Read Kuranko Matiyu 15 Bible Online

Matiyu 15 - Kuranko bible

Matiyu 15

¹Wo kɔma, Farisi donu anubɛ tɔn-karan-mɔgɛ donu bɔra Yerusalɛm ka na Yisa wara. Anu ya a manyinika ko,

²“Nfenna ila karan-dannu sa ma benbanuta karan birala? Yanni anu ni fan dɔn, anu ti anu bole laku mumɛ iko a sɛbɛnɛ tɔn rɔ nya min!”

³Yisa ya anu fanan manyinika ko, “Wole ye Allala tɔn tinyana nfenna wo nyɛrɛta karan fɛ?

⁴ Alla ko, ‘I ni i na anubɛ i fa gbiliya.’ A ko fanan, ‘Mɔgɔ-wo-mɔgɔ wa kuma-yogomɛ fɔ a na anubɛ a fa ma, wo ni wo faga serr!’

⁵Kɔnɔ ni kɔ-fan do ye mɔgɛ bolo a si a fa anubɛ a na dɛnbɛ min na, wo ye a karanna ko a ni a fɔ anu ye ko ‘Allatɛ le kɛ la,’

⁶ko ni min ya wo ma, hali a ma anu gbiliya kɔ-fan wo la tun. Wo wa bila wo benbanuna karan fɛ, wo ye Allala kumɛ mala fuyi la wo nya na le.

⁷Wole nyɛrɛ-mayiralɛnu! Nɛbi Aiseya ya wɔlɔyiyɛ kɛ a kin na wolela ko la, yɔ! A ko,

⁸Alla ko, ‘Mɔgɛ kɛnu bi a fɔla anu da rɔ ko n di anu ye kɔnɔ n bara-koe sa anu yisi-kunyɛ la!

⁹Anu bi n batola fu bawo anu bi mɔgɛnu nabilala anuta tɔnnu na iko ndeta tɔn le!’ ”

¹⁰Wo kɔma, Yisa ya nyama kele a wara. A ya a fɔ anu ye ko, “Wo ni wo tole masɔ ka koe kɛ nya-yen a kilɛ fɛ!

¹¹Min bi donna mɔgɔ dɛ rɔ, wo ti a latinya fɔ min bi bɔla a da rɔ, wo le si a latinya.”

¹²Ala karan-dannu nara a wara. Anu ko, “Ita kumɛ wo ara Farisinu nadiminya kati! I ma wo lɔn, ba?”

¹³Yisa ya anu yabi ko, “N Fa min bi Arinyɛni tɔ, ale ma fan min ki, a si wo bɛɛ wurun.

¹⁴ Wo kana hɔn Farisi wonuna ko la! Fiyɔn le anu na, ado anu bi fiyɔn bole birala. Fiyɔn wa fiyɔn bolo bira, anu filɛ bɛɛ si bui denkɛ rɔ.”

¹⁵Pita ya a fɔ Yisa ye ko, “I ya tili min tɛgɛ nyama ye wo la, wo kɔrɛ fɔ ma ye.”

¹⁶Yisa ya a fɔ anu ye ko, “Ha bi, wo ma hɛnkili sɔrɔn bɛ ka tenbi doinu na, wa?

¹⁷Wo ma a nya-yen, ba? Fenfen ba don mɔgɛ dɛ rɔ, wo si yigi a burɔ. Wo kɔma, a si a kɛ ka bɔ a fɛrɛ rɔ.

¹⁸ Kɔnɔ fan minnu bi bɔla mɔgɔ da rɔ, wonu bi bɔla a yisi le tɔ. Wo fen sifa le si mɔgɛ latinya pɔ!

¹⁹Ado nfan, miriya-yogomɛnu bi bɔla mɔgɔ-yisi le tɔ min si a sɔ mɔgɔ-faga-koe la anubɛ yɛlɛnyɛ anubɛ milibɛlitaya-koenu na, hali kankanyɛ anubɛ foninya-fɔɛ anubɛ mɔgɔ-rafɔɛ.

²⁰Koe wonu denu si mɔgɔ latinya. Kɔnɔ ka fan dɔn bolo-lakubɛlɛ la iko anu bi a fɔla nya min, wo ti mɔgɔ latinya.”

