Read Kuranko Matiyu 20 Bible Online

Matiyu 20 - Kuranko bible

Matiyu 20

¹Yisa ko, “Allata mansayɛ min bi Arinyɛni tɔ, wo mani de iko sɛni-tigi min tara wɔli-kɛlɛnu nyini tinɛ subaga dɛ ma.

²A sɔnta ka anu sara iko tele-kelen-sarɛ ye nya min. Wo kɔma, a ya anu nata ala sɛnɛ rɔ wɔli-kɛ-tinɛ.

³A mɛnɛ doni, a tara soe burɔ tun. A ya mɔgɛ donu sɔnɛ taran nyɔ, wɔli sa minnu bolo.

⁴A ya a fɔ anu ye ko, ‘Wole fanan ni ta wɔli-kɛ-tinɛ nna sɛnɛ rɔ. N si wo sara iko a bɛnta, n ni wo sara nya min.’

⁵Wonu fanan tara. A ya wo nyɔgɔn kɛ tun, tele-latelan anubɛ tele-makima-wati (3 pm).

⁶Tele-mayigi-wati (5 pm) gbɛrɛnta tumɛ min, a tara soe burɔ tun. A ya mɔgɛ donu fanan sɔnɛ taran nyɔ. A ya anu manyinika ko, ‘Nfenna wo ye tele kɛ bɛɛ banna yan, wo sa wɔlila?’

⁷“Anu ya a yabi ko, ‘Wɔli sa ma bolo.’ “A ya a fɔ anu ye ko, ‘Nba, wole fanan ni ta nna sɛnɛ rɔ wɔli-kɛ-tinɛ.’

⁸ “Wura dɛ la, sɛni-tigi ya a fɔ ala wɔli kun-tigi ye ko, ‘Wɔli-kɛlɛnu kele ka anu sara. I ni a dabira a labannu ma ka a laban a fɔlɔtɛnu ma.’

⁹Minnu ya wɔlɛ dabira tele-mayigi-wati, wonu kelen-kelennamɛ-bɛɛ ya tele-kelen-sarɛ sɔrɔn.

¹⁰Nba, minnu fɔlɔn ya wɔli dabira, wonu nara sara bira tinɛ tumɛ min, anu bi anu mirila ko anu si siyaman sɔrɔn worɔ. Kɔnɔ anu kelen-kelennamɛ-bɛɛ fanan ya tele-kelen-sarɛ le sɔrɔn.

¹¹Anu ya anuna wodi bira tumɛ min, anu ya da-kɔrɔ-kumɛ dabira sɛni-tigi ma.

¹²Anu ko, ‘Minnu bi-san, wonu wɔlita hawa kelen dɔrɔn. Male don, ma wɔlita tele kunayanɛ kɔrɔ ha. Kɔnɔ hali wo, i wara male sara iko i ya doinu sara nya min!’

¹³“Sɛni-tigi ya mɔgɔ kelen yabi anu tɔ ko, ‘N bɔ, i tole masɔ. N ma i kensunya. Wo sɔnta tele-kelen-sarɛ wo ma.

¹⁴Nba, i sarɛ bi ka ta i warɛ. Minnu bi-san n bolo, n bara anu sara iko wole,

¹⁵ado nta wodi le kɛ la, a ma bɛn, wa, n ni n diyana-koe kɛ wo la? I ye keliyɛ kɛla nna foninsereyɛla ko la nfenna?’ ”

¹⁶ Yisa ko, “A ye wo nya le, a labannu si ma a fɔlɔtɛnu na. A fɔlɔtɛnu si ma a labannu na.”

¹⁷Yisa ye tala Yerusalɛm tumɛ min, a ya ala karan-den tan-ni-filɛ wonu bi anu dan na. Anu bi tala tumɛ min, a kumara anu ye dogɔn rɔ.

