Read Kuranko Malakayi 3 Bible Online

Malakayi 3 - Kuranko bible

Malakayi 3

¹ Mari Sɛnbɛ-Bɛɛ-Tigi ko a ye ala kilayɛ lanala min si kilɛ rabɛn a ye. Wo kɔma, wo ye wo Tigi min nyinina, wo si na a Bato-Bɔn la tiriya! Kilayɛ min yen-sɔgɔ-bɛrɛbɛrɛ ye wo la, wo si na ka a nyɛrɛta sarama-kan wara-koe fɔ.

² Mari kɛ wa na wati min, yon si ke tola a niyi la a kɔrɔ? Ale wa bɔ gbɛ rɔ, yon si kanan? A wa bɔ gbɛ rɔ wati min, a si ma iko sefini-diyamɛ min si nɔgɛ bɛɛ toronde kura-nɔgɔnɛ la. A si ma fanan iko numɛnuna tɛ min si nɛgɛ lalee bandin, ka a kɛndɛ bɔ a boe yala.

³A si kiti sa a kilɛ fɛ iko siyaki min bi wodi-gbɛ laleela ka a bɛrɛ bɔ a boe yala. Iko siyaki ye sɛnɛ anubɛ wodi-gbɛ sɛninyala nya min, Mari si saraka-masɔlɛnu fanan sɛninya wo nya na le. Woletɔ saraka-masɔlɛ wonu si ke saraka-hakikɛnu bɔla Mari ye.

⁴Wo kɔma, Yerusalɛm so-burɔ-mɔgɛnu anubɛ Yuda kɛnu si na sarakɛnu na Mari ye minnu si a hɛnɛ iko anu duruta a mala nya min nun.

⁵Mari Sɛnbɛ-Bɛɛ-Tigi ko a si bɔ gbɛ rɔ wo ye ka ko-yogoma-kɛlɛnu makuma. A duru wo, a yɛlɛn wo, a foninya-sereya-fɔla wo, minnu bi wɔli-kɛlɛnu kensunyala anu sarɛnu kuma wo, a kɛɛ-musu bolo-labirala wo, a kelenni bolo-labirala wo, a sundan bolo-labirala wo, ado anu fenfen sa a gbiliyala, a si wo bɛɛ kiti!

⁶Mari ko Mari le ale la. A ti yɛlɛma muk! Ka a tɛgɛ wo ma, a ko wole Yakoba kegeyɛnu, wo la ma ban natola wɛ.

⁷A ko wole bɔra wo benbanu denu na. Wonu ya ata tɔnnu boloka. Wonu ma sɔn anu bira koe ma. Mari ko wo ni sɛgi a ma tun, a si a ya-lamunun wo la. Kɔnɔ a ko wole ye a fɔla ko, “Ma si nfen ma min si a ma, ma ni sɛgi a ma?”

⁸Kɔnɔ Alla ye wo manyinikala ko a bɛnnɛ mɔgɛ ni ale Alla kensun, wa? Wo ma telen kɔnɔ a ko wo ye a kensunna. Wole ye a fɔla ko, “Ma ye a kensunyala kama?” A ko wo ye a kensunna yakanu anubɛ kɔ-fannu tɔ.

⁹Mari ko a ara wo dama danka bawo Isirɛla mɔgɛ bɛɛ ye a kensunyala gbɛ!

¹⁰ A bɛnta, a ni yaka min nyɔgɔn sɔrɔn wo bolo, a ko wo ni na wo dama la Bato-Bɔn la woletɔ dɔn-fan ra si boroko-baraka nyɔ rɔ. Mari ko wo ni a rasuma. A ko wo si a yen ni a ti san-kolo-dɛnu naka ka fen-nyima-siyaman nayigi wo ma biribiri!

¹¹A ko a ti sɔn tunbinu ni wola ki-fannu tinya. Wola ki-fannu si gbɔ tisikiri!

¹²Wo kɔma, a ko duninya sibole bɛɛ si wo kele ko mɔgɔ-sewanɛnu bawo wola nyamanɛ si ma sigi-tina-hakikɛ la.

¹³Mari ko wo ya kuma-gbondanɛ fɔ a ma. Kɔnɔ wo ya a manyinika ko, “Ma ya nfen fɔ i ma nun?”

¹⁴A ko wo ya a fɔ ko, “Ka Alla bato, fufafuyi le wo la. Ni ma ya ala kumɛnu bira ka a yira ale Mari Sɛnbɛ-Bɛɛ-Tigi la ko ma ara nimisa mala ko-yogomɛnuna ko la, wo si nfen nyinya ma ma?”

¹⁵Alla ko wole mirinɛ ko mɔgɔ-wasinɛnu denu dɔrɔn sewanɛ. Karagbɛlɛnu bara-koe ye tala yarɔ. Wo mirinɛ ko hali anu bi Alla rasumanna anuna ko-yogoma-ladan la, a sa anu tɔrɔla.

¹⁶Wo kɔma, minnu bi Alla gbiliyala, wonu bi kirabɔla anu nyɔgɔn na. Mari ye a wɔlɔ matɔlɔla wonu na. Anu bi min bɛɛsi fɔla, a ye wonu namɔɛnna. Mɔgɛ min bɛɛsi ye Alla gbiliyala, wonu tɔgɛ sɛbɛnɛ Allata hɛnkili-lamiri-buku rɔ.

¹⁷Mari Sɛnbɛ-Bɛɛ-Tigi ko anu si ma ata mɔgɛ la. Mari ko a wa a halala-mɔgɛnu kundɛn lunyɛ min, anu si ma atɛ la. Iko fa si kinikini ala dan ma nya min min bi wɔli kɛla a ye, Alla fanan si kinikini ata mɔgɛ wonu ma wo nya na le.

¹⁸A ko mɔgɛnu si dan-nafarɛ yen ata mɔgɔ-telennɛnu anubɛ karagbɛlɛnu tɛma. A ko dan-nafarɛ si yen fanan a gbiliyalɛ anubɛ a lafɛyalɛnu tɛma.