Read Kuranko Sakaraya 14 Bible Online

Sakaraya 14 - Kuranko bible

Sakaraya 14

¹Marita kiti-tɛgɛ-tele ara gbɛrɛn. Wo tele nyɛrɛ rɔ, sibolo-gbɛrɛnu si bui Yerusalɛm soe ma ka wola fen-kolomɛnu tala wo ya la.

²Mari ko a si sibole bɛɛ kundɛn kan-tina-kelen ka Yerusalɛm kɛlɛ. Anu si wola soe bi wo bolo ka wola bɔnnu nakolonya ka digin wola musinu ma. Kɛlɛ si ta nyama tɔnkɔn la. A toenu si to wola so-tinyanɛ burɔ nyɔ.

³Wo kɔma, Mari si ta sibole kɛnu kɛlɛ iko a duruta a mala nya min nun.

⁴Wo wati rɔ, a si sɔ Ɔlifi kɔnkɛ kuma Yerusalɛm tele-bɔɛ wara la. Kɔnkɛ wo si bɔ tiila tele-bɔɛ wara la ha tele-yigi. A tɔnkɔn kelan si ta kantɔ-wara la, a tɔnkɔn doi ni ta dugula wara la.

⁵A tɛmɛ wo si ma wunban la. Wunban wo si ma wo buri-kɛ-kilɛ la. Wo si wo buri iko wo benbanu ya a ma nya min dugu-yɛrɛyɛran kɔrɔ Yuda Mansɛ Yusayata wati rɔ. Nta Mari Alla si na ata melika bɛɛ la a bolo.

⁶Wo wati wa ke, kima ti na wulɔn.

⁷Pinpi ti burun wo ma. Su-ni-tele, wan le rakanɛ waran! Mari kelen pe le ya kɛnu ma-wati lɔn.

⁸ Wo wati wa ke, yi-kura si dugi punsɔgɔ Yerusalɛm soe burɔ ka fara fila la. A tɔnkɔn doi si ta a labila Dalɛ Faganɛ ma. A tɔnkɔn doi fanan si ta a labila Mɛdetereniyan kɔgɔ-yi ma. Sama, telema, a ye yigila le dɛɛ!

⁹Wo wati rɔ, Mari si ma duninya-mumɛ-mansɛ la. Duninya-mɔgɛ bɛɛ si Mari kelan kele a tɔgɔ kelan la ka a bato.

¹⁰Ka a bi kantɔ-wara la Kiba soe ye kan min ha ka yigi dugula wara la Rimɔn soe ye kan min, tɛngbɛnya wo dugi mumɛ bɛɛ ra si kɛnya bɛrɛtɛ! Hali wo, Yerusalɛm soe dɔrɔn si to a gbɛ rɔ kɔnkɛ kuma. Yerusalɛm soe si a dabira tara-don-dɛ ma min tɔgɛ Bɛnyamɛ. Soe wo le ye tala sɔla furr, ha tarɛ tonke don-dɛ ma min bi a sɔ-gba-kɔrɛ rɔ. A si ta fanan ha tara-layan-bɛ do ma min tɔgɛ Hananɛli. Wo kɔma, a si ta sɔla ha mansɛla nɔnbɔ-gbɔ-yi burun-tinɛ.

¹¹ Mɔgɛnu si sigi lafɛrɛ rɔ Yerusalɛm soe burɔ. Yerusalɛm kasara-ko-kuma fenfen ti taran mɔgɛnu da rɔ tun.

¹²Sibolo-wo-sibolo ya Yerusalɛm soe kɛlɛ a kɔrɔmɛ la, Mari si kiraya-fitinɛ lana wonu kuma. Anu kɛndɛ si to, anu bi tuluna. Anu yɛ si tuli anu ya-denkɛ rɔ. Anu nagan si tuli anu dɛ rɔ.

¹³Wo wati wa ke, Mari si a ma, anu kɔndɔ ni fili ha min ba a tintan a ta-nyɔgɛ la, a ni wo kɛlɛ.

¹⁴Yuda kɛnu si Yerusalɛm kɛnuna kɛlɛ kɛ. Sibolo-gbɛrɛnu bi nala fan minnu na anu bolo Yerusalɛm kɛlɛ tinɛ, Yuda kɛnu si wonu toronde wonu na ka ta a la, a sɛnɛ wo, a wodi-gbɛ wo, a fɛrɛya-bɔ wo.

¹⁵Kiraya-fitinɛ si bɔ anu yoge wonuna kolo-fannu ma, a so wo, a sofɛlɛ wo, a nyomo wo, sofɛlɛ anubɛ so ye dan min sɔrɔnna wonu wo, anubɛ a toenu.

¹⁶ Sibolo-gbɛrɛ-toe minnu bi tola anu niyi la, san-bo-san, wonu si ta Yerusalɛm Mari Sɛnbɛ-Bɛɛ-Tigi bato-tinɛ ka a gbiliya iko mansɛ. Anu si Lele-Sɔɛ-Ladɛn kɛ anu nyɔgɔn fɛ.

¹⁷Sibole min ba a ban tala Mari Sɛnbɛ-Bɛɛ-Tigi bato-tinɛ nyɔ ka a gbiliya iko mansɛ, hali banda-kolo kelan ti bui wonuta nyamanɛ rɔ.

¹⁸Ni Iyipiti kɛnu ya anu ban tala Lele-Sɔɛ-Ladɛn wo rɔ, sibole doinu bi kiraya-yogoma-su min sɔrɔnna Mari bolo, anu fanan bi wo le sɔrɔnna.

¹⁹Ni sibolo-gbɛrɛnu anubɛ Iyipiti kɛnu ma sɔn tala Lele-Sɔɛ-Ladɛn rɔ, Mari ye kiraya-yogomɛ wo sigila anu ma.

²⁰Wo wati rɔ, hali soeenu kanna-tɛlan, anu si a sɛbɛ tɛlan wonu ma ko, “Dantɛgɛnɛ Mari Ma.” Hali fen-te-daga minnu bi Bato-Bɔn la, wonu sɛninyanɛ si taran iko saraka-mintan-tinɛ mirannu bi nya min.

²¹Dagɛ min bɛɛsi ye Yuda anubɛ Yerusalɛm, dagɛ wonu dantɛgɛnɛ si to Mari Sɛnbɛ-Bɛɛ-Tigi ma. Saraka-bɔlɛnu si dagɛ kɛnu ma saraka sogo-te-fan la. Wo wati wa ke, yila-wo-yila ti taran Mari Sɛnbɛ-Bɛɛ-Tigi Bato-Bɔn la.