Read Kuranko Sakaraya 13 Bible Online

Sakaraya 13 - Kuranko bible

Sakaraya 13

¹Wo wati wa ke, Mari Sɛnbɛ-Bɛɛ-Tigi ko tenke si bɔ alako Mansa Dawuda kegeyɛnubɛ Yerusalɛm kɛnu ni anu ku a rɔ ka anu hakɛ anubɛ anuna bɛsi-kɔ-koe ku anu ma feufeu!

²Wo wati rɔ, bɛsɛnu tɔgɛ si tunu nyamanɛ wo rɔ yen! Mɔgɔ-wo-mɔgɔ ti a miri anu ma tun! A ko a si foninya-nɛbinu wara-koe ka-a-la nyamanɛ wo rɔ. Hali bɛsi-kɔ-miriya si bɔ mɔgɛnu burɔ.

³Wo kɔma, ni mɔgɔ-wo-mɔgɔ ya a tui ka wɔlɔyiya-kumɛ fɔ min kara Allatɛ ma, a sɔrɔnnɛnu si a fɔ a ye ko anu bi a fagala le bawo a ara a nyɛrɛ ma nɛbi la ka foninyɛ fɔ ale Mari tɔgɛ rɔ. A wa wɔlɔyiya-kumɛ fɔ tonya ma min na, a fa anubɛ a na ni a sɔgɔ alako a ni faga.

⁴Wo wati wa ke, nɛbi-wo-nɛbi ti a nyɛrɛ matɔgɔ ata ko-rayirɛ la. A ti nɛbiya-kasa-bɔrɔ-kurɛnu kɛ a ma alako a kana mɔgɛ yanfa nya min.

⁵Ado nfan, wo tigi si a fɔ ko nɛbi ma ale la. Sɛni-salɛ le ale la. A si a fɔ ko ale ye sɛni-sɛ le la a siyi-tele-bɛɛ kɔrɔ.

⁶Hali foninya-nɛbinu, ni mɔgɛ ya wonu manyinika ka a tɛgɛ tɛlɛ-pɛrɛ[6] minnu bi a kɔgɛ ma, a si a fɔ ko a ta-nyɔgɛ gbɛ le wo la wo tumɛ a ye wo wara bɔn la.

⁷ Mari Sɛnbɛ-Bɛɛ-Tigi ya a fɔ ala faan ye ko a la ni wuli a wɔli-kɛ-nyɔgɛ saga-fɛ-biralɛ kan ma. A wa ban a fagala, ala sagɛnu ta si nyɛnsɛn. Mari ko a si bui ala mɔgɛnu ma, ala sagɛnu, kɔni.

⁸A ko ni a ya mɔgɔ sawa-wo-sawa taran, a si fila-fila bɔ wonu na ka anu faga.

⁹A toe minnu bi tola anu niyi la, a si a lagbɛlɛya anu kuma alako anu ni sɛninya iko sɛnɛ anubɛ wodi-gbɛ si sɛninya tɛ rɔ nya min. Wo kɔma, ni min ya a madiya, a si a wɔlɔ matɔlɔ wo la. A si a fɔ anu ye ko atɛ le anu denu na. Anu fanan si anu sɔn a la ko anuta Alla le ale la.