¹⁸A ya a fɔ anu ye ko, “Wo ni wo tole masɔ. Ma ye tala Yerusalɛm soe burɔ. Anu si nde, Hadama-dan don saraka-masɔla-wɛnu anubɛ tɔn-karan-mɔgɛnu bolo tɔ. Anu si n yiliki ka nna tɔrɔyɛ ma sayɛ la.

¹⁹Anu si n don sibolo-gbɛrɛnu bolo. Wonu si n mayɛlɛn ka n gbesi ka n gbangban kɔlɔma ma n si faga kan min. A tele sawa nyɔgɔn, Alla si n nawuli ka bɔ furinu tɛma.”

²⁰Sɛbɛdila musi anubɛ ala dannu Yemesi anubɛ Yɔni nara Yisa wara. Musi wo ya a nyɛnkin Yisa kɔrɔ ka a matara koe do ma.

²¹Yisa ya a manyinika ko, “Nfen mara?” A ya a yabi ko, “I ni lanyiri kiri ko i wa mansayɛ sɔrɔn tumɛ min, nna den filɛ kɛnu ni sigi i fɛ, kelen i bolo-nyimɛ rɔ, doi i maran rɔ.”

²²Yisa ya a fɔ anubɛ ala dannu ye ko, “I ye n tarala min ma, i ma wo lɔn. N bi nala tɔrɔyɛ[27] minnu sɔrɔnna, wo si kɛ wo munna wonu kɔrɔ?” Anu ya a yabi ko, “Ɔn, ma si ke le.”

²³Yisa ya a fɔ anu ye ko, “Tonyɛ le, wo si tɔrɔyɛ wo sɔrɔn yɔ, kɔnɔ min si sigi n bolo-nyimɛ anubɛ n bolo-maran rɔ, sɛ sa nde ye ka wo yabɔ. N Fa Alla ara kan-tinɛ wonu tabɛn minnu ye, wonutɛ le.”

²⁴Karan-den to tan ya wo lamɔɛn tumɛ min, anu diminyara na-kelen-nyɔgɔmɛ wonu ma.

²⁵Woletɔ Yisa ya anu dama kele a warɛ. A ko, “Sɛnbɛ ye sibolo-gbɛrɛnuna kun-tiginu bolo anuna mɔgɛnu kuma, ado anuna mɔgɔ-banu bi kun-tigiyɛ kɛla anuna mɔgɛnu kuma. Wo ara duru wo la.

²⁶Kɔnɔ a kana ma wo nya wole tɛma. Ni wo kelen bi a fɛ ka ma mɔgɔ-ba la, a ni ma wɔli-kɛlɛ la a toenu ye.

²⁷Ni wo do ye a fɛ ka ma a fɔlɔtɛ la, a ni ma yɔɔn la wole ye,

²⁸ado nde, Hadama-dan ma na ko mɔgɛ ni wɔlɛ kɛ n ye, fɔ ka wɔlɛ kɛ mɔgɛnu ye ka n niyi ni mɔgɔ siyaman kunka-koe la.”

²⁹Yisa anubɛ ala karan-dannu bi bɔla Yɛrikɔ soe burɔ tumɛ min, nyama-ba bilara anu fɛ.

³⁰Fiyɔn filɛ siginɛ kilɛ fɛ nun. Wonu ya a lamɔɛn ko Yisa ye tenbila. Woletɔ anu ya gbele-gbelan dabira. Anu ko, “Ma fa, Mansa Dawudala dan, kinikini ma ma!”

³¹Nyama ya anu makuma ka a fɔ anu ye ko anu ni anu made. Kɔnɔ anu gbele-gbelenta tun bɛrɛkɛ! Anu ko, “Ma fa, Mansa Dawudala dan, kinikini ma ma!”

³²Yisa sɔra nyɔ ka anu kele. A ya anu manyinika ko, “Wo ye a fɛ, n ni nfen ma wo ye?”

³³Anu ya a yabi ko, “Ma fa, ma ye a fɛ, i ni ma yɛ laka!”

³⁴Yisa kinikinita anu ma. A ya a bole maga anu yɛ la. Anu kera fen yenna kelenna! Anu bilara a fɛ.