Read Kuranko Matiyu 12 Bible Online

Matiyu 12 - Kuranko bible

Matiyu 12

¹ Yisa tenbira sɛnɛ do rɔ Sulen-Tele ma tumɛ min, kɔnkɛ ye ala karan-dannu na nun. Woletɔ anu ya fui-fan-gbesi dabira ka a togotogon anu bolo tɔ ka a kole dɔn.

²Farisinu ya wo yen tumɛ min, anu ya a fɔ Yisa ye ko, “A mafɛlɛn ila karan-dannu bi min mala kɛ la Sulen-Tele ma. Anu bi mala tɔn tinyana wo la!”

³Yisa ya a fɔ anu ye ko, “Dawuda ya min ma wo tumɛ kɔnkɛ ye anubɛ a keminɛnu na, wo ma wo karan bɛ, wa?

⁴A donta Allala bɔn la. Biredi min dantɛgɛnɛ Alla ma, hali anu bi tɔn tinyana a dɔn tinɛ, anubɛ ala keminɛnu ya wo dɔn, ado saraka-masɔlɛnu denu dɔrɔn bɛnta ka biredi wo dɔn nun.

⁵ Alla ya tɔn min di Nɛbi Musa ma, wo ma wo karan bɛ, wa? Saraka-masɔlɛ minnu bi wɔlila Allala bɔn la, wonu bi Sulen-Tele wonu tɔn tinyana. Kɔnɔ hali wo, anu yilikini ma.

⁶N bi a fɔla wo ye, fan do ye yan min kolo Alla-Bato-Bɔn ko.

⁷ A sɛbɛnɛ Allata kitabu rɔ ko, ‘N sa saraka-soge fɛ fɔ kinikinɛ.’ Ni wo ya wo kɔrɛ lɔn nun bɛrɛkɛ, wo ti mɔgɔ-magbalanɛ kɛnu yiliki,

⁸ado Sulen-Tele Mari le nde, Hadama-dan la.”

⁹Yisa bɔra nyɔ ka ta Yahudiya-dina-bɔn do la Sulen-Tele wo ma.

¹⁰Kei do ye nyɔ min bole faganɛ a la kɔnɔ mɔgɛ donu bi nyɔ minnu bi a fɛ ka tɔgɛ sa Yisa la. Woletɔ anu ya a manyinika ko, “Ni mɔgɔ ya mɔgɔ dandan Sulen-Tele ma, wo si mala tɔn tinya, wa?”

¹¹ Yisa ya anu yabi ko, “Sagɛ ye wole min bolo, ni a buira denka-wɛ rɔ Sulen-Tele ma, a tigi ti a layɛlɛ, wa?

¹²Ado nfan, mɔgɔni-gbuyi tenbira sagɛ la pirr! Woletɔ mala tɔn sɔnnɛ ko ma ni mɔgɛ dɛnbɛ Sulen-Tele ma.”

¹³Wo kɔma, a ya a fɔ kei wo ye ko, “I bole rasagan.” A ya a rasagan. Nba a kɛndɛyara iko a bole doi.

¹⁴Wo le ya a ma, Farisinu tara ka anu nyɔgɔn yen Yisa kan ma, ni anu si ke ka a faga nya min.

¹⁵Yisa ya a faga-koe wo lamɔɛn Farasinu bolo tumɛ min, a bɔra nyɔ ka ta. Mɔgɔ siyaman bilara a fɛ. A ya kirayatoe bɛɛ lakɛndɛya.

¹⁶A ya a fɔ anu ye ko anu kana ala koe fɔ mɔgɛnu ye

¹⁷alako Nɛbi Aiseya ya Alla kuman-kan min natenbi, wo ni kanbali ko,

¹⁸“N bara nna wɔli-kɛlɛ min yabɔ, wo le kɛ la. N bara wo keni, ado wo ara n hɛnɛ feu! N si nta Ni-Sɛnimɛ sa a kuma. A si telenbagayɛ wara-koe fɔ sibole bɛɛ ye.

¹⁹A ti seren-seren mɔgɔ ma, ado a ti kuma a yisi ma. A ti nyɛɛ nyama ma barɛ rɔ.

²⁰Fanka sa mɔgɛ min na, a ti tɔrɔya sa wo kuma. Yigi sa mɔgɛ min na, a ti wo yisi tinya. A si to ko-nyimɛ kɛla ha telenbagayɛ ni nɔlɛ kɛ.

