Read Kuranko Sakaraya 12 Bible Online

Sakaraya 12 - Kuranko bible

Sakaraya 12

¹Mari min ya san-kole rafulen ka dugu-kole ladan ka hadama-dan-niyi bila a rɔ, Mari kelan wo le ya kumɛ kɛ fɔ Isirɛla ko la.

²A ko a si Yerusalɛm ma iko gbɛɛ. Sibole minnu bi ala foolɛ rɔ, wonu si a min ha anu ni to tonko-tankanna. A ko anu si bui Yerusalɛm soe anubɛ soe donu ma Yuda nyamanɛ rɔ.

³Kɔnɔ wo wati wa ke, a ko a si Yerusalɛm ma iko kuru-gbilimɛ. Sibolo-wo-sibolo ya a nyɛrɛ ma kuru wo kɔrɔbilɛ la, a ko wo si dumɛ sɔrɔn. Woletɔ sibole bɛɛ si anu kundɛn Isirɛla kan ma.

⁴Wo wati wa ke, a ko a si anuta soeenu takilan ka anu naburilɛnu nayuwaya. A ko a si a kolan bɛn Yuda kɛnu ma ka anu yogenuna soeenu nafiyonya.

⁵Wo si a ma, Yuda bɔnsɔn-mɔgɛnu ni to a fɔla anu nyɔgɔn ye ko anuta Mari Alla Sɛnbɛ-Bɛɛ-Tigi le ye sɛnbɛ dila mala so-karantan Yerusalɛm kɛ wonu ma.

⁶Wo wati wa ke, a ko a si Yuda bɔnsɔn-kun-tiginu ma iko tɛ wa na a labɔ sɔgɔ-ladɛnnɛ ma. Ni wo ma, a ko anu si ma iko kala-mɛlan wa a kun nabɔ bin-gbalɛ ma. Sibole minnu bi ala foolɛ rɔ, a ko Yuda kɛnu si wonu halaki kɔnɔ anu Yerusalɛm kɛnu si to anu gbɛ rɔ yiri!

⁷A ko ale Mari si a ma, Yuda kɛlɛ-dannu fɔlɔn ni nɔ-ko sɔrɔn alako gbiliyɛ min bi Mansa Dawuda bɔnsɔn anubɛ Yerusalɛm kɛnu bolo, wo kana na tenbi Yuda mɔgɛ toenutɛ la.

⁸Wo wati wa ke, ale Mari si Yerusalɛm kɛnu nakanan. Hali minta ma gbɛlɛ, wo kole si gbɛlɛya iko Mansa Dawuda. A kegeyɛnu si sɔ kɛlɛ-dannu yarɔ iko ale Marita melika ye a mala nya min, Alla, kɔni.

⁹Wo wati wa ke, sibolo-wo-sibolo wa a nyɛrɛ ma Yerusalɛm kɛlɛlɛ la, a ko a si wo halaki.

¹⁰ A ko a si kinikinɛ anubɛ madiyalɛ ladon Mansa Dawuda kegeyɛnu anubɛ Yerusalɛm kɛnu yisi rɔ. Anu ya min tasɔgɔ-sɔgɔ ka a faga, anu ba wo yen anu yɛ la, anu ni na to kinikinina mɔgɛ wo ma ka di wola ko la biribiri iko anuna den kelan wa faga. Anu si di iko mɔgɔ wa foo a sarɛ la.

¹¹Wo wati wa ke, a ko anu si di Yerusalɛm soe burɔ iko anu ya a ma nya min Hedadi-Rimɔn soe burɔ Magidɔ lɛɛ rɔ.

¹²Denbaya kelen-kelennamɛ-bɛɛ si di a dan na. Mansa Dawuda kegeyɛnu wo, Netan kegeyɛnu wo, Lifayi kegeyɛnu wo, Sɛmɛyi kegeyɛnu wo, wonu dama si di. Denbaya-toe mumɛ bɛɛ si di a dan na. Bɛɛ si di anu nyɔgɔn fɛ anu dan na, kei wo, musu wo.