Read Kuranko Matiyu 24 Bible Online

Matiyu 24 - Kuranko bible

Matiyu 24

¹Yisa ye bɔla Alla-Bato-Bɔn la tumɛ min, ala karan-dannu nara a wara ka Alla-Bato-Bɔn sɔ-nya yira a la.

²A ko, “Wo ni bɔn kɛ bɛɛ mafɛlɛn bɛrɛkɛ! Wo ni wo hɛnkili to kɛ ko! Kuri kɛnu, hali kelen bɛrɛn ti to a gbɛ rɔ. A bɛɛ si wayan.”

³Yisa ya a mayigi Ɔlifi kɔnkɛ kuma tumɛ min, ala karan-dannu nara a wara dogɔn rɔ. Anu ya a manyinika ko, “Yerusalɛm bui-wati fɔ ma ye. Tamasere nyamintan si ila nɛ anubɛ duninya-ban yira ma la?”

⁴Yisa ya a fɔ anu ye ko, “Wo ni a ma wo fɛrɛma. Wo kana sɔn, mɔgɔ-wo-mɔgɔ ni wo mayuwaya.

⁵N ya wo fɔ bawo mɔgɔ siyaman si na n tɔgɛ rɔ ka a fɔ ko Allata-Mɔgɔ-Yabɔnɛ le ale la, ado anu si mɔgɔ-siyaman mayuwaya.

⁶Wo si kɛlɛ-koenu namɔɛn anubɛ kɛlɛ-kibarɛnu kɔnɔ wo kana kilan. A fɛrɛ sa fɔ wonu ni ma kɔnɔ a laban ma wo la fɔlɔn.

⁷Sibolo-gbɛrɛnu si wuli anu nyɔgɔn kan ma. Nyamanɛnu si wuli anu nyɔgɔn kan ma. Kɔnkɔ-fitinɛ si na. Dugu-yɛrɛyɛran si kɛ kan tina siyaman tɔ.

⁸Wola tɔrɔyɛnu dabirɛ le kɛnu na dɔrɔn.

⁹ “Wo kɔma, mɔgɛnu si wo bira ka wo ladon tɔrɔyɛ rɔ. Anu si wo faga. Mɔgɛ bɛɛ si wo kɔn ndela ko la.

¹⁰Mɔgɔ siyaman si dɛnkɛninyɛ boloka wo wati rɔ. Anu si anu nyɔgɔn don anu yogenu bolo ka anu nyɔgɔn kɔn.

¹¹Foninya-nɛbi siyaman si bɔ gbɛ rɔ minnu si mɔgɔ siyaman nasama.

¹²Wunduyogoyɛ si siyaya kan tinɛ bɛɛ ha mɔgɔ siyamanta keninteyɛ ni dɔgɔya.

¹³ Kɔnɔ min si a munyu ha ala ban, wo si kisi,

¹⁴ado Allala mansaya-kibara-nyimɛ kɛ kawandilɛ si bɔ duninya kan-tinɛ bɛɛ rɔ alako a ni ma sereyɛ la mɔgɛ bɛɛ ye. Nba, ala ban si ke worɔ.

¹⁵ “Nɛbi Daniyɛli ya kisimiriya-koe minna ko fɔ, wo si wo sɔnɛ yen Kan-Tina-Sɛnimɛ rɔ Alla-Bato-Bɔn la. (Minnu bi kɛ karanna, anu ni anu taya a kɔrɛ-lɔn-koe ma!)

¹⁶Minnu bi Yudiya nyamanɛ rɔ, wonu ni anu buri ka yɛlɛ kɔnkɛnu kuma.

¹⁷Ni min taranta ala bɔn kuma,[31] hali a ma a bolo-fannu bi ala bɔn la tun.

¹⁸Ni min taranta ala sɛnɛ rɔ, a kana sɛgi ala duruki bi tinɛ.

¹⁹Musu-kolomɛ anubɛ denbɛnu, wo wati si ma gbalo-belebele la anu kuma.

²⁰Wo ni Alla matara ko wola buri-kɛ kana bɛn samɛ ma, ni wo ma, Sulen-Tele,

²¹ ado wo wati rɔ, mɔgɛnu si tɔrɔyɛ sɔrɔn ka tenbi tɔrɔyɛ bɛɛ la min nyɔgɔn ma kɛ wɛ kebi duninya danta, ado a nyɔgɔn ti kɛ fanan mumɛ!

²²Kɔnɔ Alla ara ban do bɔla tele wonu na. Ni a ma wo ma nun, mɔgɔ-wo-mɔgɔ ti kisi. Kɔnɔ Alla si do bɔ tele wonu na ala mɔgɔ-yabɔnɛnuna ko la.

²³“Nba, ni mɔgɔ-wo-mɔgɔ ya a fɔ wo ye ko, ‘I yɛ lata, Allata-Mɔgɔ-Yabɔnɛ ye yan,’ ni wo ma, ‘A ye pan!’—wo kana la wo la,

²⁴ado minnu ya anu nyɛrɛ ma Allata-Mɔgɔ-Yabɔnɛ la anubɛ foninya-nɛbinu, wonu si bɔ gbɛ rɔ wulɔn. Anu si kabana-ko-belebele-wɛnu kɛ Allala mɔgɔ-yabɔnɛnu yanfa-koe la, ni a si ke mala, kɔni.

