Read Kuranko Sakaraya 8 Bible Online

Sakaraya 8 - Kuranko bible

Sakaraya 8

¹Mari Sɛnbɛ-Bɛɛ-Tigi ya sarakanɛ kɛ don nde, Sakaraya bolo tun.

²A ko ka a tɛgɛ ata hinɛ ma ala mɔgɛnu bara la, Yerusalɛm dɛnbɛn-sɔgɛ ye a la. Keninteyɛ min bi a bolo Yerusalɛmna ko la, wo le ya a ladiminya nyɔ-yogenu ma.

³A ko a si a ya-lamunun Yerusalɛm soe la ka ta a mayigi ata so-sɛnimɛ wo rɔ tun. A ko mɔgɛnu si to soe wo kelela ko Soe Min Telennɛ a ye. A ko anu si Mari Sɛnbɛ-Bɛɛ-Tigita kɔnkɛ kele ko Kɔnkɔ-Sɛnimɛ.

⁴A ko kɔlɔma sɔnɛ kɛmɔgɛ anubɛ musu kɔrɛ minnu kɔrɔkɔrɔyɛ bolo, wonu si anu matagama ka anu mayigi tun Yerusalɛm soe burɔ iko fɔlɔ.

⁵A ko mɔgɔ si tolon-kannu namɔɛn soe tonke bɛɛ rɔ dennɛnu bolo tun.

⁶Ale Mari Sɛnbɛ-Bɛɛ-Tigi ko wole, Isirɛla mɔgɛ toe min tonɛ, wo si wo miri ko, ko le min ti ke mala kɔnɔ ko-wo-ko sa nyɔ ale Mari si kuri min ma.

⁷Anu tara wole, ala mɔgɛnu na kan tinɛ minnu tɔ, ale Mari Sɛnbɛ-Bɛɛ-Tigi ko a si ke wo kunyɛ bɔla gbaran rɔ nyɔnu tɔ. A ko ala mɔgɛ minnu bi tele-yigi anubɛ tele-bɔɛ waralɛ rɔ,

⁸a ko a si wo kundɛn Yerusalɛm soe burɔ. Wo si ma ata mɔgɛnu na. Ale fanan si ma wota Alla la. A ko a si mansayɛ kɛ wo kun na lanayɛ anubɛ latelan rɔ.

⁹Mari Sɛnbɛ-Bɛɛ-Tigi ko wa wo kerinteya. Nɛbinu ya kumɛ minnu fɔ Bato-Bɔn kurukɛ wati rɔ nun a kurɛ la, wo ye kuma kelan wo le lamɔɛnna kaka.

¹⁰A ko yanni wo wati ni ke, hali wole anubɛ wola kolo-fannu masan-wodi ma kolo wo bolo. A ko mɔgɔ ma ke a halala-wɔlɛ kɛla bawo wo yogenu taranta wo kan ma kan tinɛ bɛɛ rɔ. A ko ale le ara mɔgɛnu nakɛ anu nyɔgɔn ma nun.

¹¹Kɔnɔ kaka, wole Isirɛla mɔgɛ toe minnu tonɛ, Mari Sɛnbɛ-Bɛɛ-Tigi ko a si wo bira nya-gbɛrɛkɛ ma.

¹²A ko wo si wola fui-fannu fui wo fanbolo. A ko wola ki-fannu si nanfa kubukubu! Wola dugi si nɔrɔn ki-fannu kɔrɔ, ado bandɛ si na! A ko a si duwɛ kɛnu di wole, ata mɔgɛnu ma minnu tonɛ gbɛ!

¹³A ko fɔlɔ nun, sibolo-gbɛrɛnu kɛnɛna anu nyɔgɔn dankala ko, “Alamɛ i kasarata iko Yuda anubɛ Isirɛla nyamanɛ kasaranɛ nya min.” Kɔnɔ a ko ale si wo kisi wo ma. Wo kɔma, ale sibolo-gbɛrɛ kelan wonu si duwa anu nyɔgɔn ye ko, “Alamɛ wo sabatira iko Yuda anubɛ Isirɛla sabatinɛ nya min.” Woletɔ wo ni wo kerinteya. Wo kana kilan.

¹⁴Mari Sɛnbɛ-Bɛɛ-Tigi ya a fɔ ko wo benbanu bara a ladiminya min kɛ, a ya kasarɛ rabɛn anu kan ma, ado a ko a ma a fonde yɛlɛma mumɛ! A ya a miriya lawɔli.

¹⁵Kɔnɔ a ko kaka, wo kana kilan bawo wo miriyɛ ye a bolo ka duwa Yerusalɛm anubɛ Yuda kɛnu ye.

¹⁶ A ko wo ye min mala, wo le kɛ la. Wo ni tonyɛ fɔ wo nyɔgɔn ye. A ko wo ni telenbagaya-bɛrɛbɛrɛ lana kiti-sa-tinɛ alako yisi-kimɛ ni to wo tɛma.

¹⁷A ko wo kana wo miri ko-yogomɛ ma wo nyɔgɔn tɔgɔ rɔ. A ko wo kana foninyɛ fɔ gboroli-kɛ-tinɛ bawo foninya-fɔɛ wo, telenbɛlitayɛ wo, wunduyogoyɛ wo, a ko wonu gbo a ye.

¹⁸Mari Sɛnbɛ-Bɛɛ-Tigi ya sarakanɛ kɛ don nde, Sakaraya bolo tun.

¹⁹A ko wo ye sunyɛ min donna san karɛ nani, anubɛ karɛ loli, anubɛ karɛ wɔrɔnfilɛ anubɛ karɛ tan ma, wonu si ma wola ladiya-ladɛn-karɛnu na Yuda kɛnu ye. Kɔnɔ a ko fɔ tonyɛ anubɛ yisi-kimɛ ni diya wo ye.

²⁰Ale Mari Sɛnbɛ-Bɛɛ-Tigi ko wati ye nala, mɔgɔ-siyaman si na Yerusalɛm soe burɔ ka bɔ so-siyaman tɔ.

²¹Soe doinu si a fɔ soe doinu ye ko, “Ma ye tala Mari Sɛnbɛ-Bɛɛ-Tigi bato-tinɛ ka a manyinika duwɛ wara-koe la. Ma ta ma nyɔgɔn fɛ.”

²²Mari ko fanka ye sibolo-gbɛrɛ minnu na, wo siyaman si na a bato tinɛ Yerusalɛm soe burɔ ka a manyinika ata duwɛ wara-koe la.

²³Mari Sɛnbɛ-Bɛɛ-Tigi ko wo wati wa ke, sibolo-gbɛrɛ mɔgɔ tan si Yahudiya mɔgɔ kelen madiya ko, “Ma ye a fɛ ka ta i fɛ bawo ma ya a lamɔɛn ko Alla ye Isirɛla mɔgɛnu fɛ.”