Read Kuranko Matiyu 19 Bible Online

Matiyu 19 - Kuranko bible

Matiyu 19

¹Yisa banta kumɛ wo fɔla tumɛ min, a bɔra Kalili sigisɔn rɔ ka ta Yudiya nyamanɛ rɔ Yorodan bɛ kɔgɔma.

²Nyama-ba bilara a fɛ. A ya wonu nakɛndɛya nyɔ.

³Farisi donu nara a wara a kɔrɔbɔ tinɛ. Anu ya a manyinika ko, “Mala tɔn si sɔn ko a wa diya kei ye wati-wo-wati, a ni a ban ala musi la, wa?”

⁴ Yisa ya anu yabi ko, “A sɛbɛnɛ Allata kitabu rɔ ko kebi duninya dabirɛ, Alla ya kei anubɛ musi dan. Wo ma wo karan bɛ, wa?

⁵ Wo le ya a to, kei si a na anubɛ a fa boloka ka tugun ala musi la. Anu filɛ si ma mɔgɔ kelen na iko a sɛbɛnɛ nya min.

⁶Mɔgɔ fila ma anu na tun fɔ mɔgɔ kelen. Nba, Alla ara min tugun anu nyɔgɛ na, mɔgɔ kana wonu fara.”

⁷ Farisinu ya a manyinika ko, “Nfenna worɔ, Nɛbi Musa ya tɔn di ma ma ko yanni kei ni ala musi boloka, a ni furu-tinya-kɛdi di a ma?”

⁸Yisa ya anu yabi ko, “Nɛbi Musa sɔnta wola musu-boloka-koe ma wo nya bawo wo karan-koe gbɛlɛ. Kɔnɔ a sa wo nya nun duninya-dan-wati.

⁹ Nba, n ni kɛ fɔ wo ye. Ni kei ya ala musi boloka, ni a ma tɛgɛ yɛlɛnyɛ[26] ma, a ni ta musu-gbɛrɛ furu, a ara yɛlɛnyɛ kɛ worɔ.”

¹⁰Ala karan-dannu ya a fɔ a ye ko, “Ni wo dɔrɔn si a ma, kei ni ala musi boloka, a fisa, furi kana kiri worɔ.”

¹¹Yisa ya a fɔ anu ye ko, “Ka a fɔ kei ni a to, a ma nyaganɛ furu, mɔgɛ bɛɛ ti karan kɛ nɔ, fɔ Alla ara a di minnu ma,

¹²ado kei ti musi furu minna ko la, wo kɔrɛnu siya. Donu ti ke musi furula ka bɛn anu sɔrɔn-nya ma. Donu ti ke furi kɛla bawo anu hadama-den-nyɔgɛ ya wo kɛ anu na. Nba, donu ti musi furu ka a tɛgɛ Allata mansayɛ ma. Ni min si ke karan kɛ birala, a ni a bira worɔ.”

¹³Mɔgɛ donu nara anuna dennɛnu na Yisa wara ko a ni a bole sa anu kuma ka Alla matara anu ye. Kɔnɔ ala karan-dannu ya mɔgɛ wonu makuma.

¹⁴Yisa ko, “Wo ni sɔn dennɛnu ni na n bara. Wo kana anu mabeli bawo anu denu denuta ye Allala mansayɛ la Arinyɛni tɔ.”

¹⁵Yisa ya a bole sa anu kuma. Wo kɔma, a bɔra nyɔ.

¹⁶Wati do, kei do nara Yisa manyinika tinɛ. A ko, “Karan-mɔgɔ, n si ko-nyimɛ nyamintan kɛ alako n ni habadan-nimayɛ sɔrɔn?”

¹⁷Yisa ya a yabi ko, “Nfenna i ye n manyinikala ko-nyimɛ wara-koe la? Alla kelen pe si ko-nyimɛ kɛ. Ni i ye a fɛ ka habadan-nimayɛ sɔrɔn, i ni to tɔnnu birala.”

¹⁸ Kei wo ya nyinikalɛ kɛ fanan ko, “Tɔn nyamintan?” Yisa ya a yabi ko, “I kana mɔgɔ faga. I kana yɛlɛnyɛ kɛ. I kana kankanyɛ kɛ. I kana foninya-sereyɛ bɔ.

¹⁹ I ni i na anubɛ i fa gbiliya. I ni i sigi-nyɔgɛ keni iko i nyɛrɛ.”

²⁰Keminɛ wo ko, “N bara tɔn wo bɛɛ bira. A tonɛ nfen ma tun?”

²¹Yisa ya a fɔ a ye ko, “Ni i ye a fɛ, i ni kanbali, ta i bolo-fan bɛɛ feri ka wodi wo di bolo-kolɔnnu ma. I si nɔnfuli sɔrɔn Arinyɛni tɔ. Wo kɔma, i ni na bila n fɛ.”

²²Keminɛ ya wo lamɔɛn tumɛ min, a yisi-magboyanɛ tara bawo bana le nun.

²³Wo kɔma, Yisa ya a fɔ ala karan-dannu ye ko, “Wo ni wo hɛnkili to kɛ ko! Nɔnfulu-tigi don-koe Allata mansayɛ rɔ Arinyɛni tɔ, wo gbɛlɛ de,

²⁴ado nɔnfulu-tigi don-koe Allala mansayɛ rɔ, wo gbɛlɛ ka tenbi nyomɛ don-koe la sɛgilan-woe rɔ.”

²⁵Ala karan-dannu ya wo lamɔɛn tumɛ min, anu kawara kati! Anu ya nyinikalɛ kɛ ko, “Yon si kisi worɔ?”

²⁶Yisa tora anu mafɛlɛnna sin! A ya anu yabi ko, “Mɔgɛ ti ke wo mala kɔnɔ Alla si ke koe bɛɛ mala.”

²⁷Wo kɔma, Pita kumara. A ko, “I yɛ lana. Male ara fan bɛɛ to alako ma si bila i fɛ nya min. Male ye nfen sɔrɔnna worɔ?”

²⁸ Yisa ya a fɔ anu ye ko, “Wo ni wo hɛnkili to kɛ ko! Dali-kurɛ wa ke tumɛ min, nde, Hadama-dan wa sigi nta mansaya-waganɛ gbiliyanɛ rɔ, wo tan-ni-filɛ bɛɛ si wo sigi mansaya-sigi-fannu tɔ ka Isirɛla bɔnsɔn tan-ni-filɛ kiti tɛgɛ,

²⁹ado min bɛɛ ara ala bɔn to, anubɛ a na-kelen-nyɔgɛnu, anubɛ a sɔrɔnnɛnu, anubɛ ala dannu, hali ata sɛnɛ-kɛ-tinɛ ndela ko la, wo si wo nyɔgɔn kɛmɛ sɔrɔn anubɛ habadan-nimayɛ fanan.

³⁰ Kɔnɔ minnu bi a fɔlɔtɛ la, wonu si ma a laban la. Minnu bi a laban la, wonu si ma a fɔlɔtɛ la wulɔn.”