²¹Yisa anubɛ ala karan-dannu bɔra nyɔ ka ta Taya anubɛ Saidon dafɛ-soenu tɔ.

²²Musi do ye nyamanɛ wo rɔ, Kenan kɛ le wo la. A nara Yisa wara. A gbele-gbelenta ko, “N fa, Mansa Dawudala dan, kinikini n ma! Nyinɛ ye nna dunmusi fɛ. A tɔrɔnɛ kati!”

²³Kɔnɔ Yisa ma kuma a la. Yisala karan-dannu nara a wara ka a madiya. Anu ko, “Musi kɛ gbɛn ma fɛ! A bilanɛ ma fɛ sɔnkɔ-sɔnkɔla tolon!”

²⁴Nba, Yisa ya a fɔ ale musi wo ye ko, “Alla ma n sɔ mɔgɔ-gbɛrɛnu ma fɔ Isirɛla mɔgɛnu ma, saga minnu tonɛ a rɔ, kɔni.”

²⁵Nba, musi nara a nyɛnkin a kɔrɔ. A ko, “N fa, n dɛnbɛ!”

²⁶Yisa ya a fɔ a ye ko, “A ma bɛn ka dennɛnuna dɔn-fan bi ka a lakɛ wulinu kɔrɔ.”

²⁷Musi wo ya a fɔ a ye ko, “N fa, tonyɛ le kɔnɔ hali wo, a buriburinɛ minnu bi buila anu tigila tebulu kɔrɔ, wulinu si wo dɔn de!”

²⁸Nba, Yisa ya a fɔ a ye ko, “N biran-musi, ila dɛnkɛninyɛ kolo! I diyana-koe ni kɛ i ye.” Wo wati nyɛrɛ rɔ, ala dunmusi kɛndɛyara.

²⁹Yisa bɔra nyɔ ka ta Kalili dalɛ dafɛ. A yɛlɛta kɔnkɛ kuma ka a mayigi nyɔ.

³⁰Nyama-wɛ nara a wara namarɛnu na anubɛ fiyɔnnu anubɛ minnu bi anu tonkanna anubɛ bobenu anubɛ kirayato-gbɛrɛ siyaman ka na anu sa Yisa kɔrɔ. A ya anu dama lakɛndɛya.

³¹Mɔgɛnu ya a yen ko bobenu bi kumala. Minnu bi anu tonkanna, wonu bara kɛndɛya, namarɛnu bi tagamana, fiyɔnnu bi fen yenna. Wo bɛɛ manɛ min kɛ, anu kawara ka Isirɛlata Alla tanto.

³²Yisa ya ala karan-dannu kele a wara ka a fɔ anu ye ko, “N bara kinikini mɔgɛ kɛnu ma bawo anu bara tele sawa kɛ n fɛ. Nba kaka, dɔn-fen sa anu bolo. A ma di n ye ka anu nata, ni n ma anu de-nyini fɔlɔn. Anu tenbi tala anu barɛ, tumado anu si kirɔn-a-la kilɛ la.”

³³Ala karan-dannu ya a manyinika ko, “Male si dɔn-fan sɔrɔn mintɔ wulɛ kɛ rɔ min si nyama kɛ rabɔ?”

³⁴Yisa ya anu manyinika ko, “Biredi yili ye wo bolo?” Anu ya a yabi ko, “Biredi wɔrɔnfila anubɛ yɛgɛ-mɛsɛ doni.”

³⁵Nba, Yisa ya a fɔ nyama ye ko anu ni sigi dugi ma.

³⁶Wo kɔma, a ya biredi wɔrɔnfilɛ anubɛ yɛgɛ wonu bi ka baraka bira Alla ye. A ya anu takerikeri ka anu don ala karan-dannu bolo. Karan-dannu ya a di mɔgɛnu ma.

³⁷Anu dama ya a dɔn ka fa pim! Anu datoe, ala karan-dannu ya senda wɔrɔnfila lafa wo la.

³⁸Minnu ya a dɔn, a keimɛ wonu yatɛ le mɔgɔ waga nani (4,000) la. Musinu anubɛ dennɛnu sa yatɛ wo rɔ.

³⁹Wo kɔma, Yisa ya mɔgɛnu masara. A sigira kulɔn rɔ ka ta Magadala soe burɔ.