²⁵Wo ni wo tole masɔ! N bara kɛ fɔ wo ye yanni a wati ni ke.

²⁶“Ni mɔgɛnu ya a fɔ wo ye ko, ‘I yɛ lata wulɛ rɔ!’—wo kana ta nyɔ. Ni anu ko, ‘I yɛ lana, a dogonnɛ yan!’—wo kana la wo la.

²⁷Iko banda-nyin-masɔgɛ si ke tele-bɔɛ ka ta tele-yigi, nde, Hadama-dan si na wo nya le tiriya!

²⁸ “Suyi taranta kan min, dogɛnu si anu nadɛn nyɔ le.

²⁹ “Tɔrɔyɛ wonu ba tenbi tumɛ min, tele la si fin. Karɛ ti gbɛ. Lolenu si bɔ san-kole rɔ ka bui. San-koletɔ-fannu na si maga ka bɔ anu gbɛ rɔ.

³⁰ Wo kɔma, nde, Hadama-dan tamasere si bɔ gbɛ rɔ san ma. Duninya bɔnsɔn bɛɛ wa nde, Hadama-dan yen nala banda-fin-gbɛ rɔ tumɛ min sɛnbɛ anubɛ gbiliya-ba rɔ, anu si di biribiri!

³¹Buru-wɛ si fɛ. N si nna melikanu nata duninya-tonko-nanɛ bɛɛ rɔ. Anu si nna mɔgɔ-yabɔnɛnu nadɛn ka bɔ duninya-tonko-nanɛ bɛɛ rɔ.

³²“Wo ni hɛnkili sɔrɔn toro-kuri fɛ. A bolɔnnu ba anu matii tumɛ min ka yanba-kunyɛnu nabɔ, wo si a lɔn wo le ma ko samɛ ara gbɛrɛn. N foni, wa?

³³A ye wo nya na le, wo wa koe kɛ bɛɛ yen mala tumɛ min. Wo si a lɔn ko n na-wati ara gbɛrɛn. N sɔnɛ dɛ la.

³⁴Wo ni wo hɛnkili to kɛ ko! Yanni mɔgɛ wo bɛɛ ni faga, koe kɛ bɛɛ si bɔ-a-la.

³⁵San-kole anubɛ dugu-kole si tenbi kɔnɔ nna kumɛ ti tenbi mumɛ!

³⁶“Mɔgɔ-wo-mɔgɔ ma wo tele lɔn, ni wo ma, a wati, hali melika minnu bi Arinyɛni tɔ. Nde Allata Dan, nde fanan ma wo lɔn fɔ n Fa kelen pe, wo le ya a lɔn.

³⁷ Nde, Hadama-dan na-koe si ma iko koe minnu kera Nowata wati rɔ.

³⁸Yanni yi-belebele ni na, mɔgɛnu bi fan dɔnna ka anu min. Keinu bi musinu furula. Anu bi musinu dila keinu ma, ha Nowa donta kulɔn rɔ tele min tɔ.

³⁹ Min bi nala mala, anu ma wo lɔn ha yi-belebele nara anu dama lato tinɛ. Nde, Hadama-dan wa na tumɛ min, a si ma wo nya le.

⁴⁰Kei fila si taran wɔlila sɛnɛ rɔ. Kelen si bi, doi si to.

⁴¹Musu fila si taran fui-fan tugula. Kelen si bi, doi si to.

⁴²“Wo rabɛnnɛ ni to bawo wo ma nde, Mari na-tele lɔn.

⁴³Wo ni wo hɛnkili to kɛ ko. Ni bon-tigi ya kankan na-wati lɔn ala bɔn la, a si ki a ya la. A ti sɔn kankan ni ala bɔn tinya ka don.

⁴⁴Wo le ya a to, wo rabɛnnɛ ni to tuma-wo-tuma bawo wo hɛnkili sa a ko tumɛ min, nde, Hadama-dan si na wati wo le tɔ.

⁴⁵“Wɔli-kɛla-latelennɛ anubɛ hɛnkilimɛ ye yon na wo tɛma? Ale le wo la, min tigi ara a sigi wɔli-kɛlɛnu kun na alako a ni anuna dɔn-fan di anu ma a wati-bɛnnɛ rɔ.

⁴⁶Bon-tigi wa sɛgi a warɛ tumɛ min, ni a ya a taran wɔlila, a si sewa wɔli-kɛlɛ wo la.

⁴⁷Wo ni wo hɛnkili to kɛ ko! Wɔli-kɛlɛ wo tigi si a sigi ata bolo-fan bɛɛ kun na.

⁴⁸Kɔnɔ wɔli-kɛla-yogomɛ si a fɔ a nyɛrɛ ma ko, ‘N tigi sa nala fɔlɔn,’

⁴⁹wo kɔma, a ni wuli a wɔli-kɛ-nyɔgɛnu gbesila ka fen-dɔn-kɛ ka a min gbɛɛtoenu fɛ,

⁵⁰nba, wɔli-kɛlɛ wo tigi si na wulɔn-tele la, yɔ, ado a hɛnkili sa tele wo ko, a ma a na-wati wo lɔn mumɛ!

⁵¹A tigi si a ratɛgɛtɛgɛ ka anubɛ kolandinu don kan-tina-kelen. Mɔgɛnu si di nyɔ ka anu nyin masɔgɔ dumɛ bolo.