Read Kuranko Matiyu 18 Bible Online

Matiyu 18 - Kuranko bible

Matiyu 18

¹ A ma mɛ ba kɛ, Yisala karan-dannu nara a wara ka a manyinika ko, “Alla min bi Arinyɛni tɔ, yon kolo bɛɛ ko ata mansayɛ rɔ?”

²Yisa ya denni-mɛsɛ do kele ka wo sɔ anu tɛma.

³ A ko, “Wo ni wo hɛnkili to kɛ ko! Ni wo ma wo nyɛrɛ kɛ-nya yɛlɛma ka ma iko dennɛnu, wo ti don Allata mansayɛ kɔrɔ min bi Arinyɛni na muk!

⁴Min famayiginɛ ka ma iko dennɛ kɛ, wo le kolo bɛɛ ko Allala mansayɛ rɔ,

⁵ado mɔgɛ min ba den sifa kɛ rabira n tɔgɔ rɔ, wo ara nde rabira.

⁶“Dennɛ kɛ minnu dɛnkɛninyanɛ n ma, ni mɔgɔ-wo-mɔgɔ ya a ma, wo ni don hakɛ rɔ ha a ni bɔ n fɛ, a fisa wo mɔgɛ ye, kuru-belebele-wɛ ni kiri a kan la ka a lakɛ kɔgɔ-yi-dumɛ rɔ.

⁷Gbalo ye duninya ye bawo fan donu bi a rɔ minnu bi mɔgɛnu nasamala! Ko sifa wonu bi kɛla tuma-wo-tuma kɔnɔ minnu bi wo mala, gbalo-belebele ye wonu kuma!

⁸ “Ni i bole, ni wo ma, i kian ya a ma, i ni hakɛ kɛ, a tɛgɛ a la ka a lakɛ a rɔ! A fisa, ni i bɔnɔta i bolo kelan, ni wo ma, i kin kelan rɔ ka ta nimayɛ rɔ wo nya, yanni i fɛrɛ bɛɛ la ni don habadan-tɛ rɔ.

⁹ Nba, ni i yɛ ya a ma, i ni hakɛ kɛ, a bɔ a rɔ ka a lakɛ a rɔ! A fisa, ni i bɔnɔta i ya-kelan rɔ ka ta nimayɛ rɔ wo nya, yanni i fɛrɛ bɛɛ la ni don habadan-tɛ rɔ.

¹⁰“Wo ni a ma wo fɛrɛma, wo kana dennɛ kɛ kelen bɛrɛn nafɛya. N bi a fɔla wo ye ko anuna kandan-melikanu bi Arinyɛni tɔ. Anu bi n Fa Alla da kɔrɔ Arinyɛni tɔ wati bɛɛ. [

¹¹ Minnu bara anu bɔ Allata kilɛ fɛ, nde, Hadama-dan nara wonu denuna ko la.]

¹²“Wo miriya ye kama? Saga kɛmɛ ye mɔgɛ min bolo, ni wo kelen tora-a-rɔ, wo tigi si nfen ma? A si saga bi-kɔnɔntɔ anubɛ kɔnɔntɛ to anu de-nyinina kɔnkɛ kuma ka ta saga kelan wo nyini tinɛ.

¹³Wo ni wo hɛnkili to kɛ ko! A wa wo yen, a si sewa saga kelan wola ko la ka tenbi saga bi-kɔnɔntɔ anubɛ kɔnɔntɛ la minnu bi a bolo.

¹⁴A ye wo nya le wo Fa Alla wara la min bi Arinyɛni tɔ. A ma di wo ye dennɛ kɛ kelen bɛrɛn ni to-a-rɔ.

¹⁵ “I ta-nyɔgɛ dɛnkɛninya-mɔgɛ wa ko-yogomɛ ma i la, ta a fɔ a ye. Kɔnɔ i ni a kɛ dogɔn rɔ, wo filɛ tɛma. Ni a ya a sɔn-a-la ko a ara ko-yogomɛ ma i la ka i madiya, a ara ma i na-kelen-nyɔgɛ la tun.

¹⁶ Kɔnɔ ni a ma sɔn i bolo, i ni ta mɔgɔ kelen, ni wo ma, mɔgɔ fila gbɛrɛ la i bolo a wara bawo a sɛbɛnɛ Allata kitabu rɔ ko sereyɛ mɔgɔ kelen ti mɔgɔ yiliki fɔ fila, ni wo ma, sawa.