²¹Nba, mɔgɛ bɛɛ si anu yigi sa ale kuma.”

²²Nba, mɔgɛ donu nara kei do la Yisa wara. Fiyɔn le. A ti ke kumala fanan bawo nyinatoe le. Yisa ya a lakɛndɛya min kɛ, a wulita kumala anubɛ a yɛ lakara ka fen-yen kɛ fanan.

²³Nyama bɛɛ kawara Yisa ma. Anu ya nyinikali kɛ ko, “Kɛ si ma Mansa Dawudala dan la min si na ma kisi, wa?”

²⁴ Farisinu ya wo lamɔɛn tumɛ min, anu ya a fɔ nyama ye ko, “A ye nyinɛnu gbenna bawo sɛnbɛ wo bɔnɛ nyina-kun-tigi bolo, Biyɛsiba, kɔni.”

²⁵Anu bi anu mirila min ma, Yisa ya wo lɔn. Woletɔ a ya a fɔ anu ye ko, “Ni mɔgɛnu bi anu nyɔgɛnu kɛlɛla nyamani-wo-nyamani rɔ ka dan-nafarɛ sa anu nyɔgɔn tɛma, nyamanɛ wo ti mɛ! Ni so-burɔ-mɔgɛnu bi anu nyɔgɛnu kɛlɛla, ni wo ma, denbayɛ ka dan-nafarɛ sa anu nyɔgɔn tɛma, wo si tinya pɔ!

²⁶Ni mɔgɛ doinu bi anu nyɔgɛ kɛlɛla Setanɛla mansayɛ rɔ, wo kɔrɛ le ko dan-nafarɛ ara ban sala anu tɛma feu! Anu si ke sɔla kama?

²⁷Wo ye a fɔla ko n bi nyinɛnu gbenna bawo nyina-kun-tigi Biyɛsiba le ye sɛnbɛ wo dila n ma. Nba, yon bi sɛnbɛ dila wola mɔgɛnu ma worɔ ka nyinɛnu gben? Wola mɔgɛnu bi a yirala wo rɔ ko wo foni feu!

²⁸Kɔnɔ ni Allala Ni-Sɛnimɛ le ye anu gben-sɛnbɛ dila n ma, wo ye a yirala wo rɔ ko Allala mansayɛ ara ke wo ma nun. Ka, a sa wo nya?

²⁹“Mɔgɔ-wo-mɔgɔ ti ke sɛnbɛ-tigila bɔn tinyana ka a bolo-fannu bi fɔ ni a ya sɛnbɛ-tigi wo kiri fɔlɔn. Wo kɔma, a ni bon-burɔ-fannu bi.

³⁰ “Mɔgɔ-wo-mɔgɔ min sa nde fɛ, wo ye n kan ma. Min sa n dɛnbɛna ka fannu nadɛn, wo ye wonu tanyɛnsɛnna.

³¹Wo le ya a to, n bi a fɔla wo ye ko mɔgɛnu bi hakɛ min bɛɛ kɛla anubɛ anu bi kuma-yogomɛ min bɛɛ fɔla, anu ma si koto wo bɛɛ la. Kɔnɔ min bi kuma-yogomɛ fɔla Allala Ni-Sɛnimɛ ma, a ma ti koto wo la.

³² Min si kuma-yogomɛ fɔ nde, Hadama-dan ma, a ma si koto wo la. Kɔnɔ mɔgɔ-wo-mɔgɔ min si kuma-yogomɛ fɔ Allala Ni-Sɛnimɛ ma, a ma ti koto bi, a ma ti koto habadan!

³³ “Ka kɔn-gbɔ-nyimɛ sɔrɔn fɔ kɔlɔma-sabatinɛ ni taran i bolo. Kɔlɔma min sabatini ma, ni wo ye i bolo, wo gbɔɛ ti mɔgɔ munanfaga. Kɔlɔma si lɔn a gbɔɛ le fɛ.

³⁴ Wo sɔn yogo iko duguma-fannu. Wo sɔn yogoyanɛ min kɛ, wo si ke kuma-nyimɛ fɔla kama? Ado nfan, mɔgɛ yisi fannɛ min na, a dɛ ye wo le fɔla.

