba tanban, a ti wo dandan. Minnu fɛrɛ nɔrɔnnɛ anu ma, a sa wonu de-nyinina. A sɔnsɔnnɛ wonu denu dɔn ma hali anu kolenu ma to.

¹⁷Mari ko saga-fɛ-birala-kuntan wo si halaki pɔ bawo a ara ala sagɛnu boloka. A ko alamɛ wo bole tɛgɛra a la kɛlɛ rɔ. A bolo-nyimama-yɛ ni tii fanani.