Read Kuranko Matiyu 4 Bible Online

Matiyu 4 - Kuranko bible

Matiyu 4

¹ Wo kɔma, Allala Ni-Sɛnimɛ tara Yisa la wulɛ rɔ a kɔrɔbɔ-koe la Setanɛ bolo.

²Yisa ya tele bi-nani, su bi-nani bɔ tumɛ min a ma fen dɔn, kɔnkɛ ya a bira.

³Setanɛ nara a wara. A ko, “Ni Allatalala dan le ile la, kuri kɛnu yɛlɛma biredi la.”

⁴ Yisa ya a yabi ko, “A sɛbɛnɛ Allata kitabu rɔ ko, ‘Hadama-dan ti a to dɔntɛ dɔrɔn ma kɔnɔ a si Allala kumɛ ma ata dɔn-fan la.’ ”

⁵Wo kɔma, Setanɛ ya Yisa bi ka ta a la Yerusalɛm so-sɛnimɛ rɔ ka a sigi Alla-Bato-Bɔn kun-tɛma-sore la.

⁶ A ya a fɔ Yisa ye ko, “Ni Allatalala dan le ile la, i gban ka yigi dugi ma bawo a sɛbɛnɛ ala kitabu rɔ ko, ‘Alla si ala melikanu sɔ i lakanan-koe la. Anu si anu bole sigi i kɔrɔ alako i kana i kian gbesi kurinu na.’ ”

⁷ Yisa ya a yabi ko, “A sɛbɛnɛ Allatalata kitabu rɔ fanan ko, ‘I kana ita Mari Alla kɔrɔbɔ.’ ”

⁸Wo kɔma, Setanɛ ya Yisa bi ka ta a la kɔnkɔ-layan-bɛ kuma ka duninya-mansayɛ bɛɛ yira a la anubɛ anuna gbiliyɛ.

⁹Setanɛ ya a fɔ a ye ko, “Ni i ya i nyɛnkin n kɔrɔ ka n bato, n si kɛ bɛɛ di i ma.”

¹⁰ Yisa ya a yabi ko, “Setanɛ, bɔ n fɛ! A sɛbɛnɛ Allatalata kitabu rɔ ko, ‘I ni ita Mari Alla kelen pe le bato ka ata wɔlɛ kɛ!’ ”

¹¹Wo ban, Setanɛ bɔra Yisa fɛ. Nba, melikanu nara a fɛ-bira tinɛ.

¹² Yisa ya a lamɔɛn tumɛ min ko anu bara Yɔni-Batasi-Kɛlɛ sa yele la, a tara Kalili sigisɔn rɔ.

¹³ A bɔɛ Nasarɛti soe burɔ, a tara a sigi Kapereniyam soe burɔ Kalili dalɛ dafɛ min bi Sɛbulɔn anubɛ Nafatali nyamanɛnu tɔ.

¹⁴Wo mara alako Nɛbi Aiseyata kumɛ la ni kanbali min ko,

¹⁵“Nyamanɛ min dira Sɛbulɔn anubɛ Nafatali bɔnsɔnnu ma, wonu bi kɔgɔ-yi wara la Yorodan bɛ tɔnkɔn kelan rɔ, sibolo-gbɛrɛnu siginɛ Kalili tɛngbɛnya min tɔ!

¹⁶Minnu siginɛ pinpi-fin-bɛ rɔ, wonu si na wan-belebele yen. Minnu siginɛ pinpi-makilanni-bɛ rɔ, tele ara fɛrɛn anu ma!”

¹⁷ Ka a fɔlɔ tumɛ wo ma, Yisa ya kawandili-bɔɛ dabira ka a fɔ ko, “Wo ni tubi ka wo kɛ-nyanu yɛlɛma bawo Alla min bi Arinyɛni tɔ, wota mansayɛ ara gbɛrɛn!”

¹⁸Yisa ye tagamana Kalili dalɛ dafɛ tumɛ min, a ya na-kelen-nyɔgɔma fila yen, Saimon (min tɔgɛ fanan Pita) anubɛ Anduru. Wonu bi yɛgɛ birala yalɛ la dalɛ rɔ bawo anu denuta wɔlɛ le wo la.

¹⁹Yisa ya a fɔ anu ye ko, “Wo ni bila n fɛ. N si wo madegen mɔgɔ-nyini-nya la Alla ye iko mɔgɛ si yɛgɛnu nyini nya min ka anu bira.”

²⁰Anu ya anuna yalɛnu boloka kelenna ka bila a fɛ.

²¹A tenbira nyɔ. A ya na-kelen-nyɔgɔma fila gbɛrɛ yen, Yemesi anubɛ Yɔni, kɔni, Sɛbɛdila dannu. Anubɛ anu fa siginɛ anuna kulɔn rɔ anuna yalɛnu tabɛn tinɛ. Yisa ya anu kele.

²²Tiriyante wo rɔ, anu ya anu fa anubɛ anuna kulɔn boloka ka bila Yisa fɛ.

²³ Yisa tara Kalili sigisɔn bɛɛ rɔ ka mɔgɛnu karan Yahudiya-dina-bɔnnu na. A ye Allala mansayɛ kibara-nyimɛ kawandili bɔla. A ya kirayɛ su bɛɛ dandan mɔgɛnu tɔ.

²⁴Yisa mankan nyɛnsɛnta Siriya nyamanɛ bɛɛ rɔ. Wo le ya a ma, mɔgɛnu nara kirayato-su bɛɛ la a wara. A nyinato wo, a kirikirisato wo, a solomonya-fagani-tigi wo, Yisa ya wonu dama lakɛndɛya.

²⁵Nyama bilara a fɛ. Kalili ka wo, Yerusalɛm ka wo, Yudiya ka wo, Yorodan bɛ kan-kɔma-mɔgɔ wo, anubɛ minnu bɔra so-kun-tan wonu tɔ wo, wonu bilara a fɛ.