¹⁷Kɔnɔ ni a ma sɔn wonu fanan bolo, i ni koe wo bɛɛ rakaran wo ta-nyɔgɛ dɛnkɛninya-mɔgɛnu ye. Nba, ni a ma sɔn wonu fanan bolo, i ni a bira iko sibolo-gbɛrɛ, ni wo ma, duti-makelelɛ.

¹⁸ “Wo ni wo hɛnkili to kɛ ko! Wo ma sɔn fenfen ma duninya kɛ rɔ, Alla fanan ti sɔn wo ma Arinyɛni tɔ. Wo wa sɔn fenfen ma duninya kɛ rɔ, Alla fanan si sɔn wo ma Arinyɛni tɔ.

¹⁹“N ni a fɔ wo ye tun. Mɔgɔ fila wa sɔn ko-wo-ko ma duninya kɛ rɔ fenfenna ko la madiyalɛ rɔ, n Fa Alla min bi Arinyɛni tɔ, wo si a kɛ wo ye,

²⁰ado mɔgɔ fila, ni wo ma, mɔgɔ sawa wa bɛn n tɔgɔ rɔ, n bi anu tɛma nyɔ.”

²¹Wo kɔma, Pita nara Yisa wara ka a manyinika koe do ma. A ko, “Mari, ni n na-kelen-nyɔgɛ tora hakɛ kɛla n na, n ni a makoto iko yili? Kinyama wɔrɔnfila, wa?”

²²Yisa ya a yabi ko, “Ade, kinyama wɔrɔnfila ma de, fɔ kinyama bi-wɔrɔnfila sigi tinɛ wɔrɔnfila (490).[25]

²³Alla min bi Arinyɛni tɔ, ata mansayɛ mani de iko mansɛ min ya a latɛgɛ ko ala yili minnu bi ala wɔli-kɛlɛnu na, a ni wonu dan.

²⁴A ya wo dabira nya min wo, anu nara kelen na, ala wodi wulu siyaman yili ye min na.

²⁵Min bi a bolo, a ma yili-sarɛ bɔ min kɛ, mansɛ ko ale wo, ala musi wo, ala dannu wo, anu ni anu mayira iko yɔɔnnu ka a bolo-fan bɛɛ mayira alako ala yili si sara nya min.

²⁶Wɔli-kɛlɛ wo ya a sa mansɛ kɔrɔ. A ya a madiya ko, ‘I mun fɔlɔ, n si ila yili bɛɛ sara!’

²⁷Mansɛ kinikinita a ma. A ya a makoto yili wola ko la ka a boloka.

²⁸“Mansɛ wo ya min makoto, wo tara ka a wɔli-kɛ-nyɔgɛ taran ala yili-nɛ ye min na. A ya wo bira a kan ma. A ko, ‘Nna yili sara!’

²⁹A wɔli-kɛ-nyɔgɛ wo sara a kɔrɔ ka a madiya ko, ‘I mun fɔlɔ, n si ila yili sara!’

³⁰Kɔnɔ a ma sɔn. A ya wo sa yele la ala yili-sarɛla ko la.

³¹A wɔli-kɛ-nyɔgɛ donu ya wo yen tumɛ min, wo ya anu yisi tɔrɔ bɛrɛkɛ! Anu tara mansɛ wara ka wo bɛɛ rakaran a ye.

³²Woletɔ mansɛ fanan ya wɔli-kɛlɛ wo kele. A ko, ‘Ile, yɔɔn-fufafuyi! Nna yili min bɛɛ ye ile la nun, n bara i makoto wo bɛɛla ko la bawo i ya n madiya.

³³A bɛnnɛ, i ni kinikini i wɔli-kɛ-nyɔgɛ fanan ma iko n kinikinita i ma nya min.’

³⁴Mansɛ diminyara kati! A ya wɔli-kɛlɛ wo sa yele la ka a tɔrɔ ala yili bɛɛla ko la.”

³⁵Nba, Yisa ko, “Ni wo kelen-kelennamɛ-bɛɛ ma wo na-kelen-nyɔgɛ makoto wo yisi bɛɛ la, n Fa Alla min bi Arinyɛni tɔ, wo fanan si wo bira wo nya le.”