Read Kuranko Sakaraya 9 Bible Online

Sakaraya 9 - Kuranko bible

Sakaraya 9

¹ Mari kolan ye mɔgɛ bɛɛ la katarala Isirɛla bɔnsɔnnu ma. Mari ko a si tɔrɔyɛ lana Hadiraki nyamanɛ anubɛ Damasika soe kan ma,

²hali Hamati soe min bi Hadiraki wo dafɛ. Hali anu hɛnkili kolo nya-wo-nya, a si tɔrɔyɛ lana Taya anubɛ Saidon soenu ma fanan.

³Taya soe minta tarɛ ara koloya ka a nyɛrɛ ragbɛlɛya gbon, anu bara sɛnɛ anubɛ wodi-gbɛ ladɛn boi ha a raboroko-barakanɛ iko gbangban.

⁴Kɔnɔ hali wo, Mari si anu bolo-fan mumɛ bɛɛsi bi anu bolo ka anu kɔrɔ kolonya filili! Wo kɔma, sɛ min bi anu bolo kɔgɔ-yi kuma, Mari si wo kasara pɔ, ado ale Taya soe si mintan gburr!

⁵ Asikalɔn so-burɔ-mɔgɛnu ba kɛ rayen anu yɛ la, anu si kilan. Kesa so-burɔ-mɔgɛnu si to anu tiniminina a rɔ dumɛ bolo. Ɛkirɔn kɛnu fanan yigi si tɛgɛ gbat! Kesa kɛnu si foo mansaya-kɔlɔma la. Asikalɔn soe si ma tonbɔn la.

⁶Sibolo-gbɛrɛ donu si sigi Asadadi soe burɔ. Filisitinu wasinɛ fan minnu tɔ, Mari si wo halaki pɔ!

⁷Anu ti soge anubɛ a yele dɔn tun iko anu duruta a mala nya min, ado dɔn-fen-haramunɛ ti ke anu dɛ ma tun. A mɔgɛ toe minnu tonɛ, wonu si ma Maritɛ la ka ma Yuda furu-nyɔgɛnu na. Ɛkirɔn so-burɔ-mɔgɛ toenu si kofu Isirɛla mɔgɛnu ma iko Yebusinu mara nya min.

⁸Kɔnɔ Mari si ala mɔgɛnu anubɛ a Bato-Bɔn kanan sibolo-gbɛrɛnu masibɛ ma. Ala mɔgɛnu yogo-wo-yogo ti anu nɔ tun bawo ale Mari ara a yen anu tɔrɔta anu bolo nya min.

⁹ Wole Yerusalɛm kɛnu, wo sewa. Yerusalɛm so-burɔ-mɔgɛnu, wo ni a lawɔyɔ sewɛ bolo. I ma wola mansɛ yen nala wo wara? A ara na nɔ-ko-sɔrɔn la a bolo. Kɔnɔ hali wo, a famayiginɛ ye nala. A siginɛ sofɛli-bulan la.

¹⁰ Mari ko ale mansɛ si kɛlɛ-kɛ-kirindinu wara-koe ka-a-la Isirɛla nyamanɛ rɔ. A mako ti taran soeenu na min tabɛnnɛ kɛlɛ-kɛ-koe la Yerusalɛm. A si kalabɛn-kalɛnu takerikeri. A si yisi-kimɛ lana sibolenu tɛma. Ka a bi kɔgɔ-yi-dan doi ma ka a sigi a dan doi la, a si mansayɛ kɛ wo dama rɔ. Ala mansayɛ dan da si bira Yufereti bɛ ma ha duninya dan.

¹¹ Mari ko ka a tɛgɛ sarama-kan wo ma ma tɛma min kirita saraka-yele la, wo donu bi biralɛ rɔ nyamani-gbɛrɛkɛnu tɔ minnu manɛ wo yala iko kɔlon-tagbalanɛ, ado a si wo labɔ tɔrɔyɛ wo rɔ.

¹²Yigi ye wole mɔgɔ-biranɛ minnu bolo, wo ni wo sɛgi tun wola so-latankanɛnu tɔ. Wo ara min bɛɛsi nyɔgɔn tɔrɔyɛ dunu, a ko a si wo nyɔgɔn fila duwɛ di wo ma.

¹³A ko a si wole Yuda mɔgɛnu ma ata kalɛ la. A ko wole Isirɛla mɔgɛnu si ma kalɛ wo bɛn la. A ko a si wole Yerusalɛm mɔgɛnu nawɔli ka wo ma kɛlɛ-den-kɛndɛ la Kirikinu kan ma.

¹⁴Mari si bɔ gbɛ rɔ wole, ala mɔgɛnu kuma. Ala kalabɛn mɛnsan si ta tiila a ma iko banda-nyin-masɔgɛ. Ma Tigi Mari si kɛlɛ-buri fɛ. A si na tiriya iko fɔnyɔ min bi yɛlɛla a ma.

¹⁵Mari Sɛnbɛ-Bɛɛ-Tigi si ma wo matanka-fan la. Wo si wo kɛlɛ-nyɔgɛnu nɔ lenfiran-kuri la. Wo si gbele-gbelen kɛlɛ-kɛ-tinɛ iko gbɛɛtoe. Wo si yele labɔ wo yogenu ma. Yele si yigi anu ma iko saraka-yele ye yigila nya min saraka-mintan-tinɛ tonko nanɛ ma.

¹⁶Wo tele nyɛrɛ wa na, Mari wota Alla si wole, ala mɔgɛnu nakisi iko saga-fɛ-biralɛ si ala sagɛnu nakisi nya min. Wo si malan ata nyamanɛ kuma iko kuru-da-gbɛlɛmɛnu.

¹⁷Nyamanɛ wo si kinya ka diya dɔgɔma-ma-de! Wola dɔn-fannu anubɛ wola minni-fannu si wola fonikenu tagbɛlɛya.