Read Kuranko Matiyu 16 Bible Online

Matiyu 16 - Kuranko bible

Matiyu 16

¹ Farisi anubɛ Sadusi donu nara Yisa wara. Anu bi a fɛ ka a kɔrɔbɔ, woletɔ anu ya a manyinika ko a ni kabana-koe do yira anu na ka bɔ Arinyɛni tɔ.

²Nba, Yisa ya a fɔ anu ye ko, “Tele-yigi-wati, wo ye a fɔla ko sina si kinya bawo wo ye san-kolo-wulennɛ yenna.

³Bandɛ wa ka, wo ye a fɔla ko bandɛ si na bawo wo ye san-kole a wulennɛ anubɛ a finni basannɛ yenna. Wo wa san mafɛlɛn, wo si ke a lɔnna tele si ma nya min kɔnɔ koe minnu bi mala kaka, wo ti ke wonu kɔrɛ faranfasila!

⁴ Wole sɔn-yogoma-tiginu anubɛ Alla-lɔnbɛlɛnu, wo ye n manyinikala ko n ni kabana-koenu kɛ wo ye, nyɛ? Wo ti kabana-ko-gbɛrɛ yen fɔ Nɛbi Yonata kabana-koe.” Woletɔ a bɔra anu fɛ ka ta.

⁵Karan-dannu ya dalɛ tɛgɛ tumɛ min, anu bara a yen ko anu ma na biredi la anu bolo.

⁶ Yisa ya a fɔ anu ye ko, “Wo ni a ma wo fɛrɛma Farisinu anubɛ Sadusinuna biredi-yɛlɛ-fanla ko la.”

⁷Karan-dannu ya a fɔ anu nyɔgɔn ye ko, “A ye kɛ fɔla bawo ma ma na biredi la ma bolo, nyɛ?”

⁸Anu bi min fɔla nun, Yisa ya wo bɛɛ lɔn, woletɔ a ya anu manyinika ko, “Nfenna wo ye biredi wara-koe rakaranna wo nyɔgɔn tɛma? Wola dɛnkɛninyɛ ma kolo mumɛ!

⁹ Ha bi, wo sa kɛ nya-yenna! N ya kei waga loli (5,000) de-nyini biredi loli la. Anu datoe ya sende tan-ni-fila lafa. Wo nyinara wo ko, wa?

¹⁰ N ya kei waga nani (4,000) de-nyini biredi wɔrɔnfilɛ la. Anu datoe ya sende wɔrɔnfila lafa. Wo nyinara wo fanan ko, wa?

¹¹N ya a fɔ min kɛ ko wo ni a ma wo fɛrɛma Farisinu anubɛ Sadusinuna biredi-yɛlɛ-fanla ko la, n sa kumala biredi wara-ko la de! Ha bi, wo ma wo nya-yen?”

¹²Wo kɔma, ala karan-dannu bara a nya-yen de gbɛ ko a sa kumala biredi-yɛlɛ-fan wara-koe la, fɔ anu ni a ma anu fɛrɛma Farisi anubɛ Sadusinuna karanla ko la.

¹³Yisa tara Sɛsariya-Filipai soe dafɛ-nyamanɛ rɔ. A ke nyɔ, a ya ala karan-dannu manyinika ko, “Yon bi nde, Hadama-dan la? Mɔgɛnu bi nfen fɔla nna ko la?”

¹⁴ Anu ya a yabi ko, “Donu ko Yɔni-Batasi-Kɛlɛ le ile la. Donu ko Nɛbi Ilaya. Donu fanan ko Nɛbi Yɛrɛmaya, ni wo ma, nɛbi-gbɛrɛkɛ!”

¹⁵A ya anu manyinika ko, “Wole don? Wole ko kama? Yon bi nde la?”

¹⁶ Saimon Pita ya a yabi ko, “Allata-Mɔgɔ-Yabɔnɛ le ile la, Alla Nimɛta dan, kɔni.”

¹⁷Yisa ya a fɔ a ye ko, “Yɔnila den Saimon, duwa-dan le ile la! N bi kɛ fɔla bawo hadama-dan ma i labila tonyɛ kɛ la fɔ n Fa Alla min bi Arinyɛni tɔ.

¹⁸N bi i tɔgɛ sala Pita. Wo kɔrɛ le farɛ. N si nta chɔchi sɔ farɛ wo kuma. Hali sayɛ ti nɔ-ko sɔrɔn a ma mumɛ!

¹⁹ Alla min bi Arinyɛni tɔ, n si ata mansaya-da-nyinnu di i ma. Ni i ma sɔn min ma duninya kɛ rɔ, Alla ti sɔn wo ma Arinyɛni tɔ. Ni i wara sɔn min ma duninya kɛ rɔ, Alla si sɔn wo ma Arinyɛni tɔ.”

²⁰Wo kɔma, Yisa ya a fɔ ala karan-dannu ye ko anu kana a fɔ mɔgɔ-wo-mɔgɔ ye ko Allata-Mɔgɔ-Yabɔnɛ le ale la mumɛ!

²¹Ka a dabira wati wo ma, Yisa wulita a fɔla ala karan-dannu ye ka a gbɛ anu ye ko a fɛrɛ sa fɔ a ni ta Yerusalɛm ka tɔrɔyɛ siyaman sɔrɔn kɛmɔgɛnu anubɛ saraka-masɔla-wɛnu anubɛ tɔn-karan-mɔgɛnu bolo. A ko anu si a faga nyɔ. A tele sawa nyɔgɛ, Alla si a lawuli tun ka bɔ furinu tɛma.

²²Wo le ya a ma, Pita ya Yisa labɔ doinu dafɛ. A ya Yisa makumɛ dabira. A ko, “Mari, Alla ni i tanka wo ma! Wo kana ma i la mumɛ!”

²³Yisa ya a yɛ lamunun Pita la, a ko, “Ile, bɔ n fɛ. I ye Setanɛta kumɛ fɔ tinɛ wo la! Lagbaran-fan le ile la kilɛ la nde ye bawo ila miriya kɛ, mɔgɛnu miriya le wo la kɔnɔ Allata miriya ma wo la!”

²⁴ Wo kɔma, Yisa ya a fɔ ala karan-dannu ye ko, “Ni mɔgɔ-wo-mɔgɔ ye a fɛ ka bila n fɛ, fɔ a ni a nyɛrɛ wara-koe boloka ka a nyɛrɛ faga-kɔn bi ka bila n fɛ,

²⁵ ado mɔgɛ min bi a fɛ ka a nyɛrɛ niyi kisi, wo tigi si bɔnɔ a niyi la. Kɔnɔ min bi bɔnɔna a niyi la ndela ko la, wo tigi si a niyi sɔrɔn.

²⁶Ni mɔgɛ ya duninya fan bɛɛ sɔrɔn kɔnɔ a ni bɔnɔ a niyi la, a ya nfen tɔnɛ sɔrɔn wo la? Mɔgɔ ti ke fenfen dila a niyila ko la,

²⁷ ado nde, Hadama-dan-natoe le n Fala gbiliyɛ rɔ. Mabɛ nta melikanu bi nala. Nba, n si mɔgɛ bɛɛ sara ala kɛwɔlɛ la.

²⁸Wo ni wo hɛnkili to kɛ ko! Donu bi yan, wonu ti faga ha anu ni nde, Hadama-dan, yen nala nta mansayɛ rɔ.”