Read Kuranko Malakayi 1 Bible Online

Malakayi 1 - Kuranko bible

Malakayi 1

¹Mari ya kumɛ kɛ le don nde, Nɛbi Malakayi bolo ka a latenbi Isirɛla mɔgɛnu ma.

² Mari ya a fɔ ala mɔgɛnu ye ko ka a bi fɔlɔ ma ha kaka, anu di a ye. Kɔnɔ anu bi a fɔla ko anu si a lɔn kama ko anu di Mari ye? Mari ya anu yabi ko na-kelenmɛ le Yakoba anubɛ Isɔ la. A ko Yakoba anubɛ a kegeyɛ di a ye

³kɔnɔ Isɔ anubɛ a kegeyɛ ma di a ye. A ko a ara Isɔla kɔnkɔ-nyamanɛ tinya ka nyɔ ma fira-wulinu-halalɛ la.

⁴Idɔm kɛnu, Isɔ kegeyɛ, kɔni, tumado wonu si a fɔ ko, “Hali mala soenu bara kasara, ma si anu sɔ-kura-kɛ tun.” Ni anu ya wo fɔ, Mari si a fɔ worɔ ko ni anu ya anu sɔ tun, a si na anu tii mɛmɛ! Mɔgɛnu si na nyamanɛ wo kele ko, “Karagbɛlɛya-nyamanɛ.” Anu si to a fɔla tun fanan ko, “Mari fonde bɔnɛ nyɔ-mɔgɛnu kan ma tolon!”

⁵Isirɛla mɔgɛnu si kɛ rayen anu nyɛrɛ yɛ la. Anu si a fɔ ko, “Hali mata nyamani ma min na, sɛnbɛ ye Mari bolo nyɔ kuma fanan.”

⁶Mari Sɛnbɛ-Bɛɛ-Tigi ya a fɔ ata saraka-masɔlɛnu ye ko a bɛnta, den-kei ni a fa gbiliya. A bɛnta fanan, wɔli-kɛlɛ ni a tigi gbiliya. Kɔnɔ a ko wo fa le ale la kɔnɔ wo sa ale gbiliyala. A ko wo tigi le a la fanan kɔnɔ wo sa a gbiliyala. A ko a ma di wole saraka-masɔlɛnu ye mumɛ kɔnɔ hali wo, wo ye a manyinikala ko, “Ma ya a yira a la kama ko a sɔgɔ la ara bɔ ma la?”

⁷A ya a fɔ wo ye ko wo ye nala dɔn-fen-sɛninyabɛlɛ la a ye ata saraka-mintan-tinɛ kuma min kɛ, wo le ye a yirala a la ko a sɔgɔ la ara bɔ wo la. Wo kɔma, wo ya ale Mari manyinika tun ko, “Ma ma ale Mari gbiliya kilɛ nyamintan fɛ?” Mari ya wo yabi ko wole nyɛrɛ ara a yira a la ko ata saraka-mintan-tinɛ gbo wo ye.

⁸ Wo taranta kolo-fen-fiyon minnu dila a ma sarakayɛ la, wo kin? Wo taranta kolo-fen-namarɛ minnu dila a ma, wo kin? Wo taranta kolo-fen-kirɛ minnu dila a ma, wo kin? Nba, wo ni wo to wonu sufa dila wola mansɛnu ma, wa, ni anu si sewa wo la. Wo ye nyinina minnu ma mansɛ wonu bolo, anu si wonu di wo ma?

⁹Wole saraka-masɔlɛnu ni Alla matara alako a ni kinikini wo ma. Ni i ya a yen, a sa wola mataralɛnu yabila, wo gbɛ le.

¹⁰Mari Sɛnbɛ-Bɛɛ-Tigi ko alako nun, wole saraka-masɔlɛ mɔgɔ kelen ya Bato-Bɔn don-dɛ balan nun. Wo si a ma, mɔgɔ ti saraka-fuyinu mintan nyɔ. A sewani ma wonu na. A ko wo ya saraka-wo-saraka di a ma, a ti sɔn wo la.

¹¹Ka bɔ tele bɔɛ ha tele-yigi, mɔgɛnu bi ale Mari gbiliyala. A ko mɔgɛnu bi isɛnti mintanna a ye ka saraka-bɛrɛnu bɔ a gbiliya-koe la.

¹²Kɔnɔ a ko dɔntɛ minnu ma di wole ye, wo ye wo le bɔla. Wo ye a yirala a la ko ala saraka-mintan-tinɛ, fufafu le wo la. Bawo wo ye kɛnu mala, wo ye a lafɛyala kɛ-nya na le.

¹³Wole le gbunyara, wo ko wo ara bandan. Wo ya wo sunyɛnu sigi san ma a kɔrɔ. Wo ye tola nala kankanya-kolo-fan anubɛ kolo-fen-kirɛ anubɛ kolo-fen-namarɛnu na. Alla ko wole miri ko ale si sɔn wo la wo bolo?

¹⁴Kensuntenu bi yili-madiyɛ kɛla ko anu si na saraka-hakikɛ la ka bɔ anuna wɔrɛnu tɔ kɔnɔ yaga, anu sa nala fenfen na fɔ saraka-manyimanɛnu. Alla ko a si wo danka wola ko la. Mari ko mansa-makawanɛ le ale la. Duninya mumɛ bɛɛ ye kilanna ale le la.