Read Kuranko Matiyu 1 Bible Online

Matiyu 1 - Kuranko bible

Matiyu 1

¹Allata-Mɔgɔ-Yabɔnɛ,[1] Yisa Kirasiti, kɔni, wo bɔra Dawuda anubɛ Iburayima bɔnsɔnnu tɔ. A bɔra bɔnsɔn min bɛɛ rɔ, wonu tɔgɛ sɛbɛnɛ yan tɔ.

²Iburayima ya Isiyaka sɔrɔn. Isiyaka ya Yakoba sɔrɔn. Yakoba ya Yuda anubɛ a na-kelen-nyɔgɛnu sɔrɔn.

³Yuda anubɛ Temara ya Pɛrɛsi anubɛ Seraha sɔrɔn. Pɛrɛsi ya Hɛsirɔn sɔrɔn. Hɛsirɔn ya Rama sɔrɔn.

⁴Rama ya Aminadabu sɔrɔn. Aminadabu ya Neson sɔrɔn. Neson ya Salaman sɔrɔn.

⁵Salaman anubɛ Rehabi ya Bowasi sɔrɔn. Bowasi anubɛ Ruti ya Obɛdi sɔrɔn. Obɛdi ya Yɛsi sɔrɔn.

⁶Yɛsi le ya Mansa Dawuda sɔrɔn. Mansa Dawuda anubɛ Yurayala musi ya Silamɛni sɔrɔn.

⁷Silamɛni ya Rihobowami sɔrɔn. Rihobowami ya Abaya sɔrɔn. Abaya ya Esa sɔrɔn.

⁸Esa ya Yɛhosafati sɔrɔn. Yɛhosafati ya Yɛhoram sɔrɔn. Yɛhoram ya Yusaya sɔrɔn.

⁹Yusaya ya Yɔtam sɔrɔn. Yɔtam ya Ehasi sɔrɔn. Ehasi ya Hɛsakaya sɔrɔn.

¹⁰Hɛsakaya ya Manasa sɔrɔn. Manasa ya Amɔn sɔrɔn. Amɔn ya Yosaya sɔrɔn.

¹¹ Yosaya mara Yɛhoyasin[2] anubɛ a na-kelen-nyɔgɛnu benba la wo tumɛ anu bi biralɛ rɔ Babilɔn nyamanɛ rɔ.

¹²Anu tɛ kɔmɛ Babilɔn, Yɛhoyasin ya Siyalitiyɛli sɔrɔn. Siyalitiyɛli mara Sarababulu[3] fa-kinamɛ la.

¹³Sarababulu ya Abayudi sɔrɔn. Abayudi ya Ilayakim sɔrɔn. Ilayakim ya Esɔri sɔrɔn.

¹⁴Esɔri ya Sedoki sɔrɔn. Sedoki ya Ekim sɔrɔn. Ekim ya Ilayudi sɔrɔn.

¹⁵Ilayudi ya Ɛliyasa sɔrɔn. Ɛliyasa ya Matan sɔrɔn. Matan ya Yakoba sɔrɔn.

¹⁶Yakoba ya Yusufu sɔrɔn. Yusufu wo ya Mariyama furu. Allata-Mɔgɔ-Yabɔnɛ, Yisa, wo sɔrɔnta Mariyama bolo.

¹⁷Min bɛɛ tɔgɛ ratɛgɛnɛ ka a dabira Iburayima ma, ka a sigi Dawuda la, bɔnsɔn matiyi tan-ni-nani le. Ka a dabira Dawuda ma, ka a sigi Isirɛla mɔgɛnuna biralɛ rɔ Babilɔn, bɔnsɔn matiyi tan-ni-nani le. Ka a dabira mɔgɛnuna biralɛ ma Babilɔn, ka a sigi Allata-Mɔgɔ-Yabɔnɛ sɔrɔn wati ma, bɔnsɔn matiyi tan-ni-nani le.

¹⁸ Allata-Mɔgɔ-Yabɔnɛ, Yisa sɔrɔnta nya min, wo le kɛ la. A na Mariyama mabiranɛ Yusufu le bolo nun. Kɔnɔ yanni anu ni a latenbi ala kei ma, Mariyama tɛrɛnara a kolomɛ la Allala Ni-Sɛnimɛ sɛnbɛ bolo.

¹⁹Ala kei, Yusufu, mɔgɛ le wo la min bi ko-latelennɛ kɛla tuma-wo-tuma. A ma di a ye, a ni Mariyama lamiliya gbɛ rɔ woletɔ a ya a latɛgɛ ko a ni a bole bɔ a furu-koe rɔ dogɔn rɔ.

²⁰Nba, Yusufu ye a mirila koe kɛ ma tumɛ min, Marita melika bɔra a ye gbɛ rɔ kiyo rɔ. A ko, “Yusufu, Dawuda bɔnsɔn, i kana kilan Mariyama bi-koe la ka a ma ila musi la. A ara buyi min bi wo la, Allala Ni-Sɛnimɛ kɛwɔlɛ le wo la.

²¹ A ye nala den-kei sɔrɔnna. I ni a tɔgɔ sa Yisa[4] bawo ale le si ala mɔgɛnu kisi anu hakɛnu ma.”

²²Nba, kɛ bɛɛ mara alako Mari ya min bɛɛ fɔ nɛbi ye, wonu ni bɔ-a-la ko,

²³ “Sunkurun-nasɔlɔnɛ si buyi bi ka den-kei sɔrɔn. Anu si a tɔgɛ rakele ko Imanuwɛli.” Tɔgɛ wo kɔrɛ le ko, “Alla ye ma fɛ.”

²⁴Nba, Yusufu kundenta tumɛ min, a ya a ma iko Marita melika ya a fɔ a ye nya min. A ya Mariyama bi

²⁵ kɔnɔ a ma a latenbi a kɔma ha a ya dan wo sɔrɔn. Yusufu ya a tɔgɔ sa Yisa.