³⁵Mɔgɔ-nyimɛ si ko-nyimɛ labɔ ata nyimayɛ rɔ. Sɔn-yogoma-tigi si ko-yogomɛ labɔ ata sɔn-yogomɛ rɔ.

³⁶“Nba, n ni a fɔ wo ye, kiti-tɛgɛ-lunyɛ, mɔgɛnu bi kuntanya-kumɛ min bɛɛ fɔla, anu si anu dantɛgɛ Alla ye wo bɛɛla ko la.

³⁷Nba, Alla si mɔgɛ bɛɛ kiti anu kuman-kan le fɛ. A si yo sɔrɔn anu fɛ, a si yilikiyi sɔrɔn anu fɛ.”

³⁸ Wo kɔma, tɔn-karan-mɔgɛ donu anubɛ Farisi donu ko, “Karan-mɔgɔ, ma ye a fɛ ka i yen kabana-koe do kɛla.”

³⁹ Yisa ya a fɔ anu ye ko, “Wole sɔn-yogoma-tiginu anubɛ Alla-lɔnbɛlɛnu, wo ye n manyinikala ko n ni kabana-koenu kɛ wo ye, nyɛ? Wo ti kabana-ko-gbɛrɛ yen fɔ Nɛbi Yonata kabana-koe.

⁴⁰ Iko Nɛbi Yona ya su sawa anubɛ tele sawa kɛ yɛgɛ-ba burɔ nya min, nde, Hadama-dan si su sawa anubɛ tele sawa kɛ dugu kɔrɔ wo nya na le.

⁴¹ Ninɛfa so-burɔ-mɔgɛnu si anu nasɔ kiti-tɛgɛ-lunyɛ ka wo maburi bawo wonu ya Nɛbi Yonala kawandilɛ lamɔɛn tumɛ min, anu ya anu kɛ-nya yɛlɛma. Nba, n bi a fɔla wo ye ko mɔgɛ do ye yan min kolo Nɛbi Yona ko pirr!

⁴² Musu-mansɛ min bɔra Siba nyamanɛ rɔ don? Wo si a lasɔ kiti-tɛgɛ-lunyɛ ka wo maburi bawo ale bɔra ata nyamanɛ rɔ pon ka na a tole masɔ Mansa Silamɛnita hɛnkilimaya-karan la. Nba, n bi a fɔla wo ye, mɔgɛ do ye yan min kolo Mansa Silamɛni ko pirr!

⁴³“Nba, nyina-yoge wa bɔ mɔgɔ fɛ tumɛ min, a si yilan-yilan wulɛ rɔ ka a sulen tinɛ nyini. Ni a ma kan tinɛ do yen,

⁴⁴a si a fɔ a nyɛrɛ ye ko, ‘N bɔra bɔn min na, sɔn, n ni sɛgi nyɔ.’ Nba, a si sɛgi ka bon-takolɔn taran. A sɛninyanɛ. A bɛɛ rabɛnnɛ feu!

⁴⁵A si ta worɔ ka na nyina wɔrɔnfila gbɛrɛ la a bolo minnu yogo ale nyɛrɛ ko. Anu si na ka anu sigi a fɛ bɔn wo la. Nba, mɔgɛ wola ban si yogoya ka tenbi a fɔlɔtɛ la. A si ma bita mɔgɔ-yogomɛnu na wo nya na le fanan.”

⁴⁶Yisa ye kumala mɔgɛnu ye tumɛ min, a na anubɛ a dɔgɛnu nara. Anu sɔra luyi ma ka nyinikali kɛ ko a yen-sɔgɛ ye anu na.

⁴⁷Woletɔ mɔgɛ do ya a fɔ a ye ko, “N fa, i na anubɛ i dɔgɛnu sɔnɛ luyi ma. Anu bi i yen-koe rɔ.”

⁴⁸Yisa ya a yabi ko, “N na ye yon na? N dɔgɛnu bi yonnu na?”

⁴⁹Wo kɔma, a ya a bolo-nɔlɔnɛ sɔ ala karan-dannu na. A ko, “N na anubɛ n dɔgɛnu de kɛnu na!

⁵⁰N Fa Alla min bi Arinyɛni tɔ, min bi a diyana-koe kɛla, n na-kelen-nyɔgɛ anubɛ n na le wonu na.”