Read Kuranko Matiyu 17 Bible Online

Matiyu 17 - Kuranko bible

Matiyu 17

¹Tele wɔrɔ kɔma, Yisa ya Pita bi anubɛ na-kelenmɛ filɛ, Yemesi anubɛ Yɔni, kɔni. Anu bilara a fɛ ka ta kɔnkɔ-layan-bɛ do kuma anu dan na.

²Anu bi Yisa mafɛlɛnna tumɛ min, a yen-nya yɛlɛmanta anu yala. A yakɔrɛ malanta iko tele. Ala kurɛ gbɛra iko waan.

³Wo kɔma, ala karan-den sawɛ wonu ya Nɛbi Musa anubɛ Nɛbi Ilaya yen kumala Yisa la.

⁴Woletɔ Pita ya a fɔ Yisa ye ko, “Mari, a bɛnta ma ye yan. Ni i sɔnta, n si lele sawa sɔ yan, kelen itɛ, kelen Musatɛ, kelan Ilayatɛ.”

⁵Pita ye kumɛ wo fɔɛ la tumɛ min, san-kolo-ninɛ tenbira anu kuma. Kuman-kan bɔra san-kole rɔ fanan. A ko, “N nyɛrɛ diyana-dan le kɛ la min bara n hɛnɛ feu! Wo ni wo tole masɔ a la!”

⁶Karan-dannu ya kuman-kan wo lamɔɛn tumɛ min, anu kumakɔra kati! Anu ya anu nyɛrɛ gbesi dugi la.

⁷Yisa nara anu bara ka a bole tugu anu na. A ko, “Wo ni wo lasɔ. Wo kana kilan!”

⁸Nba, anu ya anu yɛ layɛlɛ min kɛ, anu ma mɔgɔ-wo-mɔgɔ yen fɔ Yisa.

⁹Anu bi yigila kɔnkɛ la tumɛ min, Yisa ya a fɔ anu ye ka a magbɛlɛya ko, “Wo ara ko-rayirɛ min yen kɛ, wo kana wo rakaran mɔgɔ-wo-mɔgɔ ye, ha nde, Hadama-dan ni wuli ka bɔ furinu tɛma tumɛ min.”

¹⁰ Wo kɔma, Yisala karan-dannu ya a manyinika ko, “Nfenna tɔn-karan-mɔgɛnu bi a fɔla ko Nɛbi Ilaya le fɔlɔn bi nala?”

¹¹Yisa ya anu yabi ko, “Nɛbi Ilaya le fɔlɔn bi nala. Tonyɛ le. A wa na, a si fan bɛɛ lasɛgi a gbɛ rɔ.

¹² Kɔnɔ n bi kɛ fɔla wo ye, Nɛbi Ilaya ara na nun. Mɔgɛnu ma a lɔn Ilaya la nun fɔ ka anu diyana-koe bɛɛ kɛ a la. Anu si nde, Hadama-dan fanan bira boloko-yogomɛ-kɛ wo nya na le.”

¹³Wo kɔma, ala karan-dannu ya a nya-yen ko a ye kumala Yɔni-Batasi-Kɛlɛ wara-koe la nun.

¹⁴Anu sɛgira nyama wara la tumɛ min, kei do nara Yisa wara ka a nyɛnkin a kɔrɔ.

¹⁵A ko, “N fa, kinikini nna dan ma! Kirikirisɛ ye a la. A tɔrɔnɛ kati! Wati siyaman, a si bui tɛ rɔ, ni wo ma, yi rɔ.

¹⁶N nara a la ila karan-dannu bara kɔnɔ anu ma ke a lakɛndɛyala.”

¹⁷Yisa ya a fɔ anu ye ko, “Wole fanan. Dɛnkɛninyɛ sa wo bolo, ado wo ma ko-latelennɛ lɔn. N ni to wo fɛ wati nyamintan tɔ tun? N ni n munyu wo kɔrɔ ha tumɛ nyamintan? Wo na dennɛ wo la n bara yan!”

¹⁸Yisa kumara nyinɛ ma tumɛ min, a bɔra a fɛ. Wo le ya a ma, dan wo kɛndɛyara kelenna!

¹⁹Wo kɔma, ala karan-dannu nara Yisa wara dogɔn rɔ ka a manyinika ko, “Nfenna male ma ke nyinɛ wo gbenna?”

²⁰ Yisa ya anu yabi ko, “Wo mara le bawo wola dɛnkɛninyɛ ma kolo. Wo ni wo hɛnkili to kɛ ko! Ni dɛnkɛninyɛ ye wo bolo min kolo ka ke foni-kole[23] rɔ, wo si ke a fɔla kɔnkɛ kɛ ma ko, ‘Bɔ yan ka ta pan!’ A si ta, ado wo si ke koe bɛɛ kɛla dɛnkɛninyɛ fɛ! [

²¹Kɔnɔ ko-sufa kɛ ti ke mala fɔ Alla matarɛ anubɛ sun-don fɛ.”]

²²Yisala karan-dan bɛɛ ya anu nadɛn anu nyɔgɔn fɛ Kalili sigisɔn rɔ tumɛ min, Yisa ya a fɔ anu ye ko, “Anu si nde, Hadama-dan don mɔgɛnu bolo tɔ.

²³Anu si n faga. Kɔnɔ a tele sawa nyɔgɛ, Alla si n nawuli tun ka bɔ furinu tɛma.” Kumɛ wo ya ala karan-dannu yisi tinya bɛrɛkɛ!

²⁴ Yisa anubɛ ala karan-dannu kera Kapereniyam soe burɔ tumɛ min, Alla-Bato-Bɔn duti-makelelɛnu nara Pita wara ka a manyinika ko, “Anu bi duti min makelela Alla-Bato-Bɔnla ko la, i karan-mɔgɛ duruta wo dila, wa?”

²⁵Pita ya a yabi ko, “Ɔnde.” Pita donta bɔn la tumɛ min, Yisa fɔlɔn kumara. A ko, “Saimon, i miriya ye kama? Duninya-kɛ-mansɛnu si gbɛsɛgbɛsɛ anubɛ duti makele yon bolo, dugurannu, ka, sundannu[24] bolo?”

²⁶Pita ya a yabi ko, “Sundannu.” Nba, Yisa ya a fɔ a ye ko, “Wo kɔrɛ le ko a ma bɛn, male dugurannu ni wo sara.

²⁷Kɔnɔ ma sa a fɛ ka mɔgɛ kɛnu nasama. Woletɔ i ni ta dalɛ rɔ ka lunyɛ fili. Yɛgɛ fɔlɔtɛ min ba a bira, i ni wo labɔ. I si wodi yen a dɛ rɔ min si ma nta duti-sarɛ la anubɛ itɛ. Ta ka mala duti sara a la.”